العربيه كانت عامله 175000كم,قعدت معايا 6 ساعات.
العربيه دي كانت ايجار من احد المكاتب الملتي ناشونال في القاهره,بس للاسف العداد مقفول.بالنسبه للشكل الخارجي فانا بحب شكل العربيه دي جدا وكان حلمي اني اركب واحده لاني من و انا صغير كنت بلاحظ الاهتمام الشديد بالعربيه دي من كل المجلات المحترمه و ان مجله carكتبت عنها the best car in the planet ,ومجله what car ادتها احسن سياره في فئتها لاكثر من ثلاث سنوات متتاليه.
ركبت العربيه و ماحستش ان العربيه بقاها 5سنين مستخدمه فالحاله من جوه جيده جدا ماعدا ان الكراسي كان الجلد حالته نص نص.المهم العربيه من جوه افخم من ال320 الجديده و تحس ان انتى متحوط و ان العربيه محتوياك,بالنسبه للفتيس كان زي بتاع ال320 باضبط و ان كان الاختلاف لما اجيب الreverse كان قلب المرايات بينزل لتحت علشان يوريك الطريق.المهم اخدت العربيه و كنت انا و مجموعه من اصحابي في البي ام و الجزء التاني في ليبرتي 2002 (و دي كملنا بيها لغايه العردقه و ان شاء الله هكتب التست بتاعها مع حبه فيديوهات),المهم جه معاد الشد علي طريق الواحات من اكتوبر للرمايه العربيتين مثبتين لغايه 60كم بعد كده الليبرتي بقت بتفرق في كل نقله لغايه 180كم بعد كده كأن الليبرتي وقفت و انا كملت لغايه 200كم.بس هقلوكوا مفارقه غريبه,رغم ان الليبرتي كانت اسرع و موتورها اقوي بس دايما الخناق كان علي مفتاح البي ام.
حاجه معجبتنيش في العربيه وهي انها برضه مابتخمش(نظام مختلف في المسمي عن ال320 dsc dynamic stability control) و ان كان له نفس التأثير و ان كنت حاولت اعمل بيها درفتات و كنت لما اقرص قوي يدوبك ديلها يلعب و بعدين تمسك علطول و كأن في حد سايق معاك(حاجه تنرفز).
انطباعي العام: عربيه جميله جدا و بأسعارها الحاليه كمستعمل تعتبر فرصه فعلا فقط في حاله انها تبقي صيانه كامله في التوكيل (زي اللي انا جربتها)تحس فعلا انها جديده,ورغم ان الختلاف بينها و بين ال320 20 حصان فقط بس موتور الsix cylinder in line عليه صوت خيالييييييي.