البوجيهات فى كلمات

**samirayad** · 27-08-2009 11:41 PM

وعلى فكرة انا غير متخصص فى السيارات تماما وتخصصى فى حسابات تذاكر الطيران بس بحب الميكانيكا والحاجات الفنيه دى اوى

نفس الوضع ....فأنا متخصص أيضا فى المجال البحرى
ومحركات الديزل وليس محركات الأشعال بالشراره
بس بأحب فعلا التحاور فى أى نقاط فنيه
وأرجو أن يرزقنا الله بزميل متخصص فى هندسة الكهرباء
لعل وعسى يكون لديه مبررات علميه أفضل لتساؤلك
وأنا متابع لهذا الموضوع .....وأن وجد لدى جديد ومقنع فنيا فسأواليك به

**samirayad** · 31-08-2009 12:34 AM

أضافه بسيطه تم الأطلاع عليها اليوم
أنواع شمعات الأشتعال ......البوجيهات
يوجد أنواع مختلفه فى المقاس من شمعات الأشتعال ولذلك عند تغيير الشمعات يجب أختيار النوع المناسب لظروف تشغيل المحرك
1- الشمعه الساخنه ............ذات السن الطويل
2- الشمعه المتوسطه.........ذات سن وسط
3- الشمعه البارده ...........ذات السن القصير

- الشمعه الساخنه .....أنف ذو لون أحمر كما بالشكل
وفيها يكون الأنف الخزفى الداخلى للشمعه طويل نسبيا ( بيكون داخل غرفة الحريق )
حيث يعمل ذلك الأنف الخزفى الطويل المعرض لغازات الأحتراق فى غرف الحريق
على الأحتفاظ بالحراره وعدم تسريبها أو تهريبها لرأس السلندر كما سبق أن بينا
والسن الطويل هو الخط المتقطع فى الشكل القادم شمالا
يستخدم هذا النوع من الشموع مع المحركات البطيئه أو التى تعمل عند أحمال جزئيه
وتتميز هذه الشمعه بخاصية التنظيف الذاتى نتيجه لتوهجها المستمر داخل غرف الحريق
(لأنها بتحتفظ بالحراره ) ولا تسربها للمحرك من خلال رأس السلندر
وذلك بسبب توهجها وبروزها جهة جبهة اللهب أثناء أشتعال مخلوط الهواء والبنزين

- الشمعه المتوسطه ....ذات الأنف الأخضر
هذا النوع من الشموع يستخدم مع المحركات التى تعمل فى ظروف تشغيل عاديه
وفيها يكون طول الأنف الخزفى للشمعه أقصر من الشمعه الساخنه وبالتالى يكون مسار التعرض للهب الناتج عن أشتعال مخلوط الهواء والبنزين أقصر من النوع الساخن

- الشمعه البارده .....أنف ذو لون أزرق
تستعمل مع المحركات ذات السرعات العاليه وذات الأحمال الكبيره للحصول على آداء متميز .......وبالذات فى البلاد الحاره نسبيا
ويكون طول الأنف الخزفى للشمعه أقصر من النوعين السابقين .....حيث لا تحتفظ بالحراره بل يحدث تسريب سريع للحراره الى المحرك
لذا يطلق عليها الشمعات البارده
أنظر الشكل التالى

- التنظيف الذاتى للشموع
بيعتمد التنظيف الذاتى للشموع وعدم حدوث تلوث لأنف الشمعه من الخارج وبالتالى الـتاثير على آداء دورة الأشتعال على حرارة الشمعه وظروف عمل المحرك
حيث يجب أن تحتفظ الشمعه ( الأنف خصوصا ) بجزء من الحراره المعرض لها الأنف خلال تواجده بغرف الحريق
يجب أن تظل حرارة أنف الشمعه فى حدود درجة حراره تتراوح من 600 - 800 درجه مئويه أثناء عمل المحرك وذلك لعدم تكون رواسب كربونيه على أنف الشمعه
ومن أجل الحصول على كفاءة تنظيف ذاتى تساعد فى رفع كفاءة دورة الأشتعال وبالتالى الحصول على آداء جيد من المحرك من ناحية السحب والنسارع
وأيضا ينعكس ذلك على أستهلاك البنزين ...................
من أجل هذا فأن الشمعه أم سن طويل بيفضل أستخدامها فى المناطق البارده
والعكس صحيح بالنسبه للشمعه ذات السن القصير ( تستخدم فى البلاد الحاره )

يلاحظ أنه يمكن أستبدال نوع شمعه بنوع آخر ( حسب ظروفك مع المكنه والعربيه )
من الآخر ........
لو بتحرق على الغيارات يمكنك أستخدام شمعه ذات سن قصير
ولو بتلتزم بعدم التحريق على الغيارات فيمكنك أستخدام الشمعات ذات السن القصير

طيب نفترض واحد مننا أستخدم شمعات ذات سن طويل وكان أستعماله للعربيه معتدل
مبيحرقش على الغيارات يعنى ......أيه اللى حيحصل معاه
المكنه حتبرجل منه ....وآداء دورة الحريق حيبقى أى كلام
لأن سخونة الشمعه مثل مابينا .....حتعمل مايسمى فى هندسة الأحتراق الداخلى
بظاهرة الأشتعال المسبق .....دون أن يدرى
يعنى الحريق حيبقى آخر لخبطه !!!!!!!!!!!!!!!!!

**maka** · 03-09-2009 05:19 PM

موضوع ممتاز جدا

وباسلوب سهل وميسر

بس حضرتك بجد مفروض تاخد لقب ( عميد القسم التعليمى )

**samirayad** · 03-09-2009 07:09 PM

الله يخليك يا أبو حميد
وأشكرك على زوقك وروحك الطيبه

**eslamrace** · 04-09-2009 12:49 AM

شكرا استاذ سمير على المعلومات المفيده

**samirayad** · 04-09-2009 01:23 AM

الله يخليك
وأشكرك على المرور الطيب بهذا الموضوع المتواضع

**wardet** · 11-09-2009 01:01 AM

انا عندى لما العربية بتبقى درجة الحرارة عالية 90 مثلاًَ واجى اقف وابدأ امشي على الاول العربية بتترعش كدا ولازم اديها دوسة بنزين زيادة شوية عشان مش تبطل
ودى مش بلاحظها لو العربية باردة يعنى درجة الحرارة اقل بكتير من 90

دا غير انى مثلاًَ الصبح اول ما ادور العربية بتدور على طول يعنى بتاخد ثانيتين تقريباًَ
لكن لو راجع من مشوار وبطلت العربية وجيت ادور بعد دقيقة مثلاًَ تدور برضه بسرعة مجرد ما احرك المفتاح لكن بعد ربع ساعة مثلاًَ لازم اقرص عليها شوية عشان تدور وادوسلها شوية بنزين

**samirayad** · 11-09-2009 01:40 AM

لو مش عاملالك مشاكل والسحب كويس
سيبها ماشيه
لأن كده ممكن تكون مشكلة دبرياج برضه
الديسك سوسته بتضعف شويه مع السخونه ومرونة السوست بتاعة الديسك بتزداد

عموما ممكن تكشف على البوجيهات والفلاتر
أحتمال برضه تكون البوجيهات عاوزه تتغير
أو أنت مستعمل بوجيهات مش مناسبه لدورة الحريق عندك

وياترى بتزود زيت للمكنه كل فتره
ولا المقاس بتاع الزيت ثابت معاك

**wardet** · 11-09-2009 03:21 AM

انا فعلاًَ البوجيهات عندى بقالها كتير
وعاوز اغيرها
تنصحنى بأى نوع
عربيتى شاهين 1996 بس حالتها كويسة
==================
الزيت بغيره كل 3 الاف والفلتر كل مرتين
لكن فلتر الهوا والبنزين بقالهم فترة كبيرة

**samirayad** · 11-09-2009 04:34 AM

نوع البوجيهات بيتوقف على حسب أنسجام المكنه عندك فى الحريق
مع نوع معين

عموما لو كانت أمورك تمام من قبل كده من نوع معين ( اللى راكب عندك دلوقتى )
حاول تستعمل نفس النوع ....طالما كان شغال معاك كويس
لأن كل حاجه وليها عمر أفتراضى
المهم كانت عامله أيه الحاجه دى وهى شباب

عن نفسى بأحب البوجيه الواحد شمعه دائما
مثل ال ngk اليابانى .....
وأكيد أنت قريت الموضوع
وشوفت مدى تأثير نوع البوجيه على آداء دورة حريق المكنه