الموضوع: عيوب الكيا سيراتو الجديدة

المشاركة الأصلية كتبت بواسطة ali357

يا جماعة بس الحرارة اللى بتقوله عليها دى مش ممكن تاثر فى الطابلوه على المدى البعيد , وعلى الاسلاك الداخلية اللى جوة , وبعدين انتم بتقولوا ان الحرارة مش قوية اللى بتطلع على الكنسول دافية وده اللى واصل لينا بس اكيد ورا الدفئ ده من تحت او جوة حرارة عالية , او حتى لو حرارة معقولة ممكن تاثر على المدى الطويل فى الاسلاك الداخلية وخامات الطابلوه والكنسول , على فكرة انا معجب بالعربية بس 115 الف مش قليلين ابدا دول تحويشة العمر فسمحونا لو الراى كان فى حاجة تزعل لاصحابها , لانهم مفروض يقنعونا اكتر ويقولنا بيقولولهم ايه فى الصيانة وهل ممكن ده ياثر فى المستقبل ولالا عاوزين نعرف مهندسين الصيانة قالولكم ايه لما سالتوهم على التاثير فى المستقبل بالنسبة لموضوع الحرارة , اما الثبات انا اعتقد انها ثابته عشان الجنوط ال16 وال17 , فياريت تطمنونا اكتر على موضوع الحرارة ده وكيفية معالجته وتكاليفه حتكون كام وايه اللى بيعملوه بالظبط او الطريقة اللى بيعالجوا بيها الحكاية دى

اسمحلي مبدئيا أعلق على ما تحته خط

انا كواحد من مالكي العربية ...ما يزعلنيش أبدا ان حضرتك أو أي حد يناقش عيب بشكل موضوعي لأن العيب مش فيا أنا ...ولا أنا مصمم السيارة علشان أزعل لها ...

ده غير ان انا مش باحاول أقنع حد بالعربية ..مصلحتي إيه ؟

أنا فقط بقدم معلومة للي عايز يعرف حاجة و باقول الحلو و الوحش و لو كان كلامي عن العربية معظمه حلو فده طبيعي لأنه انطباعي النهائي اللي دفعني للشراء لكنه لا يجب أن يصبغ انطباعات الجميع

لذلك فالحقائق شئ ..و الانطباع الجيد شئ و النية الحسنة أولا .



اما موضوع السخونة فحضرتك بتقول ان ممكن تكون في سخونة تحت أكتر و أكتر

طبعا في سخونة كبيرة تحت وهي الشكمان ...و بتقل لحد ما توصل

موضوع التأثير على المدى الطويل طبعا لا يمكن التنبؤ به

لكن الحرارة فعلا غير مؤثرة ...يعنى التابلوه بيسخن من الشمس اكتر منها بعشر مرات

دي حتى ماتلسعش زي الشمس و ما اعتقدش انها توصل لدرجة التأثير على البلاستيك

أنا هاحاول أقيس الحرارة بالضبط و أقول هي كام


اما بالنسبة للحل لمن يرى ان هذه مشكلة (و حقه طبعا لأن رضا المستهلك هو الأساس) فالوكيل قال ان في عوازل ممكن استيرادها من كوريا علما بإن العوازل غير مركبة اساسا في العربية برا مصر

بس بيقولوا هايحلوها و يوفروا عازل فوق الشكمان لمن يريد تثبيته ....

يعني برضه محلولة ان شاء الله

المشاركة الأصلية كتبت بواسطة ali357

وان مش كان قصدى ان ملاك السيراتو يقنعونا بمعنى تريقة على العربية او انهم حيكسبوا مصلحة من ورا الاقناع لما نشتريها , احنا بس عاوزين نطمن لما ندفع فلوس , وبعدين لما نكون عاوزين نشترى عربية مش بنلجا ليكم عشان نسالكم وتفيدونا بما يرضى الله لان مهما سالنا عن اى عربية فى المعرض اللى رايحين نشترى منه كل مندوبين المبيعات حيلبعوا بينا هناك لاننا مش عندنا خبرة او نعرف حاجة عن العربية , لكن لما نكون سالنا حد من ملاك العربية سواء كانت السيراتوا او حتى البى ام بنروح واحنا مطمنين جدا ومقتنعين بيها ,لان كتير اتعرفت على ناس من المنتدى هنا بصراحة كانوا متعاونين جدا لدرجة انهم قابلونى عشان اقتنع بالعربية اللى بسال عليها واحكم عليها صح فخالونى اسوقها وانا معرفهمش ولسه متعرف عليهم , واحنا هنا عشان بنتعاون مع بعض كلنا وبنساعد بعض وبنقنع بعض وبندى النصيحة لوجه الله , ومن غير ما تبرر موقفك احنا عارفين وفهمينك انك بتساعد الناس اللى بتسال ومش ليك اى مصلحة , وبعدين احنا كلنا خلاص بقينا عارفين بعض فى المنتدى ومن كتر مشاركتنا مع بعض ومساعدتنا لبعض او لاى عضو جديد حتى وربنا يكرم اللى لسه مش اشترى ومتحير زى ويكرم اللى اشترى ويكيفه شر الطريق , وسامحنا وسامح اى حد متردد عشان ده مبلغ كبير بيدفع مش حيدفع كل سنة لانها عربية واحدة اللى واحد بيشتريها ولو حيغيرها يبقا بعد على الاقل 12 سنة او اكتر كمان فالازم الواحد يسال ويطمن ويقتنع

يا أستاذ علي

اللي حضرتك قولت عليه ده هو أساس وجودنا كلنا هنا بالضبط

اننا نفيد و نستفيد

و سؤال حضرتك عن العربية أو أي ممن بيفكر فيها طبيعي و منطقي

و حق حضرتك علينا اننا نجاوبك و نحكي و نرد و نوضح (حقك لأننا أعضاء في المنتدى و استفدنا منه كتييييييييير وواجب عليانا نفيد على قد مانقدر)

ومهما سألت أو استفسرت

اوعى تشعر بحرج ...ده مش موبايل اللي بنسأل عنه

دي عربية و تمنها تحويشة مش سهل تتكرر تاني لكل الناس

اتمنى أقابل حضرتك في المقابلة و الفطار ان شاء الله