الموضوع: والله عمرنا ما هنتقدم

المشاركة الأصلية كتبت بواسطة tutankhamoun

أنا مش عارف ايه موضوع السرعة عند الناس ؟؟؟؟؟؟؟
بجد مش فاهم ....... أيه لزمة السرعة و الحركات الغبية المصاحبة لها ؟؟؟

.

والله انا السؤال ده بسأله لنفسي كل مرة اكون على الطريق ومش بقدر الاقي اجابة , المشكلة ان الناس دول مش أغراب علينا دول اخاوتنا وصحابنا وزمايلنا !! الواحد بقى مش عارف هو مين الغريب في البلد دي هل هو اللي بيلتزم بالقانون ؟؟


يعني مثلا انا عايز حضرتك تكون في طريق جديد وكويس ومعروف ان مفيهوش رادار وامشي بسرعتك القانونية واتفرج على انطباعات الناس اللي بتعديك ..


او مثلا اشارة بدون عسكري ( مع ان مفيش في الدنيا حاجة اسمها اشارة بعسكري) بس طبعا الدنيا عندنا بالمقلوب , لو اشارة من دول الناس كلها مش محترماها وجرب انتا توقف عربيتك عندها هتلاقي اغرب تصرف ان الناس كلها بتديك كلاكسات علشان تمشي حتى لو الاشارة حمراء !!

طبعا الامثلة كثير جدا

و لا أملك إلا أن أقول حسبي الله في هؤلاء البشر ....... و من تركهم يفعلون ذلك .

للأسف بعض الناس بقوا شايفين ان مخالفة القانون جمدان او قوة مثلا (نمر متشالة متعرفش لية .. تفييم .. لوح سودا ..الخ..)

محدش بقى عاجبة حاجة ولا حد راضى بحاجة ولا حد بيشكر فى حاجة كلة ناقم كلة غير راضى كلة بينقد وبينتقد ربنا يصلح البلد ويصلح حال المسلمين .

حضرتك لمست نقطة هنا في المنتدي كان نفسي أتكلم فيها بصراحة .

كلنا هنا في المنتدي بنعاني و بنشتكي من السرعة العالية و عدم الإلتزام و مع ذلك تلاقي موضوع بيقول يا جماعة انا كنت ماشي علي 180 و السرعة مش عايزة تزيد عن كدة يا تري العربية جرالها إيه .. و الناس كلها تجري تساعد طبعاَ بسلامة نية و لكنها لا تعرف أن صاحب الموضوع ممكن يتسببلهم شخصياَ في حادث مروع بسبب سرعته .. و ساعات تلاقي واحد بيتكلم و يقول حسبي الله و نعم الوكيل أخدت مخالفة رادار .. طب هو الضابط اللي جه داس علي دواسة البنزين ؟ مش حضرتك اللي تجاوزت السرعة القانونية .

بجد نفسي المنتدي يكون بذرة إصلاح و لو 1% في الشارع المصري .. و المواضيع دي بتضايقني شخصياَ و لكن بتجاوز عن التعليق عليها و خلاص .

و زي ما قال سعداوي فيه ناس بيخيلها خيالها المريض إن مخالفة قوانين المرور دي صياعة و جمودية .

أشكرك بشدة علي الموضوع و يا ريت كل واحد يحاسب نفسه قبل ما يحاسب غيره و يقول الشارع وحش .

و يشوف .. هل بيلتزم بالسرعات القانونية علي الطرق السريعة زي ما بيشتكي إن بتوع النقل مبيلتزموش بيها ؟
هل بيركن في أماكن مناسبة للركن ولا تضر نهر الطريق زي ما بيشتكي إن الشارع اللي ماشي فيه ضيق و واقف ؟
هل الكماليات اللي مركبها في العربية زي الزينون و الديفيندر بتضر غيره علي قد ما بتريحه ؟
و حاجات تانية كتير .

و يشوف هل هو يفرق عن اللي بيشتكي منهم ولا لأ .. و مشارك في المهزلة ولا لأ .