ما هو سبب عطل طلمبة البنزين؟

ما هو سبب عطل طلمبة البنزين؟

هل التأخر في تغيير فلتر البنزين؟.

هل شوائب بنزين 80 ؟.

هل التأخر في التموين حتي يكون بالتانك ب 10 لتر فقط؟.

مضخة البنزين بتبوظ بسب الاهمال فى تنظيف الفلتر وبالتالى بيتجمع فى الفلتر الشوائب وبعد مالفلتر يتملى بالشوائب مابيقدرش يقوم بوظيفتة كمنقى لشوائب البنزين,فابتدخل على المضخة وبتعملها نوع من الانسداد ,فابتضطر المضخة انها تزود جهدها عشان تقدر تدفع بالبنزين لوحدة التغذية بالماتور
وبعدين كل اللى انت كاتبة نتيجتة واحدة
بنزين 80 يعنى شوائب كتير
انك تسيب التانك فاضى مع وجود بنزين ردىء فى العربية زى ال80 معناة وجود شوائب كتير فى التنك وهتلاقى المضخة بتسحب البنزين بالشوائب ,

على فكرة الشوائب مالهاش أى علاقة بنوع البنزين لأن المشكلة فى نظافة خزان المحطة اللى بتمون منها لأنك ممكن تحط 92 وتنزل الفلتر ماليان زبالة ودى حاجة متجربة
وأكيد بنزين 80 مرتبط بمحطات مش نمرة واحد فطبيعى إنه يكون مش نضيف وخصوصا إن أغلبية المحطات الكبيرة بطلت تجيبه
حاول تغير الفلتر كل 10000كم لأن ده أفضل

معاك ان الفلتر بتاع المحطة نفسة مهم جدا ودة اللى بيحدد مدى كفاءة المحطة ونظافة بنزينها بس بردة بنزين ال80 فية شوائب بتبهدل بردة الطلمبة والمكنة

المفروض إن الفلتر لو نضيف ونوع كويس يمنع أى شوائب تدخل على الطرمبة

أنا مكملتش بالفلتر 10000 كم يادوب 3000 كم بس خلال 5 شهور ! والطلمبة باظت والحمد لله.
مش عارف يمكن تانك البنزين محتاج تنظيف لإن العربية منذ 1997
بس مش عارف الموضوع دا مكلف والا لا !

ممكن تستمر فى تغيير الفلتر لحد ما التنك ينضف وخصوصا لو بتعمل مشاوير أو سفر كتير هتفول التنك وتفضيه أسرع..
بس ممكن يكون غطاء التنك مش محكم وبيدخل مياه وتراب..

السلام عليكم ... في حاجه تانيه مهمه وهي ان الطرمبه عندك ( زي العربيات الجديده ) بتشتغل بالكهربا وممكن تعد ساعات شغاله اثناء السفر فطبعا بتسخن وهي مصممه انها بتعتمد علي مستوي البنزين المرتفع في التانك لتبريدها - يعني اقل من ربع التانك يسخن الطرمبه وممكن تتحرق + الشوائب فرصتها اكبر للدخول في دوره البنزين والتانك شبه فاضي وده يسد فلتر الطرمبه ( ده غير الفلتر الاساسي ) ويزيد حمل الشفط علي الطرمبه ... اذن الخلاصه ان سيادتك تمون من محطه سمعتها طيبه وماتسيبش التانك للحد الادني .

يعني الـــثلاث نقاط معاً :-

التأخر في تغيير فلتر البنزين؟.

شوائب بنزين 80 ؟.

التأخر في التموين حتي يكون بالتانك ب 10 لتر فقط؟.