الموضوع: عيوب الNew Accent وتفاديها بتعديلات هندسية

المشاركة الأصلية كتبت بواسطة Marwanelbendary

مقدمة غاية في الأهمية

صباح الخير و شكرا على اهتمامكم الجميل و المحترم و أسأل الله أن أفيد كل الناس و يستفيدوا.
اليوم ان شاء الله و استكمالا لما بدأته:

قبل ما أخش في تفاصيل مهمة لازم تعرفوا حاجة مهمة جدا جدا و ماحدش يكروتها وركزا جدا معايا عشان مش هاعيد تاني::
ألا وهي ان الشركة الأم أو المصنع هيونداي أو أي شركة تجميع سيارات في الدنيا تبحث عن شيئين مهمين:
1- التوفير في عملية تصنيع الأجزاء المكونة للمنتج أو المنتج نفسه بما يتناسب مع المطلوب عرضه في السوق و الشريحة من العملاء التي هي الهدف من وراء هذا المنتج.
2- شركات سيارات الركوب عامة ملهاش شخصية تفرضها على المشتري !!!! ايه الكلام الغريب ده؟؟؟؟

يعني:

علشان مثلا يبيعلك عربية لازم تكون عربية عالية علشان ما تحكش في الشوارع و المطبات بتاعتنا وهو كده حللك مشكلتك و مشكلته برضه وهي انه عايز يبيع و خلاص لأ و مش بس كده ,ده هايظبطك بأه في قطع غيار يا زبون ما انت عايز عربية عالية طب خد Over-steer في الملفات الجامدة أو و انت بتفادي حاجة تروح مسنطر فيها ....

وفي عربيات تانية هي بتفرض شخصيتها بشكل ما على الشريحة السوقية بتاعتها ألا وهي السيارات الغالية (على رأي المذيع عمرو أديب روحي روحي روحي) مثل ال BMW وغيرها من اللي انتوا عارفينه أو ما تعرفهوش.

علشان كدة أنا قررت أضحك على دول و على دول و أعدل عربيتي زي ما أنا عايز مش زي ما أي حد عايز دي عربيتي أنا اللي اشتريتها بفلوسي و أنا اللي هاعيش معاها و هاشوف معاها أيام حلوة و هتوريني أيام ربنا ما يكتبها على حد, و طالما انها على الحلوة و المرة تبقى لازم تبقى على مزاجي ....

وعلشان تبقى عربيتك على مزاجك يا حلو يبقى لازم تدفع بس عمرك مهما دفعت هاتدفع زي ما تجيبها كدة ,,
يعني مثلا عربيتي فيها: جنوط 16 اوريجينال و فيها عفشة رياضية بجد مش كلام اعلانات و جرايد وفيها زينون و فيها حجات تانية وصرفت عليها ... تقدر تقولي أول عربية تحت ال100,000 فيها جنط 16 بس بكام؟؟ وتخيل لو فيها زينون ..؟؟. و ماتقوليش عمره ما هايكون زي الأصلي... لأ هايكون و يمكن أحسن كمان كل شيء ممكن تحقيقه بس يتوقف على ميزانيتك أو انت مش عايز تدفع الى لغاية مبلغ معين و بعد كده لأ...........أو مش عايز تدفع أصلا أو لا يوجد مبلغ في الوقت الحالي .........يبقى أنصح بحاجة مهمة....اقرأ اللي هايبقى مكتوب و اديني فرصة لي و للجادين علشان الاستفسارات هاتكون كتير و انت المستفيد برضه من تجارب غيرك وشكرا لكم يا جماعة و اسف على الاطالة بس هو كلام مهم..

وندخل بعد كده على شرح الصوت المرتفع أو الخشن في المحرك و ركزوا تاني

الصوت العالي في الجيل الجديد لسيارات هيونداي بعد 3200 RPM تقريبا عادي بس هو كان مضايقني وله حلول كتيرة:
1- تغيير المدى الحراري للبوجيهات (الانتقال للبوجيهات الأبرد).
2- تقليل الهدر في كمية الهواء الداخل الى المحرك عن طريق تعديل في مجري الهواء في العمة.
3- تركيب Headers with a performance factor between 4 & 6.
4- تغيير نوع فلتر الهواء.
5-Spacer mounting on the intake manifold.
6- تبريد الهواء الداخل للبوابة.

أولا تغيير المدى الحراري للبوجيهات و نوعها:
أنا عملت التعديل ده و كانت نتائجه كالاتي:
1- توفير في استهلاك البنزين.
2-استجابة أعلى للمحرك.
3-نعومة في الRPM العالي.
4- معدل صيانة أقل بكثير بالنسبة لتغيير البوجيهات (كل 100,000 كم !!!!)
5- طبعا بتاع حصانين أو تلاتة زيادة.

خطوات التعديل:
1- تشتري أي نوع بوجيهات فيه التالي:
A- Having a higher heat range number by one step only.
B- The center electrode material is Iridium wire.
C- the center electrode must be a fine wire.

او ببساطة على سبيل المثال زي النوع اللى أنا ركبته : NGK Iridium ولازم يكون عليه الرقم ده BKR6EIX و ماتحاولش تحط حاجة تانية و
اتنين شامعة و الكلام اللى يخرب الدنيا اوعى تعمل غير كدة و ممكن برضه الأرقام ده BKR5EIX و برضه BKR5EIX-11

وده سعره بيتراوح بين 200 و 300 في الاسكندرية و ماعرفش سعره في القاهرة كام؟؟

واللي عايز أنا ممكن أجيبهوله بأقل من كدة علشان أنا عارف جملته كام على التجار بس حرام اني أقول... لو حد عايز أنا أجيبه أرخص و خلاص و ممكن تنزل تسأل على الأسعار بس الخدمة اللي انتوا هاتعملوها انكم تخلوني عارف أسعار السوق للعلم بالشئ جايز يكون رخص ..... أنا شخصيا دفعت فيه ال300 جنيه

و على فكرة البوجيه ده ليه صيانة كل 30,000 كم بسيطة جدا و ممكن تتأجل و تخليها كل 60,000 كم.. اللي هايشتريه يبقى يبعتلي ميل علشان اشرح له موضوع الصيانة ده.

خدمة أعضاء المنتدى سعر طقم البوجيهات NGK Iridium أقل من 200 جنيه.

فاصل و نواصل لانتظار الردود و الاراء..

المشاركة الأصلية كتبت بواسطة cairo2005

طيب الكلام الاخير ده بخصوص الشمعات ينفع للانسر كريستالة 99 اوتو ماتيك ؟
وهيفرق معايا في ايه يعني هيفيد العربية في ايه بظبط؟

1600 ولا 1300؟؟؟؟

المشاركة الأصلية كتبت بواسطة cairo2005

طيب الكلام الاخير ده بخصوص الشمعات ينفع للانسر كريستالة 99 اوتو ماتيك ؟
وهيفرق معايا في ايه يعني هيفيد العربية في ايه بظبط؟

1- توفير في استهلاك البنزين.
2-استجابة أعلى للمحرك.
3-نعومة في الrpm العالي.
4- معدل صيانة أقل بكثير بالنسبة لتغيير البوجيهات (كل 100,000 كم !!!!)
5- طبعا بتاع حصانين أو تلاتة زيادة.

واتعمل في لانسر 1300 اوتوماتيك و ينصح به في كاتالوج الصيانة

متابع بإهتمام شديد...خصوصاً ان التعديلات لا تشمل النيو أكسنت فقط...لكن من الممكن تطبيقها على أي سيارة

متابع باهتمام