الموضوع: مشربتش من نيلها .... فعلا ؟؟

كلامك صح والله ياahmed0nouh
ونفسى الناس تستوعبه كويس

بين الناقمين على حال الشارع يزعجني دائما النوعية المتشائمة المتكبرة والمستعرضين لحضارة الغرب بكل فخر وكأنه تجرد من كونه مصري أو جزء من حال الشارع ولديه من الأخطاء يوميا ما ينحيه تماما عن كونه

فعلا انا لسة عامل موضوع اسمه عشان البلد تنضف ولاحظت ان معظم الردود سلبية ومحبطة
بجن نفسى الناس تتحضر وماتستسلمش لليأس اللى ماليها

المشاركة الأصلية كتبت بواسطة ahmed samy

انا كلامك عجبني

وز أنا من الناس اللي بتنصح كتير و بتعلق على الأخطاء كتير

و بانتقد أي تصرف مخالف أو خاطئ حتى مع زوجتى في العربية مش على المنتدى بس

و أحيانا باكلم نفسي و أقول " شوف الغبي الجاهل بيعمل إيه"

بس أنا فعلا باتعلم من اللي باشوفه

و ما باعملوش

و على قد ما أقدر باحاول ما ابلطجش و افتري

علشان أنا بالعن الواسطة

بسيب رخصتي تتسحب لما اتمسك رادار (مع اني ممكن أخليها ما تتسحبش)

و روحت و الله العظيم بنها أجيبها و أدفع تصالح ( مع اني كان ممكن استناها في المنصورة زي الباشا و امشي بوصولات)

و باسمع كلام كتير من بتاع انت أصلك غاوي تعب

بس تعرف يا أحمد ...انا مش باعمل كده مثالية مثلا

انا باعمل كده علشان أفضل أشحن نفسي

ايوة

انا لو ركبت الموجة و زنقت و مشيت محالف و فيمت و تليفونات في اللجنة و الكلام ده

يبقى البلد دي بوظتني

و الوساخة اللي مش عاجباني طالتني

و أنا عايز أفضل نظيف علشان أشوف الوساخة كويس

لأني مش ناوي أكمل هنا

و كل ما تكون محترم أكتر ...كل ماتلاقي الناس وحشة أكتر

و بيجيلك يأس ...ما بتخرجش منه الا لما تقعد تذاكر علشان تسافر

انما الحقيقة ....

انا لو عايش هنا و ماعنديش نية أمشي

هاعمل كل حاجة زي الناس و ألعن

ما أنا مش هاكتئب ........

بس ساعتها مش هاقول مصر وحشة و الناس همج

لأن ساعتها هاتبقى فله

انا معاك فى النص الاول من كلامك او لو شئنا الدقة لغاية "انا مش هاكمل هنا"
صحيح انه صعب جدا تعيش ضد التيار السائد بس الهروب مش هو الحل ابدا
لما حضرتك تمشى و كل الناس اللى لسه عندها احترام لادميتها و كرامتها يمشو مين اللى هيحافظ على بلدنا ؟ مين اللى هيرفع راسها قبل ما تتقطع ؟ هتلاقى فين بلد تديك الشعور بانك جزء منها ، هويتك ثقافتك طريقة تفكيرك اهلك دينك ذكرياتك اساتذتك اصحابك و حتى كمان اعدائك ..................
مش عارف اقول ايه ؟ وطنى يا اصلحه يا اموت و انا بصلحه

المشاركة الأصلية كتبت بواسطة ams

انا معاك فى النص الاول من كلامك او لو شئنا الدقة لغاية "انا مش هاكمل هنا"
صحيح انه صعب جدا تعيش ضد التيار السائد بس الهروب مش هو الحل ابدا
لما حضرتك تمشى و كل الناس اللى لسه عندها احترام لادميتها و كرامتها يمشو مين اللى هيحافظ على بلدنا ؟ مين اللى هيرفع راسها قبل ما تتقطع ؟ هتلاقى فين بلد تديك الشعور بانك جزء منها ، هويتك ثقافتك طريقة تفكيرك اهلك دينك ذكرياتك اساتذتك اصحابك و حتى كمان اعدائك ..................
مش عارف اقول ايه ؟ وطنى يا اصلحه يا اموت و انا بصلحه

و انا اعترف ..

انا لست بتلك القوة

و أعترف انني أهرب من واقع أنا مؤمن تماما انني لن أستطيع إصلاحه

ولا رتق شقوقه و سدها

واقع أحاط بي في الدراسة و أعتقدت انني سأنول حريتي عندمت تنقش سحابة الكلية و تسلط المدرسين و الأساتذة اللذين لا يصلحون لشيء الا للأكل و الشرب فقط

لكن فوجئت انن عندما أصبحت حرا (كما اعتقدت) واجهت واقعا أمر و أكثر إيذاءا

أحاط بي أيضا في الشارع و الشغل و السوبر ماركت و الجراج حتى في المصيف ووصل للبيت و الجيران

ووجدت كل من حولي أيضا يشتكى ..جلادا أو مجلودا فهو يشتكي

قررت - بنية طفولية صادقة - ان أكون مستقيما مهما التوى الناس

و أن أحافظ على مكتسباتي من بيتي من احترام و أدب و شرف مهما غمر وجهى من قذارة الناس


وصدقنى ...

حاولت ان امنع جيراني من رمي القاذورات في الأسانسير و فشلت

حاولت أقنع المحل اللي تحتي انه يشيل الطوب علشان أركن وفشلت

حاولت أفهم جاري في بيت أهلي انه ما يقفلش باب جراجي كل يوم الصبح برضه فشلت

دي عينة بسيطة من اللي ممكن تشوفه

ده غير فاتورة كهربا مرة بـ80 جنيه و مرة بـ400 جنيه و هو كده

و تدفع 6 جنيه على الفانورة (نظافة) و تبص من الشباك تلاقي الزبالة في نص الشارع

ده غير بقى المعاملات الحكومية اللي ممكن تطلعك من وعيك بجد

و إهمال الناس و الموظفين و معاملتك على انك "كلب"

بس لو روحت مع واحد معرفة ...تبقى باشا

انا عارف انه كلام قديـــــــــــــــــــــم و محروووووووووووووووووووق و اتقال ميت مرة

انا بجيب حاجات من همي و الله

أصلح إيه ولا إيه ؟؟؟

ليه لازم أعيش معركة يومية علشان أقضي مصلحة تافهة و لا أروح بيتي حتى

بقيت باحس ان عربيتي و بيتي (حصون) اتقي بها شر الناس و أخلاقهم

و زهقت من لعب دور الملاك

و مش قادر اشوف نفسي في عباءة الشيطان ....لأنني ببساطة مانفعش من خيبتي

يبقى هل المفروض أرفع شعار أنا مش قده و أسيب البلد دي تاكلني لحد ما تخلص عليا أنا وولادي نفسيا و معنويا ؟؟؟


و على فكرة أنا مش عايز أموت وأنا باصلحها

لأني عارف اني هاموت ...ومش هاتنصلح برضه

بقى أمشي

أنا عارف ان التكلفة كبيرة و كبيرة جدا ...
بس أنا موافق على التمن

أنا أعترف ..أنا أستسلم يا بلدي

أنا أهرب

بتاع سبعة تمانية thanks عالمشاركة اللي قبليا .. يسلم بقك يا دكتور
ده اللي عايز اقوله بالضبط .

1- يقول الحق سبحانه وتعالى في سورة الصف “يَا أَيهَا الذِينَ آَمَنُوا لِمَ تَقُولُونَ مَا لَا تفعلون، كَبُرَ مَقْتاً عِندَ اللهِ أَن تَقُولُوا مَا لَا تَفْعَلُونَ”

2- احنا ليه بنبص على اللي مفيم واللي مركب سارية ومابنبصش على الملتزم؟ ليه نبص على اللي بيرمي زبالة واللي بيلقح نفسه في الشارع لما ييجي يعدي ومابنبصش على الملتزم؟ دي طبيعة في العقل البشري تعميم الذكريات السلبية، إنما مش معنى إني قاعد في البلد يبقى أنا سيء مثل السيئين، بل أنا أحد الملتزمين المتحضرين وهم كثيرون.

وكل سنة وانتم طيبين

يبقى هل المفروض أرفع شعار أنا مش قده و أسيب البلد دي تاكلني لحد ما تخلص عليا أنا وولادي نفسيا و معنويا ؟؟؟

ليه ؟ و متبقاش قده ليه ؟ استعين بالحق ربنا عاوز ايه تانى
ابن تيمية بيقول "ما يصنع أعدائي بي؟ أنا جنتي وبستاني في صدري؛ إن رحت فهي معي لا تفارقني, إنَّ حبسي خلوة, وقتلي شهادة, وإخراجي من بلدي سياحة" و راح فين "انصر اخاك ظالما او مظلوما" ؟

لأني عارف اني هاموت ...ومش هاتنصلح برضه

طب ما هو لو راح الامل منى يبقى انا مت فعلا
ما هو يتتفاءل يا تتفاءل مفيش حل تانى

و طبعا كلامك عن السلبيات يوجع وللاسف حقيقى يا دكتور أحمد
لكن مفيش حاجة سيئة على طول الخط فى مر و فى حلو فى سالب و فى موجب هو ربنا خلق الدنيا كده

احنا ليه بنبص على اللي مفيم واللي مركب سارية ومابنبصش على الملتزم؟ ليه نبص على اللي بيرمي زبالة واللي بيلقح نفسه في الشارع لما ييجي يعدي ومابنبصش على الملتزم؟ دي طبيعة في العقل البشري تعميم الذكريات السلبية، إنما مش معنى إني قاعد في البلد يبقى أنا سيء مثل السيئين، بل أنا أحد الملتزمين المتحضرين وهم كثيرون

ده اللى انا بقوله بالظبط
انا فاكر الاستاذ موترايزر فى موضوع كان بيتكلم عن ان نفاق شعبنا يتجلى باقوى صوره فى رمضان و مقالش شىء واحد وحيد اوحد جميل بيحصل ، ببساطة انا شايف ان النظرة دى -رغم منطقيتها- متنفعش لان التركيز عالمشكلة عمره ما هيحلها لازم نركز عالحل

ثم انت كشاب متعلم-وبتفهم- و على قدر من الثقافة هو انت الثروة الحقيقية للبلد و اى بلد تتمناك انت اللى تقدر تبنى انت اللى تقدر تقود ، هتسيبها لمين ؟

رجاء :
قوللى ايه الحلو فى بلدنا ؟

يا اخوانا احنا كده بنحكم على نوايا الناس التى لا يعلمها الا الله
ما ادرانا بنوايا اصحاب الوعظ والارشاد و السباقين بالنصح
ممكن اللى بينصح يكون له نيه مختلفه تماما عن انه قرا كتير
ومستواه الاستيعابى معرفش ايه وايه المانع ان اللى عنده تجربه
مختلفه يتكلم عنها وينقل للاخرين اللى شافه او سمعه وبردو مش بالضروره ان (الواعظ ) اللى بيتكلم عن مشاكل المرور يكون
متسسب فيها احنا ليه ناسيين ان فى ناس محترمه وليه لم نفترض ان
(الواعظ) ممكن يكون من الملتزمين فعلا او على الاقل مش هيخالف
قوانين المرور الا فى حاله الضروره