الموضوع: استشارة يا اخوانى، اودى البنت المدرسة السنة دى ولا بلاش؟

صباح الخير يا اخوانى

اخوكم محتار و عاوز رأيكم، المشكلة كالأتى:

- ليليا بنتى هتتم 3 سنين فى أكتوبر اللى جاى
- قدمتلها بيبى كلاس فى مدرسة راجاك فى الغردقة
- المسافة بيننا فى سومة باى و الغردقة 45 كم بس الباص هيجيلها كل يوم
- خلاص اشتريتلها اليونيفورم و هى فرحانة انها رايحة المدرسة

بقالى اسبوع مسيطر عليا هاجس انفلونزا الخنازير و بفكر ما اوديهاش المدرسة السنة دى و ابقى اعلمها انا ومامتها فى البيت الحاجات اللى كانت هتاخدها و السنة الجاية لما ييجى وقت الكى جى يبقى ربنا يحلها، و ده للأسباب الأتية:

- المسافة بيننا و بين المدرسة كبيرة و اى طارىء هيلزمنى حوالى ساعة عقبال ما اوصلها
- الغردقة مليانة سياح و حتى المدرسة بيبقى فيها اولاد ليهم اولياء امور اجانب على مصريين
- البنت عايشة فى دور العند عن الأكل ووزنها اقل من الطبيعى و بالتالى خايف على مناعتها
- معنديش اى ثقة فى الرعاية الصحية بالغردقة نتيجة تعامل سابق مع اكبر مستشفيات فيها

ارجوكم تشاركونى برأيكم، انا خايف اكون بظلم البنت، بس بجد قلقان جدا عليها و عن نفسى انا مش من النوع الوسوس و باتعامل مع اجانب و بسافر و مش حاطط فى دماغى اى حاجة، بس لما بارجع البيت باكون قلقان على البنات.