الموضوع: محتاج مشورتكم .. مستعمل ولا زيرو ؟

فييييييييين لما وسعت خيالى اوى واكشتفت ان "قدام" تعنى "ما دام" ، ياللا حصل خير

الله ينور يا باشمهندس فهمت المعني الخفي :mrgreen: :mrgreen:

جزاكم الله خيرا يا جماعة على ردكم .. و خصوصا كبير المهندسين " سبعاوى " باشا ...

أنا حاشوف العربية المازدا دى بكرة ان شاء الله .. و ارجع أقولكم على اللى شفته ...

و بالنسبة لأخى Sabbagh , أنا لسه حاشوف , مشترتش حاجة .. و ربنا يسهل لللى فيه الخير ...

السلام عليكم انا حبيت اشارك برايى على اعتبار اننى كنت فى نفس الموقف وكنت محتار بين شراء سيارة جديدة او مستعملة وخصوصا اننى لم اتعلم القيادة فقررت بمعاونة الاصدقاء انى اشترى سيارة مستعملة وربنا وفقنى فى المازدا 323 والحمد لله العربية بعد تجربة عام كاملة استطيع ان احكم عليها انها جيدة وقطع غيارها متوفرة ولها ميكانيكى تخصص مازدا 323 فى القلعة اسمه بلبل لديه صيانة كاملة للسيارة وقطع غيارها سواء الاستيراد او الجديدة بس اللى عايز اقوله انه على الرغم من ان السيارة تعتبر جيدة للغاية اذا كانت بحالة جيدة بالاضافة الى ان اى سيارة بقالها 30 سنة بتمشى لازم تحتاج للصيانة والنصيحة اللى احب اقولها ان اى سيارة مادمت تهتم بها من حيث الصيانة بصفة دورية سوف تعطى لك اعلى اداء بالاضافة الى اننى قد تعلمت اشياء كثيرة من احتكاكى بالسيارة من حيث الكهرباء والميكانيكا ... الخ بشكل يجعلك انك عندما تتخذ قرار شراء سيارة جديدة تعرف ماهو الجيد وما هو المناسب للك وربنا يوفقك لما فبه الخير .

يا جماعة .. أنا امبارح شفت العربية المازدا 323 موديل 82 اللى قلتلكم عليها .. الصراحة العربية من برة شكلها كويس بالنسبة لعربية بقالها 25 سنة فى الشوارع المصرية ( ممكن تحتاج تغيير الاكصدامين أمامى و خلفى , و ووشين فوانيس , و مش رشة دواخل ) .. و طلع صاحبها كمان راجل محترم و جارنا .. و من كلامه و كلام صاحبى , العربية مش متهانة , و فعلا مبتمشيش كتير , بيقولى يدوب ممكن يسافروا بيها اسكندرية فى الصيف , و مشاوير قليلة على مدار السنة ( العداد جايب 5 ألاف كيلو , بس مش عارف العداد بيقلب على كام كيلو ؟) ..
و بالنسبة للبارومة الراجل معندهوش مشكلة أننا نجيب سمكرى و ميكانيكى يكشفوا على العربية لأنها مفيهاش بارومة .
و واضح أنه مهتم بالعربية , و حاطط فيها حاجات original أصلية ( على كلامه ) , و هى أول يد و بيتى , يعنى الوالد - الله يرحمه - كان شاريها زيرو , حتى فيها الكاسيت و الراديو الأصلى بتاع العربية , و قالى أنه حيدينى الكتالوج الأصلى يتاع العربية , و كمان كل الحاجات اللى اتغيرت فى العربية على مدار السنين , ( حوالى 8 مساعدين , و كبالن , .. ) , و العربية عاملة عمرة موتور من سنتين , بس حاجتها الأصلية هى اللى فيها ..

بالنسبة للسعر , فهو مش عايز ينزل عن 28.5 ألف , و صاحبى كان عايز ينزلها ل 27.5 ألف , بس صاحبها مرضيش .. و ده كان اخر كلام .. ( بالمناسبة , مدير الحسابات عندنا فى الشغل , معاه مازدا 323 نفس الموديل , و مركب فيها تكييف , و موتور 1500 , و خمس نقلات , و مع ذلك العربية بتاعته لما عرضها , مجابتش أكثر من 25 ألف , بس طبعا عربيته شغالة طحن من زمان ) .

رايكم ايه فى الحكاية دى , خصوصا انى مش عايز أخسر كتير لما أجى أبيع العربية ؟؟ و ياريت يا أستاذ mohamed10 تقوللى أنت كنت اشتريت عربيتك بكام , و كانت حالتها ايه ؟؟ و أخبار أعطالها ايه معاك طول السنة اللى فاتت ؟؟

منتظر نصيحتكم ...

على فكرة العربية كنت شاريها السنة اللى فاتت فى شهر 10 وكانت ب25 الف بس العربية كانت بحالتها وكان فيها برومة بسيطة قمت بعملها وماكنتش رشة دواخل بس الحقيقة اللى لازم تعرفها ان العربية ديه بامانة حلال فيها الفلوس لانها مختلفة فى قيادتها عن 128 بالاضافة الى انها عائلية وممكن اقولك على حاجة كويسة لازم تحطها فى اعتبارك ان عند شرائك اى عربية مستعملة سوف تظطر لتغير بعض الاشياء على حسب ماتحس وتشعر بيه اثناء استخدامك للسيارة فمثلا انا لما اشتريت السيارة وبعد فترة من الزمن قمت مغيير المساعديين الخلفيين بمساعدين جدد يابانى ب 470 جنيه + 2 سوسته خلفية 120 وتركيبب صدادة فى المساعديين لان السيارة تعتبر منخفضة وكانت بتحك فى المطبات ولكن بعد التعديل الحمد لله ، فارجو ان تضع فى اعتبارك ان السيارة بقالها 25 سنة ولابد من وجود بعض الاشياء اللى هاتحتاج لتغيييرها وكمان لزيادة الاطمئنان من ناحية السيارة ده تليفون الميكانيكى اسمه بلبل وهو استاذ المازدا ويمكن يكون اصحاب السيارة يعرفوه يمكنك اخذ السيارة اليه للكشف عليها وهو هايرشحلك سمكرى لمراجعة السيارة وتليفونه هو 0129278896 ويمكنك اخذ رايه فى سعرها بس خليك عارف ان سعر السوق دايما بيبقى اعلى حاجة بسيطة وربنا يوفقك لما فيه الخير واى استفسار اخر انا تحت امرك

المازدا عربية جميلة جدا جدا عن تجربة بس السعر ده عالى وخاصة لو كانت 1300 ومافيهاش تكييف وانا بردو جبتها فى اول ماتعلمت احسن من اى عربيه فى سعرها بس خللى حد شاطر يبص عليها وخاصة الركب زى ماان سمعت فى السوق وياريت لو ترفعها فى بنزينة زى كالتكس عباس العقاد هناك مهندس هيقيمها والكشف ب35 جنيه