ما هي اطرف المواقف لك مع سيارتك

**Amrrr** · 15-09-2009 01:11 PM

وعليها كل ما اجي ادورها الصبح ومترضاش تدور اعمل زي الميكانيكي
تخيلوا المنظر الصبح الساعة 6 ونص مثلا واحد لابس بدلة كاملة بجرافتة وشنطة ويفتح الكابوت يشد له بقين بنزين ويقفل العربية ويركبها ويمشي وهات يا تعليقات من الكلاب لاصغيرة اللى يبقولوا عليهم طلبة رايحين المدارس
ومرة رئيسي في الشغل واحنا مسافرين في القطر ونسيت اخد ازازة البرفان معايا اليوم ده (كنت باخدها علشان بعد بؤين البنزين ارش منها علشان تغطي على ريحة البنزين)كل شوية يقولي فيه ريحة بنزين فيه ريحة بنزين في الاخر اضطريت اعترف له بالحقيقة قالي يعني حبكت تعمل دماغ البنزين واحنا رايحين الشغل بلاش في ايام الشغل خليها في الاجازات بس

اما العربية الجديدة وهي لانسر 99 اوتو فاظرف موقف انى يوم عيد ميلاد بنتي 5 سنوات اخدتها بالليل علشان تختار التورتة على زوقها واحنا ماشيين اخدت بالي اني نست المحفظة وفيها الرخص قلت مش مهم انا هجيب من جنبي على طول المهم رحت محل الحلويات لقيته قافل ومكتوب للتاجير او البيع
قلت يا واد متزعلش البنت هات لها من توينكي اللى في شارع الهرم وقلت روح البيت هات الرخص وبعد ما لفيت ناحية البيت قلت مش مهم ارجع البيت ومش مهم الرخص مفيش لجان في الطريق فلفيت تانى لشارع الهرم البنت قالت لي بتلف ليه يا بابا كل شوية فقلت لها ممعاييش الرخص نسيتهم في البيت قالت لي خلاص انت تبص ناحيتك وانا ابص ناحيتي واحنا ماسيين ولو لقينا اي ثابط نقول لبعض عثان تخث الثارع القريب عثان مياخدوث العربية (طبعا اللى عندهم ولاد فاهمي ناللوغاريتمات بتاعتها) وكان بها وفعلا فضلنا انا وهي نبص يمين وشمال ونضحك لغاية ما جبنا التورتة ورجعنا البيت وعملت لها عيد الميلاد الى هي عايزاه

جامد اويييييي

**D . a .\ AYMAN** · 15-09-2009 01:37 PM

إيه ده قصص ألف ليلة وليلة

ده كده ممكن الواحد يقعد يحكي القصص دي لعياله بالليل

أنا بقى مرة وأنا نازل من الشغل مالاقيتش مفاتيحي ... وقعدت أنا وبعض الزملاء ندور عليها لمده لا تقل عن ساعة ونصف بعد موعد الإنصراف .. وكل الفراشين والسعاة بيدوروا معانا وفتحنا كل الغرف المغلقة ندور فيها وبرضه مافيش حاجة

المهم نزلنا خلاص ونوينا على إن أحد الزملاء هايوصلني للمنزل واليوم التالي أكون جبت المفتاح الإحتياطي ... وبعد مانزلت وقفت قدام العربية وببصلها وصعبان علية أمشي وأسيبها لوحدها ... شوية وروحت واخد مفاتيح زميلي بعد ماكله مشي طبعا .. بجرب أفتح الباب لاقيته فتح بدون أي مقاومة

... بجرب أشغل لاقيتها إشتغلت برضه بدون أي مقاومة

... (مع العلم إن أصلا مفتاح الباب عندي غير مفتاح الكونتاكت) .... طب أنا كده شغلت عربيتي طب زميلي ده هايروح إزاي ويشغل عربيته إزاي

.. بجرب أشيل المفتاح من الكونتاكت وهية شغالة لاقيته طلع بدون أي مقاومة برضه

.. بقيت قاعد أنا وهو مش مصدقين اللي بيحصل

بلف الدركسيون من غير مفتاح لاقيته مابيقفلش

وروحت بالعربية وهية شغالة من غير مفتاح بس كنت خايف برضه الدركسيون يقفل كل ما آجي الفه في أي إتجاه ... وبعد ماروحت وركنت تحت البيت .. واجهت أغرب مشكلة ممكن تواجهوها وهية إزاي هاطفي موتور العربية من غير المفتاح ... بس الحمدلله حلها كان سهل خالص طلعت جبت المفتاح الإحتياطي ونزلت طفتها ..

بس الغريب بقى إن المفتاح بتاعي ماكانش عايز يدخل المجرى بتاعه عشان طبعا العربية شغالة ... ودخلته بالعافية شوية

تخيلوا بقى تاني يوم لاقيت المفاتيح فين

وجدها زميلي اللى كان هايوصلني واللى مفتاحه شغل عربيتي بداخل ظرف إحدى القضايا اللى كان واخدها معاه المنزل ولاقيته جايبهالي تاني يوم في الشغل وهو فطسان على روحه من الضحك ... لأ وإيه هوة اللى حطها في الظرف وهوة بيلم القضية .. لأن القضية دي أصلا كان فيها حرز مفاتيح وهوة خده على إن ده الحرز بتاعها

**MoToRiZeR** · 15-09-2009 04:32 PM

المشاركة الأصلية كتبت بواسطة kh_talaat

وبطريق الغلط رحت مناوله رخصة عربيتي انا مش عربيه اخويا راح باصص فيها وبعدين رجع بص ليه تاني روحت مناوله رخصة القيادة بتاعتي بص فيها وناولني الرخصتين وقالي إتفضل مبقتش مصدق ومشيت على طول وقولت دي تدابير ربنا ... الحمد لله

ههههههه الموقف ده حصلي قبل كدة .. طلعت لواحد رخصة الكليو بدل السيريون من غير ما أخد بالي و بص فيها و مشاني .. المرة الوحيدة اللي واحد قرالي فيها تفاصيل الرخصة بالكامل كان علي طريق الساحل من كام يوم .. قعد يقرالي تفاصيل الرخصة بصوت عالي و في الأخر قاللي كل سنة و إنت طيب و إداني الرخصة و مشيت .. بس كان كمين جيش مش عارف إيه موقفه عالساحل .