الموضوع: هو الثواب بالعافية مش معقولة كدة

المشاركة الأصلية كتبت بواسطة ams

جميل ان حضرتك يتقدر تشوف الجانبين يا استاذ كريم
التوازن ده هو اللى بيخلينا نقدر نعيش

بالنسبة للناس اللى معطلين المرور وفاكرين انهم كده بياخدو ثواب عشان بيفطرو الصايمين فمتبقاش قاسى عليهم فى حكمك لانهم معندهمش عقلك او علمك او خبراتك او او او او حاجات كتير قوى فلو حكمت بمنطقك عليهم هيكون حكم ظالم ليهم لانهم معندهمش الادوات اللى يوصلو بيها للنتايج اللى ممكن يفهمو بيها ان ده غلط

بالضبط كده يا مستر كريم

انا رأيي برضه ان الموضوع مش موضوع دين وفاهمينه غلط او ثواب الموضوع موضوع شعب بيحب يجامل بالعافية

مرة واحنا في الكلية بعتنا واحد زميلنا يعمل بحث مع دكتور في بني سويف وكان من النوع المدلع اللي بيروح العباسية بالعافية وميعرفشي مكان ميدان رمسيس فين , اقنعناه ان القطر حياخده في ساعة رايح وساعة جاي وقبل المغرب حيكون في بيتهم, راح للدكتور الكبير بعد ما خلص معاه البحث الدكتور حلف انه مش حيمضي على البحث قبل ما يأكله في بيته, يا عم يهديك يرضيك ابدا الدكتور مش قادر يصدق ان زميلنا مش حيعرف يروح.
خده على بيته واكله في ساعتين ثلاثة اربعة لان طبعا مفيش اكل جاهز
صاحبنا كان بيعيط , ولما جه ميعاد الرجوع تقريبا ملقاش قطر يرجع فيه وكان حيموت عشان مش لاقي حته يبات فيها داغير اساسا انه مش مصدق انه في بني سويف والليل دخل عليه ومفيش مواصلات....

يعني الموضوع موضوع ثقافة شعب

واحد صاحب ثاني راح مع والده فرح يباركو جه واحد من تحت الارض يعزم عليهم سجاير بعادة الافراح المصرية , زميلي دكتور مبيدخنش وابوه راجل كبير وصدره تعبان وبرضه مبيدخنشي الراجل اتشال واتهبد ولازم تشربوا وراح حالف بالطلاق انه لازم يشرب منه .....

صاحبي بيقولي وهو حيموت من الضحك اول مرة اشوف والدي مذهول وبيمد ايده ويشرب سيجارة من الراجل اللي ميعرفوش عشان الراجل ده ميطلقشي مراته ..... رغم اننا ولا نعرف الراجل ولا تهمنا مراته ......


دا غير ان الحتة اللي حضرتك وقفت فيها دي واقفة على طول فعلا وعمري ما شفتها سالكة ابدا

واذا كان الاجانب اساتذه في قفل الشوارع على عكس ماحنا فاهمين يعني مثلا عندهم مهرجانات ولما بتحصل فيها حادثة ولا اي حاجه ولا اسعاف ولا بوليس بيعرفوا يدخلوا عشان الناس مش حتمشي مثلا لانها بتحترم المناسبة وطالما مهرجان يبقى مهرجان, رغم انه ممكن يبقى مهرجان لجمع تبرعات لنادي محبي الفراشات الحمرا , الصفرا لأ.

وعلى عكس ماحنا فاهمين لما بيدخل الليل ممكن متلاقيش في الحي كله صيدلية واحدة فاتحة ولا علبة دوا مادام الدنيا ليل ....


عارف حضرتك حته التضارب بين العقل والمنطق وبين المناسبة والتقاليد فكرتني بموقف حصل لي من زمان

لما كنت في الكلية كنت بنزل صيدلية عشان احفظ اسامي الادوية كعادة اي طبيب يحب انه يعرف الدوا كله مش مندوبي المبيعات...

كنا في رمضان وساعة المغرب ما قال الله اكبر دق جرس التليفون وواحد طالب شريط دوا سكر
قلت له ان احنا حضرتك ساعة فطار والولد بتاع الدليفري بيفطر

الراجل اتنرفز وقالي انتا متعرفشي انا مين انا متسجل عندك في الكمبيوتر اني المستشار فلان وانا بأمرك (وخلي بالك من بأمرك دي ) انك تبعت لي الدوا , وهوا مفيش احترام للعيانين لا ايه ......

تعرف ساعتها بصيت للولد بتاع الدليفري اللي قاعد على الارض يفطر وعمال ياكل وعرقان من كتر اللف بالعجلة في توصيل الدوا طول النهار وهو صايم على الرغم اننا كنا في الشتا من عشر سنين

ولو تفتكر ساعتها الواحد في رمضان مكانش بيعطش كان بيجوع ....

ساعتها فكرت اعمل ايه .... والله ما همني كلام الراجل ولا زعلت منه لانه في الاخر عيان.
لو أمرت الولد انه يوصل الدوا حيوصله ومش في دماغه كل الكلام ده وحيرجع يكمل اكله ثاني.

بس مش عارف ليه حسيت انه لأ, مش حقوله يوصل الدوا حسيت انه لازم يحترم شاب بياكل وصايم طول النهار
شريط السكر مش زي الانسولين مثلا لازم يتاخد قبل الاكل وحتى ولو المفروض انه يستنى مش ساعة الفطار يطلبه
دا غير انه ايه المنطق ان الراجل عايز يفطر وبلاش يفطر بتاع الدليفري

ساعتها لقيت نفسي بقول له أنا آخر كلام عندي الدليفري حيشتغل في خلال نص ساعة لو عايز حضرتك الدوا قبل كده ممكن تبعت حد ياخده وشرحت له اني اقبل ترك الشغل ولا اقبل اني اخرجه في ساعة زي دي .....

بس سيبك انت حضرتك اخدتنا في دوكه و مقلتلناش كنت معزوم على ايه ؟؟؟