أهم حاجات تاخدها في اعتبارك و انت بتشتري عربية جديدة:
1- من وكيلها وما سمعته (ودي ممكن تعرفها من المنتديات و النت أو أي حد انت تعرفه) من ناحية الاهتمام بالسيارة و بالعميل و شكوته و الاهتمام بعيوب التصنيع الموجودة بالسيارة في خلال فترة الضمان و أحيانا خارجها و تغيير القطع اللازمة بدون تحميل العميل أي شئ ولا يتملص من تغييرها.
2- مواعيد الخدمة (الطبيعي من الساعة 8 حتى 4 أو 5 عصرا) وده وقت خنقه يعني لازم اخد اجازة أو اسيب اللي في ايدي أو اصحى بدري...:stink[1]:
3- تواجد قطع غيارها في التوكيل مهم جدا مش بس تسال على الاسعار وبس و عامة اسعار قطع غيار السيارات للعربيات الجديدة دلوقتي غالية (وده لأنها غالبا مش مضروبة) و ياريت لو في امكانية توافرها خارج التوكيل.
4- قيمة السيارة في السوق في عملية اعادة البيع (Resell Value) يعني الهيونداي و ميتسوبيشي و تويوتا و دايو وغيره.
5- الامكانيات الموجودة في السيارة مقارنة بسعرها و مقارنة بسيارات اخرى من نفس الفئة على حسب الفئة المفضلة للشراء مثلا:
ممكن نقارن النيو أكسنت و تويوتا ياريس و الأفيو من حيث البنود السابق شرحها بالاضافة الى الـنقاط التالية:
1- سعة المحرك.
2- عدد الكامات و الصبابات و تكنولوجيا وش السلندر و كهرباء هذا المحرك (CVVT, V-Tec- ECO-Tec, MIVEC, Audi Valve Lifting, DVVT.) وغيره و غيره.
3- المسافة بين محاور العجل الأمامية و الخلفية (الأطول أحسن وأوسع بس امكانية انها تحك في المطبات أكتر).
4- الأمان (Crash Test) وده أهم حاجة لازم تعرف العربية دي واخدة كام نجمة ودي من أهم الحجات اللي ماينفعش تكبر دماغك منها.
5- حجم اجهزة الفرامل و الطنابير و السرفو (الأكبر يكسب).
6- كماليات السيارة.
7- الوسع من الداخل والشنطة.
8- نظام تصميم العفشة ونوعية الكاوتش و مقاس الجنوط.
9-خامات كل حاجة في العربية داخليا و خارجيا.
وأهم حاجة المقارنة بين أسعارهم كلهم ولازم تعرف انك مستحيل تاخد حاجة ولازم تتنازل عن حاجة و حاول تختار الحاجة اللي ممكن تتنازل عنها قصاد بقية الحجات.
وأنا أرشح تحت ال100,000 جنيه ان أحسن سيارة في فئة السيارات السيدان متوسطة الحجم بالنسبة لكل ماسبق ذكره هي النيو أكسنت و دي وجهة نظري.