الحقونى يا جماعة العربية مش بتشتغل و محتاجه تتزق علشان تدور..العيب فين

**newuser2009** · 29-08-2009 03:16 AM

السلام عليكم
الحقونى يا جماعة العربية مش بتشتغل و محتاجه تتزق علشان تدور
عملتها معايا قبل كده من كام شهر و ما اشتغلتش ولما رحت للكهربائي كشف عليها و قالى البطاريه مفيهاش ميه مقطره و زودها ميه وقالى ابقى زودها كل 3 شهور ولا حاجه علشان ما توقفش منك

فقلت لازم ازودها و اشتريت ميه مقطره و زودت العربيه و هيا مطفيه
جيت تاني يوم اشغل العربيه الكونتكت فيه كهربا لكن العربيه ما بتدورش
المهم زقيتها و مشيت بها مشوار واشتغلت بعد كده كل يوم كنت بخرج بيها الصبح

و بعد اسبوع سيبتها يوم ما خرجتش بيها و جيت تاني يوم ادورها ما دارتش و زقيتها و رحت بيها مشوار صغير (5 كيلومتر او اكتر شويه) وطفيتها و بعد 3 او اربع ساعات شغلتها ما دارتش برضه و زقيناها لحد ما اشتغلت

السؤال هنا ..... العيب في البطاريه ولا في المارش ولا علشان زودت البطاريه ميه مقطره و لا ايه بالظبط
و الحل ايه اغير البطاريه ولا ايه ؟علشان مش عايز اتكلف تغيير البطاريه و يطلع العيب من حاجه تانيه

افيدوني جزاكم الله خيرا و رمضان كريم

**most_wanted** · 29-08-2009 03:24 AM

المارش ملهووش دعوه
انت عندك العيب في البطاريه او الدينمو ............وغالبا البطاريه عايزه شحن

**newuser2009** · 29-08-2009 03:49 AM

الف شكر على ردك يا باشا
معناه ايه عايزه شحن ؟؟
يعني اروح لكهربائي يشحنها ولا اشترى واحده جديده ؟؟

**ahmed elsherif** · 29-08-2009 04:04 AM

روح للكهربائي يشحنها ولو مقبلتش شحن وعملت الموضوع ده تاني هتحتاج تغير بطاريه والافضل تجيب بطاريه جافه عشان تريح نفسك من تزويد المياه

**newuser2009** · 29-08-2009 04:18 AM

جزاكم الله خيرا على الرد

ممكن اعرف اسعار البطاريات العاديه و الجافه
معلش طولت عليكم :)

**amrbakly** · 29-08-2009 09:29 PM

استني بس هي العربية نوعها اية؟؟؟

**newuser2009** · 29-08-2009 11:42 PM

العربيه سوزوكي سويفت 94

**amrbakly** · 30-08-2009 12:13 AM

طيب بص أولا حاول تجرب تشوف الموبينا شغالة كويس ولا لأ

تفك السلك اللي داخل من الموبينا للسبراتير و تحط فية مفك و تشوف حيعمل شرارة لما تدور ولا لأ

لو كدة تمام يبقي الموبينا شغالة، بس طبعا تمسك في ايدك مفك بمقبض بلاستيك او كاوتش مش اي حتة حديدة

لاقيت الموبينا شغالة ابدأ بقي شوف اسبراتير و كوندنسر و ابلاتين و لو العربية الكتروني شوف المشط الإلكتروني لأنة أحيانا بيكون سافر و تحديدا لأنة بيسافر لو جهه علية مية و أنت بتغسل الماتور ولا حاجة

و كمان يستحسن تجرب اي بوجيهات قديمة معاك الأول لأن احيانا ممكن تبقي بوجيهات هي اللي عاملة الحركة الفاشلة دية

و ممكن تكون البطارية ضعيفة

بص أنا اديتك كل الإحتمالات بس جرب واحدة واحدة مع نفسك، و لو ساكن قريب من وسط البلد ممكن اوصفلك كهربائي ممتاز و مش غالي

**newuser2009** · 30-08-2009 12:21 AM

الف شكر على ردك يا باشا
و انا هاجرب اللي انت قلته ان شاء الله

**newuser2009** · 05-09-2009 01:57 AM

شكرا على تفاعلكم
النهارده وديت العربيه لكهربائي و غيرت البطاريه و اشتريت بطاريه جافه ماركه koba ب 350 جنيه صناعه كوري و الراجل اخد 20 جنيه تركيب و اشترى القديمه ب 20 جنيه يعني دفعت في موضوع البطاريه 350 جنيه
وكان عندي مشكله في الكبالن كانت (بتطقطق) مع الدوران فاشتريت 2 كوبلن جديد ب 155 جنيه و ركبتهم عند ميكانيكي و الراجل اخد 40 جنيه.. بس وهوا بيغير الكبالن خرج زيت من قاع العربيه و سألته قالي ابقى زود زيت الفتيس و فعلا زودته ب 15 جنيه

ايه رأيكم في الاسعار دي
ياترى اتضحك عليا فيهم ؟؟
وشكرا لكل من رد عليا و ساعدني