عـلـى أى اسـاس يقوم المواطن المصرى بشراء سيارته الجديدة ؟؟

**Terrible_DaRsH** · 29-08-2009 04:30 AM

السلام عليكم ..:

هطرح عليكم سؤال يا جماعة و يا ريت كل واحد يقول وجهة نظره فيه ..

على اى اساس يقوم المواطن المصرى بشراء سيارته الجديدة ؟؟

تفتكروا كل واحد لما بيشترى عربية جديدة بيشتريها بناء عن ايه , و الموضوع ده محصور فى المصريين فقط .

انا مش عايز التجارب الشخصية و لكن انا بتكلم بصفة عامة على كل الناس .

ليه لما اللانوس نزلت اكتسحت شوارع مصر ؟؟ ليه لما الفيرنا نزلت اكتسحت شوارع مصر كلها ؟؟ ليه كل سنة تلاقى عربية او اتنين المسيطرين على البلد كلها ؟

فين ثقافة المشترى او المستهلك ؟ هى الناس بتقلد بعض و خلاص و لا فعلا العربيات دى تستحق الثقة العمياء .

يعنى السنة دى اكتر عربيتين انتشروا فى الوقت الحالى هما النيو سيراتو و رينو لوجان .

بمجرد ما اعلن عن نزول اللوجان و انا شايف انها منتشرة انتشاااار رهيب و لسه لما الحاجزين يستلموا و هكذا ..

هما المصريين بيشتروا العربية على اساس ايه نفسي افهم .!

هل علشان شكلها حلو و الناس هتبص عليه طول الوقت ؟

و لا علشان العربية رخيصة فيتوكل على الله ؟

و لا علشان العربية حققت مبيعات عالية فالكل يشتريها و يطمئن على اعادة البيع و قطع الغيار ؟

و لا علشان ايه بالظبط ؟

**أحمد كمال** · 29-08-2009 04:39 AM

ثقافة القطيع

للأسف فيه ناس كتير بتجيب العربية لمجرد انها منتشرة

و لا بيشوفوها من جوة و لا من برة و لا بيروحوا معرض يتفرجوا عليها و لا بيعرفوا مواصفاتها و لا اوبشناتها الا طشاش

لمجرد انهم يعرفوا تلاتة اربعة تانيين جابوها و عاجباهم

و عشان كده عربيات زي فولفو حالها مش ماشي

و عربيات زي فيرنا ماشية زي اللوز

**ezzatfox** · 29-08-2009 04:56 AM

انا رأيى ان المستهلك المصرى ثقافتة محدودة فى السيارات ، عشان كدة الغالبية العظمى حوالى 75% بيختاروا على اساس :
1-تحديد السيارات الاكثر انتشارا فى حدود ميزانيتة
2- يسأل ميكانيكى او اى حد على العربيات اللى اختارها ( و غالبا اللى سألة برضة مش فاهم )
3- يشوف اية الشكل اللى عاجبة
4- و طبعا الكماليات اللى بتزغلل العين فى عربيات لا تساوى قيمتها ( مثل بعض انواع الصينى )

و النسبة الباقية هى اللى بتقارن و تحاول تعرف كل حاجة قبل ما تشترى و دول موجودين فى منتدى نايل موتورز

**som3aa** · 29-08-2009 05:01 AM

كل عربية و ظروفها
الفرنا و اللانوس بسبب سعرهم , عربيات كويسة صحيح بيظهر فيهم عند بعض الناس عيوب تقفيل بس بالمقارنة للسعر مفيش غيرهم و كويسين , اكيد كل واحد فينا يعرف حد عنده لانوس او فرنا و بقالها كتير معاه و كويسة.
اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
الكيا السيراتو الجديدة انتشرت علشان شكلها حلو اوى و سعرها مناسب جدا لفئات كتير و سعرها قليل اوى اساسا بالنسبة للامكانيات بتاعتها و شكلها رهيييب و عليها ضمان 5 سنين فتلاقى عليها حجز بالشهور.
الالنترا انتشرت علشان عربية كويسة و سعرها مناسب جدا و سمعتها كويسة و شكلها حلو و خصوصا اول ما نزلت مكنش فى عربية بالسعر دا بالحلاوة دى
اللانسر اعتمادية + قطع غيارها عند البقال زى ما بيقولو و رخيصة فى قطع الغيار + شكلها كويس من بره و جوه + سياسة القطيع عند البعض يقولك دى يابانى مش هيرجع تانى و الكورى كوخ وحش , الكوريين دول ناس كوخ وحشين و قصيرين اما اليابانيين ناس حلويين و فاهمين.

بس هى دى العربيات المنتشرة اوى فى مصر
غير كدا فى الفئات العالية مرسيدس و bmw علشان ملهمش منافس فى مصر لان لهم مصنع تجميع
فى الفئة فوق ال200 الف , مفيش غير الpassat عربية شكلها رهيييب و فيها امكانيات رهيبة اخر فئة.
بين 150-200 مفيش غير الجيتا و الاوكتافيا و ممكن نقول شوية سوناتا

العربيات اللى بتنزل مصر قليلة بسبب الضرايب و الجمارك + لازم تكون تحت ال1600cc فالمنافسة محسومة
مركة زى فولفو انا شايف العربيات شكلها وحش و سعرها مبالغ فى جدااا , زى مثلا S-40 ب 200 الف مانيوال , طيب ليه الهبل دا , فى احسن منها فى كل حاجة اساسا و ارخص كمان , دانا افضل السيراتو عليها بكتير جدا فى كل حاجة.

عموما علشان تبقى عارف الشكل عنصر مهم جدااااا عند المصريين ماعدا فى العربيات اللى اقل من 70 الف , يعنى ممكن واحد يشترى عربية علشان شكلها حلو بس بغض النظر عن الكفائة.

**amr.elsayed** · 29-08-2009 05:02 AM

اكتر حاجة بتحكم موضوع شراء سيارة جديدة هو الامكانيات المادية
المتاحة وكل ما الامكانيات المادية قلت كل ما شريحة الناس كترت
يعنى ما ينفعش عربية بــ 150000 الف نقارن انتشارها بعربية
تمنها 60000 الف طبعا دى حتنتشر اكتر ودة راجع للحالة الاقتصادية
لمعظم افراد الشعب .
*وفى ناس بتشترى عربية بمجرد انها انتشرت ودة شيء طبيعى اومال
هى انتشرت ليه اكيد مش عشان وحشة ( سياسة القطيع )
*وفى ناس بتبحث وبتقرأ وبتروح تتفرج على عربيات وتعمل مقارنات
بينهم فى حدود الامكانيات المتاحة لدى المشترى وبتحدد هى عايزة ايه
من العربية وحتستخدمها فى ايه وتستخير ربنا وبتتوكل على الله بس
* بس لازم نتفق على حاجة ان مش معنى ان عربية سعرها رخيص
ومنتشرة يبقى دى سياسة قطيع وخلاص لا ممكن تكون عربية
كويسة وبتخدم شريحة كبيرة من المستهلكين وانتشارها وسعرها القليل
ما يعتبروش عيوب دى مزايا .
وكل سنه وانتم طيبين ورمضان كريم
وشكرا يا باشا على الموضوع الجرئ

**ابوهاشم** · 29-08-2009 05:04 AM

السعر اولا
خصوصا ان معظمها سيارات فى سعر 60000جنيه كاش
واغلب اللى اشتروهم بالتقسيط يادوب
فى نفس الوقت اللى بنفس السعر ده تشترى جولف استعمال
موديل 98 مع الفرق طبعا ان اللى بيشترى قسط لازم يشترى زيرو
علشان شروط الضمانات
لكن لو رجعنا للافضل انا لو معايا المبلغ كاش
اشترى جولف او تويوتا استعمال افضل من الماركات اللى كلها مشاكل
والاسم انها زيرو بس ياترى هتعمر كام سنه

**amr.elsayed** · 29-08-2009 05:07 AM

المشاركة الأصلية كتبت بواسطة som3aa

اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
.

انا لا اتفق مع حضرتك والكلام اللى حضرتك بتقوله ليس له اى علاقة بالصح
وبلاش موضوع القفى دة علشان لو اعدنا نشوف الحاجات اللى بننضرب فيها
على افانا مش حنخلص كلنا
وكل سنة وانت طيب ورمضان كريم

**amr.elsayed** · 29-08-2009 05:25 AM

المشاركة الأصلية كتبت بواسطة som3aa

اللوجان انا شايف انها منتشرتش و لا هتنتشر لان التوكيل ضرب الناس على قفاها جامد لانه نزل العربية منغير جمرك و ضرب فرق الجمرك فى جيبه.
.

عشان محدش ينضرب علىافاه وهو بيشترى اللوجان دى اسعار اللوجان فى المغرب
سعر لوجان "مانوال" من دون أي كماليات يبلغ 9291 دولاراً أمريكياً

والطراز الثاني 10853دولاراً.

الطراز الثالث "فول أوبشن" بسعر قدره 12369 دولاراً.

احسب واولى ايه رأيك

**Lion_Heart** · 29-08-2009 06:03 AM

الانتشار و توفر قطع الغيار و سهولة الصيانة و سعر اعادة البيع

الموضوع: عـلـى أى اسـاس يقوم المواطن المصرى بشراء سيارته الجديدة ؟؟

LinkBack

أدوات الموضوع

عرض

-

-

-

-

-

-

-

المواضيع المتشابهه

حلف الناتو vs المواطن المصرى

ياسلام على المواطن المصرى...حوار

اغرائات فى صالح المواطن المصرى

هل هذا عدل أن يقوم البورسعيدى بشراء السيارة بنصف تمن ما يدفعه باقى المصريين !!

الكلمات الدلالية لهذا الموضوع

المفضلات

المفضلات

ضوابط المشاركة