اولا كل سنة و انتوا طيبين
امبارح عملت صيانة الالف لعربيتي ( جيتز 2010 ) في غبور ابو رواش و كانت لي الملاحظات التالية :

- المكان نظيف و رايق و ده لاني رحت الفترة المسائية ( كان رقمي 24 في الحجز بدل 116 في الفترة الصباحية ) بس اللي غلس علينا انهم كانوا بيصوروا اعلان في المعرض تخيلوا عاملين ايه ؟
قافلين النور و التكييف في الكافتريا اللي مفروض تبقى استراحة للعملاء و الانقح من كده المخرج كل شوية يقول الصوت ياللي فوق و في الاخر طلع لنا واحد يقف علينا زي المدرس يقولنا ممنوع الكلام

- بالنسبة للسنتر فيه حاجة غايظاني جدا هي انه اول ما بتحرك بالعربية كل الابواب تقفل لوحدها بصوت يخض ولما قلت للمهندس قلي مش حقدر اعملك حاجة ده اوبشن السنتر هو معمول كده عشان ال safety و لقيت كذا عميل مضايقين من الموضوع ده
يعني كل ماتقف و عاوز تنزل تفتح الباب و بعد كده يتسك تاني ( حاجة مملة جدا ) خصوصا ان قفل الجيتز تقيل شوية

- بالنسبة للانذار في عيب خطير و هو ان لو حد فتح الشنطة ما يشتغلش الا لو الشنطة اتقفلت يعني ممكن حرامي ابن حلال يدخل العربية من الشنطة ويتوكل على الله

- كان في هناك واحد معاه فيرنا بيشتكي من الكاسيت وعامل خناقة كبيرة يمكن معاه حق بس بصراحة اسلوبه مستفز جدا وداخل كأنه في حرب مبدأها : اللي يعلي الصوت هو اللي ينول

في النهاية ربنا يتوب علينا من عيوب غبور تصدقوا ان الجيتز كلها تقفيل كوري ما عدا السنتر و السي دي بيتركبوا هنا
يعني الحاجة الوحيدة ال حطوا ايديهم فيها خربانة
مش كفاية الاوبشن الي شايلينها من العربية

كان هناك واحد سعودي معاه سوناتا قال لي كلمة ضايقتني مع انها بنسبة كبيرة صحيحة : ارخص عربيات في العالم بتتجمع في مصر بكفاءة قليلة جدا و تتباع للمواطن الغلبان بأغلى سعر في العالم