الموضوع: هو الخداع و النصب وصل للدرجة دى؟؟

أمبارح برضه جوه الجامع وبعد صلاة العصر مباشرة ، واحد بسرعة أتكلم بصوت عالى وقال أنه مريض بالسكر ومحتاج حقنة أنسولين بــ 31 جنيه وموجهاً كلامه للإمام وطبعاً مفيش مانع من شوية دموع ( على فكرة نفس هذا الشخص عمل نفس الفيلم من شهر تقريباً وفى نفس الجامع والناس أعطته اللى فيه النصيب) ، رديت قلتله أنت ساكن فين ياحاج ، قال جنب منك فى نفس الحى ، قلتله طيب لو سمحت سيب عنوانك فى الجامع وأنا هاأودى الفلوس ليك لغاية البيت ، تحول هذا المتظاهر بالمسكنة إلى شرس وظهرت فى عينيه نظرات الغباوة والشراسة وقال لأ طيب ماتدينى الفلوس دلوقتى وأنا أجيب الحقنة بمعرفتى ، وأيه المانع يعنى؟
قلتله لأ الجامع لازم يروح يسأل عليك (زى بحث أجتماعى يعنى) وممكن يعملك إعانة شهرية بدل ماتيجى أنت كل شهر ، ونغنيك عن زل السؤال إذا كنت صادق ، طبعاً ماعجبوش الكلام ومرديش يدينا العنوان ، وأنصرف بسرعة
خرجت وراه علشان أعرفه هل من المنطقة أم لا ولكنه فص ملح وداب فى ثانية واحدة
الحركة دى بتتعمل تقريباً فى معظم المساجد بأشكال وقصص مختلفة ، ولكنى أعتقد أن هذا التصرف هوه أحسن حاجة لكشف أى نصاب ، مش كده ولا أيه ؟