الموضوع: مشربتش من نيلها ولا جربت اغنيلها بس بحبها

بعيد عن الشعارات اللي بيفرضوها علينا عشان نحب بلدنا وبعيد عن الناس اللي بتكره الواحد في البلد وتيئسه م حالها فانا لسة شايف ان لسة في اسباب كتير تخليني احبها ولاسباب كتير اوي بس بما اني في موقع مخصوص بالعربيات فهقول موقفين حصلولي بالعربية الموقف الاول قديم حبة كان م شهرين تقريبا كان في شهر سبعة وفي عز الحر وانا كنت راجع من المستشفي وشهر سبعة دة طبعا كان نار علينا كلنا وعذاب والطريق كان واقف وموت وبما ان عربيتي بتسخن والعزل فيها كان زي الزفت كنت جوة العربية حران عن الناس اللي ماشية برة في الشمس وفعز كل دة والشمس الحارقة لقيت شاب واقف جايب زي تورموس كبير وفية ماية سقعة وواقف علي جمب الطريق كل العربيات المعدية بيكون مالي كباية مية ويعرض علي اللي سايق يشرب وطبعا الناس معظمها كانت بتاخد لان الجو كان حارق وطبعا بيعمل دة من غير مقابل حتي اللي بيحاول يديله فلوس بيرفض فموقف زي دة شاب وفي عز الحر ويجيب مية ويشيلها ويقف بيها علي الطريق بس عشان يشرب الناس ومش عايز من كدة غير الثواب معتقدش دي عمرها تحصل في اي حتة في العالم غير مصر المقف التاني بقي انا كنت من اسبوعين كدة رخصي ضاعت وقعو من جيبي رخصة القيادة والعربية موقف منيل بنيلة يعني وسئلت كل اصحابي كله قالي ياه هتدوخ ياه دة مووال ياه دة انت يومك منيل بنيلة وبعدين بعدها بيومين لقيت واحد صحبي بيتصل بية بيقولي انت ضايع منك حاجة قلتله اه الرخص قاللي تعالي عند السجل المدني في واحد لقاهالك والراجل دة كان لقاها يوم موقعت مني فسئل سوبر ماركت في المنطقة عن اسم صاحب الرخصة معرفش فمشي وراح عالمورور يقولهم في رخصة فعسكري هناك قاله لازم محضر وبتاع عشان لتكون سارقها وعملت بيهم مصيبة وجاي تديهم لصاحبهم وتمشي فخاف من الموضوع دة ومشي وفي جمبه هناك السجل الضريبي فدخل يسئل هناك عن الرخص دي صاحبها ليه سجل ضريبي يب عنوانه اية برده معرفش فمخه هداه انه يروح السجل المدني وبما اني اسمي موجود في الرخصة هيقولهم الاسم ويطلب منهم العنوان اللي متسجل في بطاقة صاحب الاسم دة وبما ان البلد عندنا بطيقة في اجرائتها والراجل بقاله يومين عمال يدور ودايخ وبرده موقفينه في صف طويل عريض قام مزعق وقال ياجماعة انا عايز اعر بس عنوان حد وهمشي مش هخلص ورق ولا حاجة عشان عندي شغل والحمد لله كان في واحد من اللي واقفين صاحبي وهوة اللي سئله فيه اية وقاله انها رخصة بتاعة حد ضايعة وقام صاحبي مكلمني وجيت طبعا حظي حلو اوي بس فعلا موقف زي دة معتقدش في اي بلد تانية كان ممكن يبقي في راجل يعطل نفسه العطلة دي كلها وكل غرضه اه يدي حاجة لصاحبها بدون اي مقابل فانا بقي بحبها من غير لا اشرب من نيلها ولا اغنيلها

كلنا بنحب مصر ... ممكن تختلف درجات الحب دي من واحد للتاني ... حتى اللي مش عاجباه المواقف دي أو مش حاسس هيا أد أيه جميله ومؤثره وحلوه وبتدينا أمل أننا نكون أحسن ونقف جنب بعض ونحب بعض ... برضه بيحب مصر ... ولازم نعرف أن الخير والشر في كل مكان موجود .. لكن مافيش حاجه أسمها ( البلد كلها وحشه وزفت ) لأنها لو كانت كده أبسط حاجه ماكنتش حضرتك هتقدر تكتب الكلام ده دلوقت ... وماكنتش هتشوف المواقف دي بتحصل ..ز لكن البلد كويسه جداااااا وبخير وصدقوني والله العظيم والله العظيم أنا عايش في السعوديه بشتغل بقالي 3 سنين مش عايز أقولكم أن بلدنا أحسن 100 مره من بلاد تانيه كتير أنا هنا بشتغل مديرا للمكاتب الأماميه في أحد الفنادق بالمدينة المنوره ( جنب الرسول عليه الصلاة والسلام ) وأقسم بالله أتنصب عليا وأتخدت فلوسي من المكان اللي كنت بشتغل فيه الأول ولا قدرت أفتح بقي لأن لو كنت أخدت أي خطوه كان الظلم هيبقى أكثر قسوه ... لكن أحتسبت الأجر عند الله وقولت حسبي الله ونعم الوكيل لأني فعلا ماقدرتش أعمل حاجه ... كنت عاجز تماما عن أخد حقي مش أنا أتكلت على الله وبس ولم أسعى لأخذ حقي لكن ماكانش في أيدي حاجه أعملها ... وساعتها قعد معايا واحد صاحبي وقاللي : بس عشان تعرف أن من خرج من داره أتقل مقداره ... وماكانتش مصر عاجبانا أديك جيت ياأخويا وشوفت الخير كله .. وقاللي أن أحنا بقينا في زمن مايعلم بيه الا ربنا بقت فيه بلاد الكفره أحسن من بلد الرسول عليه الصلاة والسلام ... بس عشان ماحدش يفتكر أن مصر هيا اللي فيها البلاوي كلها وبقيت البلاد ملائكه ... لا ياحضرات بلدنا أحسن والله من مليون بلد تانيه لو بصينا لها كده ... وكل واحد حاول يعمل الصح بعيدا عن أن غيره بيغلط .. إن شاء الله حالها هينصلح وهتبقى أحسن من كده بكتير بيا وبيكوا وبناس زي أصحاب الموقفين اللي مذكورين فوق . وأسف للإطاله