ارجو المساعدة من خبراء المنتدي بالنسبة لدايو ليجانزا

**damasry** · 01-09-2009 01:38 AM

السلام عليكم

رمضان كريم عليكم

انا بفكر اجيب ليجانزا بس كنت عايز اعرف معلومات عنها، عن مواصفاتها واذا كان فيه مشاكل شهيرة في موتورها او الفتيس الاوتو او العفشة،....... وقطع غيارها اسعارها عاملة ايه وتوافرها من عدمه، يعني كل اللي تقدروا تفيدوني بيه عنها.

وشكرا لردودكم مقدما.

**damasry** · 01-09-2009 02:00 AM

ياريت خبراء المنتدي يردوا عليا.
فينك يا باشمهندس سمير و يا محمد بيه.

**samirayad** · 01-09-2009 02:14 AM

هى عربيه حلوه
بس طبعا أستهلاكها فى البنزين عالى عن النوبيرا مثلا
ولا أفضل لك شراء سياره أستعمال بفتيس أوتو
بالأضافه الى أن قطع غيارها قليله شويه مقارنة بالنوبيرا
وعنصر أنتشار السياره عامل مهم عند الشراء

**damasry** · 01-09-2009 02:24 AM

المشاركة الأصلية كتبت بواسطة samirayad

هى عربيه حلوه
بس طبعا أستهلاكها فى البنزين عالى عن النوبيرا مثلا
ولا أفضل لك شراء سياره أستعمال بفتيس أوتو
بالأضافه الى أن قطع غيارها قليله شويه مقارنة بالنوبيرا
وعنصر أنتشار السياره عامل مهم عند الشراء

شكرا يا باشمهندس سمير للرد السريع
مش ها يفرق معايا الاستهلاك اوي.
بس كنت عايز اعرف هل فيه مشاكل معروفة للعربية دي؟ زي مثلا مشاكل الفتيس الاوتو في النوبيرا.
وكده كده انا عا اكشف في التوكيل علي السيارة قيل الشراء، بالمناسبة هو ممكن اوصل السيارة علي الكومبيوتر وهو يقرأ اذا كان فيه مشاكل فيها ولا لأ؟

**damasry** · 01-09-2009 03:02 AM

المشاركة الأصلية كتبت بواسطة zocor742

هو حضرتك الكمبيوتر بيكشف على حالة الحساسات والرشاشات وان كان فى عطل فيهم هيسجل
وبالمرة كمان تقيس كبس الماتور وتكشف على العربية كويسوصاجها
والسيور والفلاتر والكلام دةبتعمل صيانة فية

شكرا يا باشا علي ردك، بس انا كنت عايز اعرف اذا كان فيه مشاكل فيها خصوصا الفتيس عشان انا قريت علي النت ان الفتيس الاتو الاربع غيارات كان فيه مشاكل وهما بره غيروه بواحد خمس غيارات وانا مش عارف اللي بينزل هنا انهي واحد فيهم.

**samirayad** · 24-09-2009 07:09 PM

يا با شمهندس سمير حكاية أوتو مستعمل ديه مش دقيقه بالعكس انا مش شايف أنها مشكله أنا مش بدافع عن الأوتو بس فعلا الأوتو بيريح الموتور وبيخليه يعيش فتره أطول لأنه ما بيحرقش فى الغيارات

بالعكس ياباشا
فى نظرى كل اللى بيبيع أوتو مستعمل بيبقى بغرض التخلص من عيب فى الفتيس بالذات
وبالذات الجماعه الشباب اللى بيعملوا بالأوتو
كيك داون وخلافه

وسامحنى ما بردو المانيوال ليه مشاكل ديسك وأسطونه وبليه وقاعدة فتيس ورجلاش عصا فتيس وواير وبكم دبرياج

بس متنساش أنى لما أركب مانيوال بحس أن راكب عربيه
وبأصاحبها طول ما أنا ماشى على الطريق
أما الأوتو
تحس أنك راكب عربية ملاهى
بتجرى وخلاص

وعلى فكره لما كنت فى السعوديه سامحنى أنى أقولك أن المانيول كان هناك عامل زى التلفزيون الأبيض وأسود والناس هناك تقريبا نسيته و90 % من العربيات الزيرو أتوماتيك ،

الجماعه بتوع السعوديه
كانوا نايمين
قاموا من النوم الصبح
لقوا نفسهم قاعدين على بير دهب
هما وبتوع الخليج
ومتفرقش معاهم تمن أى عربيه
أنا جوز أختى مدرس فى الدمام ومعاه أولاده
ومعاه مرسيدس ب10 آلاف ريال
يبقى مينفعش نشبه المانيوال بالتليفزيون الأبيض والأسود
والأوتو بالألوان مثلا

ممكن نشبه الأوتو بالساعه الحجر بتاعة الصين
لما بتبوظ بنرميها
أما المانيوال
ممكن نشبهه بالساعه الأصيله
اللى بنملاها كل يوم
وعمرها مابتقول
فات الميعاد ..........على رأى الست

ياريت ننسى عقدة الفتيس الأتوماتيك انه بيسبب مشاكل ياريت ما ندفنش رأسنا فى الرمل بأسطونة الأتوماتيك كله مشاكل

ياريت مننساش الأصل
زى أغانى الست .......ونمشى وراء أغانى شعبوله وريكو

تحياتى لك ياهندسه