-
تجربة عمل , خبره وموعظه
بسم الله الرحمن الرحيم
والصلاة والسلام على أشرف الانبياء والمرسلين
سيدنا ونبينا محمد عليه أفضل الصلاة وأتم التسليم
أما بعد :
في البدايه أحب اهنئكم بالشهر الكريم أعاده الله عليكم بالخير واليمن والبركات
في الاجازه الدراسيه في السنه دي الحمد لله ربنا رزقني بعمل وكنت مبسوط بيه اوي
وكتبت عنو هنا في المنتدى وده رابط الموضوع
http://www.nilemotors.net/Nile/88442-a.html
طبعا انا كنت مبسوط جداااا بالشغل ده وحمدت ربنا كتير اوي عليه
واستمريت في الشغل فتره قليله لكن اخدت خبره كبيره جدا وقدرت افهم الدنيا ماشيه ازاي
في سوق العمل وصاحب العمل بيفكر ازاي اتجاه أمواله واتجاه العاملين معه او عنده
طبعا يومي كان كالتالي ومحدش يستغرب من يومي الطويل اوي
1- الساعه 9 الصبح افتح المكتبه
2- ابدأ بتنظيم البضاعه اللي موجوده ومرميه في الارض وانضف المكان اللي انا مسؤول عنو
3- اثناء التنظيم والتنظيف بتابع الناس اللي داخله واللي خارجه واشوف عاوزين ايه
4- ابدأ اشوف شغلي بروقان مع الناس بعد ساعتين تقريبا او ساعه ونصف من توضيب المكان
5- بمشي على الساعه 11 بليل او اكثر استحاله انها تكون قبل كدا
6- اروح البيت اريح شويه واظبط نفسي وبعد كدا انام عشان اقدر اصحى تاني يوم اعمل اللي قلت عليه سابقا
طبعا في خلال ما اكون خلصت توضيب المحل بيكون زميلي في الشغل جه وبيبدأ يشتغل عالجاهز
لحد ما لقيت انو استحلى الموضوع اوي وفي يوم اجازتي بيبهدل الدنيا في مكان مسؤوليتي وبينعدم النظام والنظافه ومش بيساعد في النظام تماما والدنيا بتبقى مكركبه عندي
بعد كدا اهتميت بس بمكاني وبقيت بوضبو ومليش دعوه بالباقي
لحد ما جه رمضان ومواعيد رمضان متعبه جداااا
ببدأ يومي بردو الساعه 9 الصبح بعمل اللي قلت عليه قبل كدا وقبل الفطار بروح افطر واريح شويه وبرجع الشغل بعد العشاء واروح الساعه 12 او 1 او اكثر
ومستحمل طبيعة الشغل ( انا اللي جنيت على نفسي )
دا غير بقى التعامل مع الناس طول اليوم والكلام معاهم وبشوف طلباتهم
منهم الكويس ومنهم الوحش والغلبان واللي شايف نفسو واللي في مركز مرموق يعني تشكيله من الناس بتعامل معاها كل يوم كل يوم بلا كلل او ملل
دا غير الناس الرخمه اللي تدخل تفضل تقول وريني وريني وميشتروش حاجه
ولازم الواحد يبقى في حاله مزاجيه كويسه
الأهم من ده كلو التعامل مع صاحب العمل واتعلمت ازاي اعامله بالسياسه بحيث لا صوتو يعلى ولا يتكلم كتير بس الظاهر ان الطريقه دي طلعت غلط ولا ايه !!!
الايام الاخيره دي كنت بتأخر شويه ساعه او اتنين ( غصب عني ) واحد بيرجع مطحون في الشغل بكل ما في الكلمه من معنى وبينام زي القتيل وبيصحى بالعافيه
انا كنت بتسحر بدري عشان اقدر انام شويه كويسين
لكن فين التقدير وسط ده كلو !! (لايوجد)
النهارده رحت متأخر كام ساعه عن ميعادي واعدت اشتغل لحد ماجه صاحب الشغل
وقال الاتي : انت جاي الساعه كام النهارده ؟
وكانت الاجابه الساعه واحده وكنت نايم
راح قايل طيب ان بقالك كام يوم بتتأخر والنهارده اخر يوم ليك
رحت قايل النهارده ليه !! دلوقتي علطوووووول
( لاحظو انو قالي في بداية شغلي تعالى بكره وانا قلتلو انا هشتغل دلوقتي وانا ماشي قلتلو همشي دلوقتي بردو ) مش فارقه بصراحه علشان مفيش تقدير
المهم انو كان عاوز يتكلم ويعلي صوتو رحت مشاورلو بايدي اسكت
وقلت هات حسابي لو سمحت واخدت حسابي ورحت ماشي
والموقف كان مستفز جداااااا
انا خرجت ومتنرفز جوه مني ومش باين عليا
ورحت راجع قايل انا مش محتاج شغلك وعلى فكره انت كدا ظالمني وحسبي الله ونعم الوكيل
وراح يفتحلي الباب عشان امشي ( بيطردني ) رحت ماشي
وخلصت قصة اول شغل في حياتي
خلصت بسرعه جدااا مش كدا
بس انا كنت مستني انو يعمل كدا عشان انا قلت في يوم من الايام كلمة حق
لما حصلت مشكله بينو وبين واحد صاحبي كان بيشتغل بردو
انا كنت ناوي اسيب الشغل يوم السبت
وكنت اخدت يومين اجازه كنت عيان فيهم كنت هشتغلهم عشان ميكونش عمل جميله فيا واداني اجازه مرضي ويديني فلوسهم
اتعلمت انا ايه بقى من الشغل دا ؟؟
انا اتعلمت حاجات كتير اوي اكتر من الفلوس ومتسواش حاجه ادام الفلوس اصلا
1- الامان والثقه اللي انا مش بديه لحد اصلا مينفعش اي شخص اآمن ليه او اثق فيه غير اهل بيتي فقط
2- اكتسبت خبره كبيره جدااااا من التعامل مع الناس ومفيش الا واحد مشي من ادامي مشي زعلان وكمان هو اللي غلطان ( زبون رخم جدااااا ) غير كدا اي حد يا مشي زي ما دخل عليا يا اما مشي مبتسم وبيضحك كمان
3- اتعلمت مديش مجهودي لحد ابدااااا ولا اعمل خير في واحد هينكر الخير ده ومش هيعترف بيه ( صاحب العمل وزميلي في الشغل )
4- كنت براقب صاحب العمل في تصرفاتو مع الناس العاديه والمهمه وعرفت ازاي اقدر انتهز الفرصه واعمل شغل من الفرصه دي
5- اتعلمت ازاي اصاحب الوحش قبل الكويس ومخليهوش يأثر فيا
6-اتعلمت اخد على الشخص اللي ادامي بسرعه رهيبه جداااا بمجرد ابتسامه او كلمه هزار او موضوع طويل حتى
7- اتعلمت ازاي اقدر اخد معلومات من ناس حواليا واخد منهم نصيحه تفيدني في التعامل مع صاحب العمل او زملائي في العمل
8- اتعلمت اقدر ازاي احافظ على اعصابي واتمسك بهدوئي مهما كانت المشكله
9- اتعلمت اسمع ومتكلمس كتير
10 - اتعلمت ان البني ادم الطيب يخبي الطيبه دي جواه وميبينهاش للناس
وممكن اقول اتعلمت كذا حاجه لحد 100 في الكام يوم دول في العمل
طيب انا بسأل نفسي سؤال هو انا صاحب حق وفعلا انا مظلوم ؟!!
والاجابه لازم تكون اه
انا اتظلمت في الفلوس والنقطه دي مش مهمه بالنسبالي خالص انا كنت رايح عشان اشتغل حتى لو من غير مقابل ( كنت عبيط ) بس الخبره بالنسبالي تغني عن الفلوس والدليل اني طلعت 5 مشاوير بالعربيه بتاعت الراجل اخدت فيهم خبره ومتحاسبتش عليهم ( مش مهم بردو ) انا اخدت خبره في السواقه مش هتحصلي قبل شهر ونص او شهرين تكون عربيتي موجوده ان شاء الله
انا محدش قالي كلمة شكرا واللي ميعرفش اد ايه كلمة شكرا ديه مهمه اوي لانسان بذل مجهود ولو بسيط يقول كلمة شكرا او جزاك الله خيرا مثلا لواحد ساعدو مساعده بسيطه واظن انو هيكون فرحان بيها اوي ( اللي اتقالو شكرا ) وانا بحب اقول شكرا للي بيساعدني واحب انها تتقالي لكن مش هفرض على الناس حاجه انا عاوزها
في حاجه كمان انا عاوز اعترف بيها
انا غلطت في حق نفسي وقصرت في دراستي
عشان كدا انا استاهل ودا عقاب من ربنا سبحانه وتعالى
وبيوجهلي رساله ان دراستي هي الاهم من اي شئ وهي اللي هتخليني في مركز مرموق
يخلي اي بني ادم يحترم شخصي
رسالتي لكل واحد مقصر في حق نفسو وفي دراستو خلي بالك على نفسك
قبل ما اختم عاوز اقول اني مش زعلان خالص
لا انا مفيش حاجه بتزعلني نهائي ( مش هضر نفسي )
انا مبسوط بالخبره وبالرساله اللي ربنا سبحانه وتعالى بعتهالي عن طريق تجربه
متغاظ من حاجه واحده
كان نفسي افرح بأول مرتب كدا واطير من الفرحه لكن مفيش نصيب
في النهايه انا احتسبت اللي حصل عند ربنا سبحانه وتعالى
وقلت حسبي الله ونعم الوكيل ودعيت على الراجل كمان ( مظلوم بقى )
الموضوع ده مجرد افاده للناس هنا في المنتدى
مع تجربة بداية عمل والانتهاء منه
ادعو الله العزيز القدير ان اكون افدت الناس هنا بتجربتي
وان كل واحد يتعظ من تجربتي ومن كل كلمه قلتها
-
بص ياباشا انت انسان كويس والله وعملت اللى عليك وزيادة بس انت من جواك كويس وحد طيب واتعاملت بما يرضى الله وده ميخلكش تغير تعاملك مع الناس وتبقى وحش لا بالعكس خليك احسن وكويس مع اهل بيتك ومع الغريب
وعلى فكرة خلص دراستك الاول وبعد كده ربنا هيوفقك فى الشغل وهتبقى فاضى للشغل لحد ما ربنا يكرمك ويوفقك فى حياتك
-
والله هو الخسران انت انسان محترم واكيد اكتر من مكان يتمنى تشتغل عنده
-
ربنا هيعوضك خير ان شاء الله
-
حصل خير و عسى أ، تكرهوا شيئا و هو خير لكم
ربنا يوفقك و يهديلك شغل جديد و أحسن منه
-
يااااااااااااااااااه , و لا تزعل نفسك , ده الواحد ياما اتظلم و اتظلم و اتظلم .
بس هقولك على حاجة , انت لما بتتظلم فانت بتتظلم من الناس مش من ربنا .
و اقولك حاجة تانية ( افررررررررررررح ) اه والله افرح مش تزعل .
عارف ليه ؟؟ علشان ربنا اللى هيعوضك مش البنى ادم ده .
-
شكرا يا جماعه على ردودكم الجميله والمشجعه
انا مش هتغير هفضل زي ما انا والموضوع دا مش هيكون سبب اني اتغير للاسوء لا خالص
بالعكس انا متمسك بأخلاقي وعارف اني كويس واتعاملت في حدود مسؤوليتي لا اذيت ولا عملت غلط
بالعكس تماما وربنا سبحانه وتعالى عارف كدا
وانا واثق ان ربي مش بيرد دعوة مظلوم ابدااا
وربنا سبحانه وتعالى هيعوضني خير ان شاء الله وانا واثق من كدا زي بالظبط ما خلاني اروح اشتغل في المكان ده
وبخصوص اني استنى لما اخلص دراسه واشتغل فمش هينفع خالص
هيكون فاتني كتير اوي من حياتي اذا استنيت اما اخلص دراسه
ربنا يكرمني ان شاء الله بشغل بليل
بحيث اني اقدر انسق بين شغل ودراسه
دعواتكو معايا
-
ربنا يوفقك ويرشدك الى ما فيه الخير
Content Relevant URLs by
vBSEO 3.6.0 PL2