قدر الله ماشاء فعلالسلام عليكم
أنا معايا أفيو 2009 كوري فول أوبشن عاملة 3000 كيلو بس. مشكلة الـ rpm ظهرت عندي من يومين واللي حصل إن المؤشر زاد لوحده أول ما دورت العربية ووصل لحد 3 وصوت الموتور كان عالي أوي. طبعاً ركنتها لحد ماخد أجازة وأروح التوكيل والمفاجأة إن اليوم التاني بالليل المشكلة اختفت والـ rpm رجع طبيعي. بس لأني فقري ومنحوس قلت أروح التوكيل علشان أطمن على العربية وألحق المشكلة قبل ما تكبر.
قالولي هناك إنهم حينضفوا حاجة اسمها البوابة في الموتور. وبعد حوالي ساعتين ونص، استلمت العربية وللأسف لقيت صوت الموتور عالي شوية والعربية فيها رعشة خفيفة على السرعة الهادية، الغيار التاني، والسحب مش ناعم وسلس زي الأول خالص. كنت متخيل إني بيتهيألي لأني عندي انطباع وحش عن التوكيل، بس لليوم التاني على التوالي حاسس إن العربية غريبة عليا ومش بنفس الحالة اللي كانت عليها.وطول السكة حاسس إن العربية ماشية على زلط مش أسفلت، مش عارف انا غلطت أني روحت التوكيل؟؟ هل كنت أسيبها مادامت المشكلة اختفت لوحدها؟ مش عارف بصراحة.
المهم حجزت معاد تاني في التوكيل ورحت تاني علشان يبصوا عليها. المهندس قاللي العربية طبيعية ومافيهاش حاجة، وبعد إلحاح مني اعترف إت العربية فيها هزة خفيفة وفتح الكبوت وبعدين قاللي لا ده مش من الموتور ولا أي حاجة. يمكن فيه عندك حاجات بتتهز في الشنطة. وطبعا وريته إن الشنطة فاضية، وطبعاً قعد يقنعني إنها كده طبيعي والعربية تمام التمام. المشكلة إني أنا أكتر واحد ممكن يحس العيب ده لإني أنا اللي راكب العربية من 5 شهور ولما اختلف فيها شيء حسيت بيه على طول. أنا دلوقتي قرفان من العربية ومتضايق جداً. حد عنده أي نصيحة؟ هل لو حاولت أصلحها بره الضمان يتلغي؟ طيب همه حيعرفوا إزاي إني صلحتها بره علشان يلغوا الضمان؟ طيب هل أصلاً فيه حد حيعرف يصلحها كويس بره؟؟ وهل ممكن ترجع زي الأول أساسا؟؟
أرجو المساعدة والنصيحة.
حاول تروح بيها مقار
المهندسين الي هناك هما الي مصبرني على العربية الزبالة دي و ان شاء الله مشكلتك تتحل
المفضلات