سؤال بخصوص بطارية نيو اكسنت

**aladdino35** · 01-09-2009 10:03 PM

الاخوة الافاضل بالمنتدي كل عام وانتم بخير ورمضان كريم
انا خبرتي في السيارات زي خبرة رئيس الوزراء بتاعنا في ادارة البلد
العربية عاملة اقل من 3000 كيلو متر وتم شرائها في مايو اللي فات واطول مشوار كان الاسكندرية مطروح وكام يوم في مطروح والعودة
ندخل في الموضوع
النهاردة بنفتح العربية مرضيتش تفتح بالريموت وما فيش صوت خالص
فتحنا بالمفتاح لاقينا العربية مش راضية تشتغل وفيه لمبة انظار ان البطارية هي المشكلة
جمب البيت بتاع بطاريات ندهنا عليه قام قال البطارية عايزة شحن وقال ان احنا لازم نسينا حاجة شغالة وفعلا كان الانتظار شغال والفترة كانت من الساعة 11 صباحا الي 8 مساء ....فهل الانتظار الي نسناه شغال هو اللي عمل كده فعلا
اخينا اخد دقايق يشحن البطارية وبعدين لهف 10 جنيه بالرغم من انه جار البيت يعني جار واولي بالعشرة جنية
المهم العربية مشيت تمام ومراتي دلوقتي مع حماتي رايحين يشتروا حاجة وطبعا انا لسه مستني الاخبار علشان اشوف العربية حتعملها تاني والا ايه....علشان كده انا جيت علي هنا علي طول وقلت طبعا الحبايب مش حيبخلوا علينا بالنصيحة
ورمضان كريم

**ezzatfox** · 01-09-2009 10:08 PM

حصل معايا قبل كدة انى نسيت الانتظار شغال فترة اطول منك .. بس محصلش ان البطارية نامت
يمكن انت قبليها كنت مستهلك جزء كبير من طاقة البطارية و كملت بالانتظار فحصل اللى حصل
عامة استنى النهاردة و شوف بكرة هتعملها تانى و لا لا
لو عملتها تانى و اعتقد انة مش هيحصل تانى .. العيب هيبقى فى دائرة الشحن لان البطارية جديدة

**aladdino35** · 01-09-2009 10:46 PM

الف شكر علي الرد وربنا يكفيك مقالب العربيات
انا بصراحة قلت ازاي يعني يحصل اللي حصل ده من كام ساعة نسينا فيها الانتظار!!
طيب العيب لو في دائرة الشحن يقي ايه العمل؟
يا ريت الافادة وتكسبوا فينا ثواب في الشهر الكريم