عربيتى لانوس 97 مانيوال من فترة بدأت الاحظ صوت رنة او زنة سريعة فى اول كل غيار( بتختفى فقط لما بشبع الغيار يعنى ف اخر كل غيار أو لما ادوس دبرياش أو امور) مع ملاحظة ان الصوت كانه خارج الفتيس
هل مر احدكم من قبل بنفس المشكلة وهل ممكن زيت الفتيس يكون ناقص او يكون الشكمان بيلمس ف بطن العربية مع العلم ان غيارات الفتيس كلها ناعمة وسلسة
وشكرا مقدما على الردود
يا تري الزغرطه دي بتحس بيها في عصايا الفتيس ولا العصايا بيتبقي هاديه؟؟؟؟؟
يا تري و انت واقف بالعربيه و بتسخنها الصبح بتحس ان العربيه بتتحرك حركه بسيطه ولا لاء؟؟
قبل ما تفتح شغل في العربيه بص علي الشكمان الاول يمكن يكون افيز سايب.
لو كله سليم غير زيت الفتيس و شوف في ايه .
لو الصوت لسه موجود روح لميكانيكي لو قالك دي غزايش فتيس يبقي غير الفتيس ما تحاولش تصلحه علشان ما يتعبكش
الزغرطة دى على حد علمى بتبقى من الموتور مش من الفتيس بس انت بتحس انها من الفتيس, اعتقد ان العربية عندك واخدة كهرباء زيادة وزمان فى العربية الكاربراتير كنا بنظبط الاسبراتير ولكن طبعا فى الانجشكشن معرفش ايه نظامه.
احتمال تانى لو كنت غيرت سير كاتينة من قريب انك هتحتاج تظبطه لأنه ممكن ميكونش مظبوط, طالما الفتيس ناعم وسلس اياك تيجى جمبه ولو حتى بتغيير الزيت , انا غلطت الغلطة دى وللاسف الفتيس تقل عن الاول بعد ما غيرت الزيت.
-العصاية هاديةاقتباس:
المشاركة الأصلية كتبت بواسطة hazem_khidr
-العربية ثابتة
-مغيرتش سير الكاتينةاقتباس:
المشاركة الأصلية كتبت بواسطة Abdallah
الحقيقة مش قادر افتى لان انا مشمعتش الصوت... ممكن تبعتلنا تسجيل صغير للصوت اللى بتشتكى منه؟
MMamdouh
انا متشكر اوى لاهتمامكم وهحاول اسجل الصوت
انا مرة كنت فاتح الكبوت بالليل وشوفت ان فى شرز بيحصل فى نهاية سلك البوجيه والبوجيه رقم واحد/ وبيحصل ما بين صاجة الفرن والغلاف الالومنيوم بتاع البوجيه رقم تلاتة
ياترى ممكن اربط بين الظاهرة دى و رد الاخ الفاضل "عبدالله" ان الكهربا مش مضبوطة وهى السبب ف الزغرطة او الزنة الى بتحصل دى
وهل الشرز ده سببه ان طقم سلوك البوجيهات عمره الافتراضى انتهى ولازم اغيره ولا السبب ان فى افيز بيمسك السلوك مش موجود والسلوك بتتهز
سؤال اخير المفروض لما اخلع سلك بوجيه امسكه منين ثم اشد لبره من الجزء الكاوتش ولا من الغلاف الالومنيوم
واسف لانى اثقلت عليكم اوى
الشرارة معناها تهريب كهرباء من الكابلات... اما السلك مش راكب كويس او انه تعب... هى الكابلات عاملة كام الف؟؟
لما تفك الكابل امسكة من الكاوتش مش من السلك و خللى بالك الغلاف الالومنيوم ممكن يكون سخن و يحرق ايدك
MMamdouh
السلوك كلها راكبة كويس وعاملة (130) الف كم
هل تنصح بتغيير طقم سلوك البوجيهات
وشكرا للرد
على فكرة ممكن يكون الصوت ده من علبة الشكمان اللى تحت الفتيس (علبة البيئة) لأن الموضوع ده حصل مع واحد صاحبى قبل كده يعنى ممكن تكون الشرائح المعدنية لحاماتها فكت و بالتالى تلاقى صوت زنة
جرب افتح الكابوت و العربية دايرة فى حتة ضلمة كحل... لو لاقيت الشرارة بتنط من سلك او اكتر يبقى السلوك تعبت و عايزة تتغيراقتباس:
المشاركة الأصلية كتبت بواسطة mohsen
MMamdouh
او ممكن علبة الشكمان اللى فى النص... بس طبعا انا مش عارف عشان مسمعتش الصوتاقتباس:
المشاركة الأصلية كتبت بواسطة sherif80
MMamdouh
انا قصدى فعلا العلبة اللى فى النص
شكرا لكم جميعا انا هبص على الشكمان واشوف
مش حتلاقى فيه حاجة بالنظر... روح لواحد بتاع شكمانات و خلية يسمع العلبة... الوت مميز اوى و بتوع الشكمانات عارفينة
MMamdouh
شكرا يا استاذ ممدوح انا هروح لبتاع شكمانات طبعا وهرد عليكم ان شاء الله
اعتقد كدة وضحت الرؤية غالبا سلوك البوجيهات انتهت وعايزة تتغير.اقتباس:
المشاركة الأصلية كتبت بواسطة mohsen
ازاااااااااااي؟؟؟اقتباس:
انا غلطت الغلطة دى وللاسف الفتيس تقل عن الاول بعد ما غيرت الزيت.
انا مش بشكك بس تهيألي بيطحطلها زيت 80w و المفرروض تبقى تمام
لو الفتيس تقل بعد التغيير يبقى درجة الزيت غلطاقتباس:
المشاركة الأصلية كتبت بواسطة الصاوي
MMamdouh
طب درجة الزيت ايه يا معللم؟؟اقتباس:
لو الفتيس تقل بعد التغيير يبقى درجة الزيت غلط
MMamdouh
متزيدش عن 90... اما 90 او 80/90
MMamdouh
الاول يا جماعة انا مش عارف اقول ايه على التعاون والاهتمام والروح الجميلة دى
انا روحت لبتاع شكمانات كويس قالى الشكمان سليم والزنة دى مش منه والافايز كلها سليمة
بعدها قلت اكشف على زيت الفتيس يمكن يكون ناقص وهو السبب ف الزنة دى
المهم انا بتعامل مع بنزينة شل ف ش النصر فى المعادى علشان بيرفعوا العربية لفوق لما بيكشفوا على الزيت
وكمان فى راجل طيب بيغير الزيت ميزته انه فاهم شوية وما بيفتيش وسالته على درجة زيت الفالفلين الى عنده
قالى انا عندى زيت (80-90) وهو الى بيتحط لللانوس فعرفت انه فاهم
وهنا كانت المفاجأة. الراجل سألنى انت جايب العربية دى من بلاد برة قلتله ايوة هى جاية من المانيا بس انت عرفت منين
قالى اصل الزيت الى ف الفتيس مش زيت فالفلين ده زبت باور وفعلا الراجل اول ما فتح الطبة الزيت بدأ ينقط بسرعة
وكان لونه احمر وعامل زى المياه مالهوش اى لزوجة
الغريب ان الراجل قالى ان ده عادى وبيحصل فى عربيات كتير جايه من دول اوروبية الجو فيها بارد والدايو والاوبل اشهرهم
وقالى العربية دى بقالها معاك هنا اد ايه قولتله خمس شهور قالى الفتيس عامل معاك ايه قلتله زى الفل والحمد لله ناعم جدا
اكد عليا وقالى اياك اياك اياك حد يقولك فضى زيت الباور وحط بداله زيت فالفلين وقالى لو عملت كده الفتيس هيتقل معاك والنقلات هتعض وهتعصلج معاك وقالى كل كام شهر ابقى تعالى نكشف عليه ولو نقص هنذوده زيت باور.
وفى الوقت ده افتكرت وصية الاستاذ الفاضل "عبدالله" وانه على ما اعتقد كان جايب عربية بنفس المواصفات وغير لها زيت الفتيس والفتيس تقل معاه بعد كده
وايضا كنت قرأت مقالة للاستاذ الفاضل "محمد ممدوح" انه جرب يحط زيت باور ف الفتيس بناء على فتوى من بعض الميكانيكية وبعدين لغى الفكرة
انا اسف للاطالة ولكن هدفى القاء الضوء حتى استفيد من اقتراحتكم الرائعة التى توفر الوقت والجهد والمال
وحاولت ان اجد اى تفسير علمى لكلام الراجل الطيب وفشلت
ولم يتبقى امامى الا تغيير سلوك البوجيهات لانى بدات اقتنع بتشخيص الاخ الفاضل الاستاذ "عبدالله" لانى بعد ما نضفت البوجيهات وسلوكها بخرطوم هواء جامد جدا فى نفس البنزينة لقيت صوت الزنة بيضهر فى لحظات وبيختفى فى لحظات تليها مباشرة
ان شاء الله هشترى طقم سلوك وهقولكم النتيجة بقت ايه
وشكرا لكل من ساعدنى فى هذه المشكلة
اسف للاطالة
يبقى معنى كدة ان الزيت دة بيستعمل لما يبقى الجو بارد و لزوجة الزيت العادى بتبقى عالية اوى لكن فى مصر مع الجو الحار اعتقد زيت الباور حيبقى خفيف اوى
MMamdouh
أبعد عن زيت الباور
أبعد عن زيت الباور
زيت الباور ممكن يكلفك الفتيس بتاعك طالما فتيسك مانوال, انا حطيته وسافرت بالعربية مشوار حوالى 110 كيلو لقيت الفتيس فى نص المشوار بقة بيعض وبيعمل حركات قرعة كتير, رحت مركز الصيانة ونزلته وحطيت زيت 80 توتال ودلوقتى معقول جدا عن الأول.
الزيت الى فى الفتيس حاليا مش زيت باور ولا زيت هيدروليك, هو زيت فتيس مانوال درجة لزوجته 60 على ما اذكر ونوعه معروف جدا بس انا مش فاكره ودة مناسب للأجواء الباردة فقط والصقيعية ولكن فى مصر غير مناسب نهائى وانا كنت لقيت عندى فى الشنطة بقايا عبوة من الزيت دة واستغربت منه جدا والناس بتتخدع فيه وبتفتكره زيت باور لأنه بعد ما بيتحط ويشتغل فترة لونه بيقلب على الاحمر شوية.
عموما انصحك بزيت فتيس شيل لزوجة 70/80 وحط معاه شوية زيت شمبر كما افاد من قبل اخونا سبعاوى وربنا يباركلك فى عربيتك.
هو ايه الزيت ده؟؟؟؟؟؟اقتباس:
زيت شمبر