الموضوع ده لكل واحد معاه عربية معاقين

**Mosmafa** · 02-09-2009 05:06 AM

يا ترى العربية عاملة معاك ايه
واهم حاجة خلصت ورقها ازاي
وكل واحد يحطي تجربته مع العربية اللي جابها من النفق الضلمة ده
وانا هحط حدوتي اللي مش لاقيلها حل بعد ما اشوف حد مشاركني نفس المأساه ولا لا

**JAM** · 02-09-2009 01:23 PM

انا العربية معايا من شهر 5 اللى فات وهية بالناسبة بتاعة نسيبى بس هية معايا علطول... ولغاية دلوقتى مش عارف أرخصها ودا لأن نسيبى بيتوتر لما يقعد على الدركسيون لوحده... ومن اسبوعين رحنا ادارة المرور وسقط فى العملى..ز وبإذن الله هنخلصها كوسة وربك الستار

**Morieno** · 02-09-2009 01:55 PM

أنا كتبت قبل كدا كتير عن التجربه الفل اللى حصلتلى

نوبيرا 2000 - مانيوال فتحة سقف - تكييف ديجيتال تاتش - كسيت وسى دى - ابانوس - 5 جنوط اسبور - ومافيهاش هفوه ولا لمسة باروما قعد حوالى اسبوع بفرز فى عربيات بورسعيد مع ميكانيكى حبيبى والسعر 30.000

المهم جبتها وصدر بعدها بأقل من شهر قرارا منع نقل الملكيه قبل مرور 3 سنوات - راجع الموضوع دا http://www.nilemotors.net/Nile/84504-a.html
وبعد كدا ربنا يسر والمعاق نفسه اشتراها لأنها عجبته - وهى كانت تعجب الباشا بصراحه-
اللى عرفته انه لحد الوقتى مارخصش عشان مش عارف يسوق ... دا غير ان الورق جه للمرور من الجمرك بعد 3 شهور
بس خلاص

لو عاوز تعرف حاجه محدده اسال سؤال محدد هديلك اجابه محدده

ودمتم ذى الفل

**battikh** · 02-09-2009 02:06 PM

العربية معايا من 11-2007، ماشية زي الفل
الحدوتة بدأت معايا من يوم مار روحت قدمت طلب في المجالس الطبية برغبتي في شراء سيارة مخفضة الجمارك، بعد حوالي شهرين من تقديم الطلب، كشفت علي لجنة طبية، وبعدها بأربعة شهور وصلت أوراق اللجنة إلى إدارة جمارك السويس حيث كانت رغبتي، هناك اشتريت السيارة التي أريد، وكانت أول سيارة معاقين تطلع من ميناء السويس، السويس مكنش فيها سيارات معاقين، ورجعت بيها على بلدي وانتظرت لغاية م الإفراج الجمركي بتاعها وصل إدارة المرور اللي أنا تابع ليها، عملت امتحان قيادة رغم إني كان عندي رخصة خاصة، اتسحبت مني وبدأت في إجراءات الرخصة من جديد وكأني بطلعها لأول مرة، امتحنت واخدت الرخصة واخدت النمر بتاعة العربية، وانتهى المشوار.
بالنسبة لقصة رخصة القيادة، فأنا كان عندي من زماااااااااااااااااان رخصة قيادة خاصة، ولما جبت العربية بتاعة المعاقين دي ، اكتشفوا بالصدفة بإني أملك رخصة قيادة خاصة، صادرة من نفس إدارة المرور ، مش مذكور فيها إني معاق، وكانت بالنسبة لهم مشكلة، المهم تم تدارك الموقف، وسحبوا مني الرخصة الخاصة، وتم إحراق ملف الرخصة دي في الإدارة، وخلوني أجيب ملف جديد، وأعمل الرخصة كأني أول مرة في حياتي أطلع رخصة، الغريب إنهم كتبوا على الرخصة بتاعتي لا يقود إلا سيارة مجهزة، ماشي دي مبلوعة، لكن العبارة كلها على بعضها( لا يقود إلا سيارة مجهزة رقم كذا برقم شاسيه كذا. استغربت قوي، دخلت على مدير إدارة المرور قلتله ساعدتك، ليه التضييق ده، حكاية لا يقود إلا سيارة مجهزة طبياً ماشي، لكن لا يقود إلا السيارة رقم كذا دي مش تضييق ، افترض إني حجيب عربية تانية خاصة بي، حسوقها إزاي، قالي لما تجيب إن شاء الله ابقى تعالى ونغيرلك الرخصة.
صدقت ما خلعت بالعربية والرخصة منهم، وكفى الله المؤمنين شر القتال.

**Mosmafa** · 02-09-2009 02:54 PM

طب موضوع فك الحظر الاخراني ده
برضه شارط رخصة قيادة يعني حتى بعد التلات سنين
وال 10000 ج برضه لازم اعمل للمعاق رخصة ((هو مستحيل اعملهالو))

**kisho55555** · 04-09-2009 07:57 AM

انا هاحكى حكايتى مع الكربيات دى ... اولا انا مش معايا عربية معاقين

نبدا الحكاية .... كذا مرة كنت بروح بورسعيد وبشوف الاستثمار هناك واشوف كمية العربيات المعروضه هناك والنظافة بتاعتهم عاملة ازاى ... قررت فى يوم من الايام انى اشوف الموضوع ده وبالفعل بدات اسال ع اللى ممكن اعمله عشان اعرف اطلع عربية معاقين ... طبعا الكل رشح لى الكورى لكثرة قطع الغيار واقنعونى ان موضوع المعاقين ده سهل ...

بعدها بيومين ... اخدت واحد صاحبى واخدنا فكرة عامة عن الاستثمار فى بورسعيد (انواع العربيات واسعارهم وموديلاتهم وكدا) ... بعدها بيوم اخدت ميكانيكى قعدت الف ع العربيات الكورى واحدة واحدة لغاية لما استقريت ع نوبيرا 1 ب 28 الف وصاحب المعرض قال لى انه هيجيب المعوق ب 10 الاف برحضه والموضوع كله هيخلص فى شهر واحد بس ...

طبعا انا قاعد مستنى صاحب المعرض عشان يتصل بيا ويوقل لى المعوق جاهز ... مفيش اى اتصال ... عض الناس قالت لى احسبها كدا العربية هتقف عليك بكام ( 28000+10000 معوق +9600 فك حظر=47600 جنيه ) .... ليييييييييييييييييييييييه ... دى نوبيرا 1 .... رحت متصل بالراجل قولت له انى هشوف عربية تانية ....

رحت للراجل عشان اشوف عربية ارخص من دى بشوية ... مفيش ... صاحب المعرض قال طيب متشوف لك واحد المانى نظيفة زى البورا ولا زى الباسات او الاوكتافيا .... قولت له غاليه ... قالى انت ممكن بعد كدا ترفع قضية وتطلب فيها بدل ضريبة مبيعات ودى بتكون فى العربيات الالمانى من 6-8 الاف جنيه على حسب العربية وسعرها ...

قعدت افكر ... قولت مش مشكلة نزودها شوية ونتصرف فى باقى الفلوس ونجيب بورا او اوكتافيا ... تعالى يا ميكانيكى ... نتفرج ع العربيات الالمانى ... الحمد لله استقرينا ع اوكتافيا كحلى .... طيب يا عم

بسال صاحب المعرض فين المعوق ... قالى انت اللى اجلته عشان قولت لى انك هتشوف عربية تانية ... قولت له مش مشكلة ... طيب ايعت له وهاته ... قعد يقول لى تحت امرك باكتير يومين وهتصل بيك ونخلص العربية ...

قعدت استنى ... مفيش ... اتصلت بيه قالى المعوق مش عايز يجى وفى معوق تانى ب 12 الف قول له مش مشكلة بس يجى بقى ... قولت هتتعوض انشاء الله ... العربية جميلة وتستاهل ...

قعدت استنى مفيش اى اتصال ... رحت رايح له ... لقيته قاعد مع المعوق وبيقول انا جبته بس هو عايز 15 الف .... قولت له هو كلام عيال مش قولنا فى الاول 10 دلوقتى 15 ... ليه يا عم ...

قالى هو اللى طالب كدا .. انا مليش دعوه ... بس لو انت عايز ممكن اجيب لك واحد من غير رخصة ب 10 وانت تطلع له الرخصة ... قولت له مفيش مشكلة ..

كذا مرة اتصل بيه ميرضش ... رحت رايح له اشوف الموضوع ... ملقيتوش ولا لقيت العربية ... دى النهاية

الخلاصة : اسبوعين من التعب و الارهاق فى الشمس ودفع مصارف ملهاش اى لزمة ...

بردوا انا كنت عايز اقول ان قضية بدل الضريبة معادتش بتترفع لصالحك ... نهائى .. دى القصة اللى حصلت معايا ...