المشاركة الأصلية كتبت بواسطة sab3aawy
بعد 12 ألف كيومتر الماروتى، وبعد ما رحت بيها اسكندرية والزقازيق وكفر الشيخ والسويس، وبعد ما مشيت بيها فى كل شوارع القاهرة اقدر اقول لك ان العربية دىلها عيب واحد فقط هو الاستهياااااااااااااااااا اااف، الناس بتكون ماشية فى امان الله واول ما يلاقو عربية ماروتى معدية من جنبهم تلاقيهم فجأه ركبهم الهسهس وطلع عليهم اللى بيطلع للقطط بالليل وراحوا كاسرين عليك بلا ادنى سبب منطقى، مع ان فى معظم الاحوال بتكون لا امكانيات العربية اللى هو كسر بيها قد امكانيات عربيتك ولا اماكنيات السائق قد امكانياتك
والله انا مرة حصل معايا ان واحد بعربية 132 كل حاجة فيها سليمة بس لوحدها وتطلع دخان من ورا ومن قدام ومن تحت ومن فوق ومن ودان اللى سايقها كمان، كسر عليا بدون ادنى سبب ، انا سبته وعملت نفسى ميت ومش واخد بالى لحد ما الطريق اتفتح رحت طاير من جنبه-من غير ما اكسر عليه- على سبيل يعنى انى اقول له بالذوق مايبقاش يستهين بحد، بصيت لقيت ده عمال يحرق على العربية وبيجرى فى آخر زاده عايز يلحقنى، انا صعب عليا وخفت العربية تولع بيه للا يعمل حادثة لانه كان غشيم، رحت مهدى، الاقى الحيوان ييجى يكسر عليك تانى ويقوللى :ابقى امشى على قدك طالما ان اخرك تركب سبت غسيل، انا بصراحة اتحرق دمى، صحيح انى ولله الحمد عندى عربية تانية كبيرة ومش بدق اوى مع الكلام ده بس اتغظت من غباء الناس، فرديت عليه قلت له :سبت الغسيل اللى مش عاجبك ده تمنه يجيب 2 من صفيحة الزبالة اللىانت راكبها ويفضل شوية فكة يشتروا عشرة من صنفك، ورحت سايبه طاير
فيما عدا ذلك هى عربية تحطها فى الشارع تجرى تنزلها فى الترعة تعوم ترميها فى حفرة تقب تطلعها على الحيطة تطلع وتحايلها بقرش بنزين تقوللك شكرا