عندي كام سؤال على كام مشكله في الكورولا بتاعتي 2005

**superzok** · 02-09-2009 02:41 PM

السلام عليكم وكل سنه وانتم طيبين

عربيتي كورولا 2005 اوتوماتك ماشيه في حدود 90000 كم

اول مشكله بسمع صوت عالي اول ما ادورها واتحرك بيها او اول ما اشغل التكييف ( صوت يشبه الصريخ )
وتقريبا الصوت ده بيختفي لما العربيه تسخن

هل ده بيكون عيب سيور او ممكن يكون حاجه تانيه ( لاني ممكن اشتري سيورها واروح لواحد يركبهملي علطول )
علما باني مغيرتش السيور من اول ما جبت العربية
ولما اغير السيور لازم اغير الاتنين مع بعض ( سير الدنموا والتكييف "اعتقد غالبا العيب فيهم" و سير البور ) ولا اغير اللي فيه العيب

وبما اني جبت سيرة البور
هو زيت البور بيتغير ولا بيتزود وكل اد ايه ( علما بانه موصلش لغاية علامه ال ميني(
نفس السؤال بالنسبة لزيت الفرامل ؟؟

وبما اني جبت سيرة الفرامل
انا بسمع صوت واير الفرامل تقريبا وانا بدوس فرامل
كده يكون العيب منين وهل الواير محتاج يتشد او يتشحم ولا المشكله مش مشكله واير اساسا

سؤال تاني معلش : هو زيت الفتيس ( اوتو*) بيتغير كل اد ايه واكشف عليه الزاي في العربيه
لاني سالت ناس كتير وانقسموا لرايين
ناس تقول غيره عند 60- 80 الف كيلو
وناس تقول متغيرش غير لما تحس ان فيه مشاكل في الفتيس ( على اساس ان فتح الفتيس هو بداية المشاكل )

هو صحيح زيت الفتيس ملهوش طبه ولا ايه ؟؟!!

عندي سؤال كمان برضه : هو يعني ايه تربيط عفشه وهل هي حاجه روتينيه بتتعمل كل فتره

ونفس الكلام بالنسبه للوزن والترصيص وهل اوزن وارصص علما بان الكوتش عندي ماشي 90000 كم (( ايوه الفبريقه بتاعها )) والعربية فيها حوده مع السرعات ولا محتاج اغير الفرد اللي عندي الاول وبعد كده اوزن وارصص

اخر حاجه الكلام ده كله مين نضيف في اسكندريه ممكن اعمله عنده لاني عمري ما اتعاملت مع ميكانيكيه
ومتخوف من الخطوه دي
ومحدش يقولي التوكيل لاني مش بحب اتعامل معاه

معلش على كمية الاسئلة الكتير
بس اخوكم طمعان في الاستفاده من خبراتكم

**Nile Heart** · 04-09-2009 11:59 AM

ليه بس ياعم الأهمال ده؟ حرام عليك كده هاتقصف عمر العربيه!

السيو لازم تتغير كل 40 الف والزيوت كل 20 او 40 حسب نوعها و الكاوتش ممكن اخره 80 الف!

انت محتاج ييجى 3 الاف جنيه تغير كاوتش وسيور وفلاتر وتظبط العربيه كلها .. ده لو عايزها تعيش معاك ل 300 -400 الف كيلو

**M.Mohsen_Saleh** · 25-09-2009 01:34 AM

نبدأ بالسيور، عندك سير واحد للدينامو مع التكييف، و يفضل انك تشتري الأصلي عشان عمره أبكتير 100000 كم. سير الباور معتقدش فيه مشكلة عشان ده هيصفر طول الوقت لو متدمر.

الفرامل : معندكش سلك في أي حتة في نظام الفرامل الا فرامل اليد، غالبا الصوت ده قلة تشحيم في دواسة الفرامل.

زيت الباور و الفرامل مطلوب منك تزودهم فقط ، مش تغيرهم ، و اللي يقوللك غير كده عايز يعمل عليك شغل.

زيت الفتيس الأوتو مش بيتغير الا لما تحس بمشكلة منه، خشونة أو تاخير في النقل أو نطرة في السرعات المنخفضة بالذات. و متغيرش الزيت ده الا بالصلي بتاع الوكيل لو خايف على الفتيس بتاعك.

الكاوتش التويو اللى عندك مفروض يتغير طبعا، و حاليا مفيش تويو في السوق و لو لقيت بالصدفة هتلاقيه بتاريخ قديم. لكن لازم تغيره ده مؤكد.

اللي بقولهولك ده عن تجربة مع سيارتي الكوروللا 2002 ، و عارف كل مسمار مكانه فين فيها

**nab!l** · 25-09-2009 02:02 AM

واضح انك بتحط بنزين بس عشان تمشى
اهتم شويه عشان العربيه متزعلكش

**محمد ابراهيم 1** · 25-09-2009 08:10 AM

المشاركة الأصلية كتبت بواسطة mohamedmohsen2000

نبدأ بالسيور، عندك سير واحد للدينامو مع التكييف، و يفضل انك تشتري الأصلي عشان عمره أبكتير 100000 كم. سير الباور معتقدش فيه مشكلة عشان ده هيصفر طول الوقت لو متدمر.

الفرامل : معندكش سلك في أي حتة في نظام الفرامل الا فرامل اليد، غالبا الصوت ده قلة تشحيم في دواسة الفرامل.

زيت الباور و الفرامل مطلوب منك تزودهم فقط ، مش تغيرهم ، و اللي يقوللك غير كده عايز يعمل عليك شغل.

زيت الفتيس الأوتو مش بيتغير الا لما تحس بمشكلة منه، خشونة أو تاخير في النقل أو نطرة في السرعات المنخفضة بالذات. و متغيرش الزيت ده الا بالصلي بتاع الوكيل لو خايف على الفتيس بتاعك.

الكاوتش التويو اللى عندك مفروض يتغير طبعا، و حاليا مفيش تويو في السوق و لو لقيت بالصدفة هتلاقيه بتاريخ قديم. لكن لازم تغيره ده مؤكد.

اللي بقولهولك ده عن تجربة مع سيارتي الكوروللا 2002 ، و عارف كل مسمار مكانه فين فيها

جميع زيوت السيارة لازم تتغير كل فترة لأنها بتتأثر مع الوقت وبتفقد خواصها الأساسية وبالتالى ممكن تعمل

مشكلة كبيرة فى العربية أنت فى غنى عنها

زيت الفتيس الأوتو ماتيك لازم يتغير كل فترة حوالى 30 ألف كم أو حسب تعليمات الصانع

زيت الفرامل لازم يتغير كل سنتين أو حسب تعليمات الصانع

زيت الباور لازم يتغير كل سنتين أو حسب تعليمات الصانع

السيور لازم تتغير كل فترة أعتقد 40 ألف كم أو 3 سنين أو حسب تعليمات الصانع

المهم والخلاصة إنك لازم تبحث عن المانيوال بتاع العربية وتلتزم بتعليمات الشركة المصنعة عشان تحافظ على

عربيتك

**omaroof** · 26-09-2009 08:22 AM

اخى العزيز ارى انك فى حاجه الى ان تهتم بالسياره قليل وبالنسبه لاسئلتك

1-صوت الصريخ اللى عندك ده مشكلة سيور بس اى سير منهم اعتقد انك تغير السيور كلها وتكون اصلى لانك ماشى 90 الف

2- زيت البور بيتزود موش بيتغير فعندما تعمل الصيانه زوده للفول

3- بالنسبه لصوت الوير بتاع الفرامل ممكن يكون عاوز يتشحم ولا كلبس من اللى ماسك الوير محلول خلى حد فاهم يشوفه

4- زيت الفتيس الاوتوماتيك بيتغيير كل 60 الف مع الفلتر الداخلى ( فلتر موجود جوه الجير شبه الهاديسك المحمول) اما الجير العادى فممكن يتغير كل 5 او 6 سنين وغير صحيح ان فتح الفتيس بداية المشاكل الا لو فتحه ماكنيكى موش كويس

5- والله تظبيط العفشه عمرى ماسمعت عليه غير عندنا فى مصر وموش عارف بتتظبط ازاى؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

6- الترصيص ده عندما تحدث اهتزازات فى الدريكسيون خفيفه وفى حاجه تانيه اسمها ميزان رود وهى عندما تترك الدريكسيون والعربيه ماشيه فتلاقى العربيه بتحدف يمين او شمال والاتنين ابقى اعملهم بس لما تغير الاطارات حاتلاقى العربيه ناعمه وماشيه زى المسطرة

7- مين فى اسكندريه ؟؟؟؟؟؟؟؟؟؟؟؟؟؟؟؟ رغم انى اسكندرانى

8- ارجو منك اخى العزيز ان تراعى الاهتمام بالسياره والمحافظه عليها لانها على مقدار اهتمامك بها ستكون معك وفى خدمتك فى كل الاوقات واصعبها

**tutankhamoun** · 26-09-2009 08:57 AM

المشاركة الأصلية كتبت بواسطة محمد ابراهيم 1

جميع زيوت السيارة لازم تتغير كل فترة لأنها بتتأثر مع الوقت وبتفقد خواصها الأساسية وبالتالى ممكن تعمل

مشكلة كبيرة فى العربية أنت فى غنى عنها

زيت الفتيس الأوتو ماتيك لازم يتغير كل فترة حوالى 30 ألف كم أو حسب تعليمات الصانع

زيت الفرامل لازم يتغير كل سنتين أو حسب تعليمات الصانع

زيت الباور لازم يتغير كل سنتين أو حسب تعليمات الصانع

السيور لازم تتغير كل فترة أعتقد 40 ألف كم أو 3 سنين أو حسب تعليمات الصانع

المهم والخلاصة إنك لازم تبحث عن المانيوال بتاع العربية وتلتزم بتعليمات الشركة المصنعة عشان تحافظ على

عربيتك

فعلا الكلام ده مظبوط 100 %

حاجة كمان مهمة جدا

الكاوتش لازم يتغير فورا ................... أنت كدا في خطر الأنفجار ...... و الزحلقة كمان لما تفرمل .

**bmya** · 26-09-2009 04:26 PM

كاوتش الفبريقه وماشي بيه 90 الف لا حول ولاقوه الا بالله حرام عليك نفسك
ده انا كنت لما بتأخر يبقي 50 الف والكاوتش اصلا كان بيبقي مشقق وممسوح انت بقه ماشي 90 الف ازاي!!؟!؟!