الموضوع: تغطية مقابلة افطار رمضان 2009

السلام عليكم ورحمة الله وبركاته
سعيد جدا جدا جدا بهذه المقابلة التي تعتبر فريدة من نوعها بالنسبة لي فبرغم طول وقدم مشاركاتي في المنتديات والإنترنت عموما إلا أن هذه أول مرة أتقابل مع هذا العدد مجتمعين من خلال الانترنت والفضل لله أن وفق أعضاء هذا المنتدى الجميل لكل هذا التميز

ملاحظات سريعة:
١- بالنسبة لصورتي فسهلة ما تتوهش: لحية كبيرة وشعر تقيل وشنب ونضارة وأشغل حيزا محترما جدا من الفراغ في الصور اللي طلعت فيها (الصور بتتخن فعلا..والأكل برضه) بس يارب ما تتلخبطوش بيني وبين شنوري وكريم، وبالمناسبة كان جنبي أبو عبد الله وهو مش طالعلي ولازم يتغذى شوية
٢- برغم التفاوت بين الحاضرين في المراحل السنية والدراسة والوظيفة والحالة الاجتماعية والميول والاتجاهات إلا أن الجميع يسود بينهم الاحترام والمحبة والرغبة في الخير ومساعدة الآخرين، حقيقي حاجة تفرح وتدي دفعة أمل قوية جدا إن البلد دي ممكن يطلع منها حاجة حلوة قوي
٣- البسبوسة بتاعة كريم كانت أستاذة فعلا بس الوحوش قضوا عليها
٤- الأكل كان أستاذ جدا جدا هو كمان ولكن للأسف خالي من سلطة الطحينة- أهم حاجة بالنسبة لي في الأكل- وأنا بحمل كريم المسؤلية الكاملة عن أي آثار تترتب على نقص نسبة الطحينة في دمي بسبب تفويت الجرعة اليومية. القاعدة العلمية المستقرة بتقول (ليس بالخبز وحده يحيا الإنسان ...بل لابد من سلطة الطحينة كمان عشان الغموس)
٥- كان في اتنين فنانين خزعبليين معاهم (رق وعود) ابتدوا يفنوا في آخر الليلة وسمعت إنهم مش بيفصلوا إلا على السحور فلو جيت الإفطار الجاي ولقيتهم أنا مش مسؤل عن اللي حيحصل لاسيما وأن ارتفاع المطعم مغري جدا بأفكار مش ولابد (اللهم إني مش عاوز أقتل حد)


تلغرافات مع الاحتفاظ بالألقاب (المفروض الأصحاب والأحباب مفيش بينهم ألقاب):

كريم منير: ربنا يوفقك لكل خير، جزاكم الله خيرا كثيرا كثيرا كثيرا وبالتوفيق دائما، حقيقي سعيد بمقابلتك إنسان نشيط ونافع لإخوانه، ربنا يكرمك وضروري تشرفنا في إسكندرية عشان (نعملوا معاك أجدعها واجب بإذنك يارب) -حتة اسكندراني صميمة

د محمود صلاح: أنا جاي سايق من اسكندرية وباقول يا غربتي فاكتشفت إن حضرتك جاي سايق من المنيا، جزاك الله كل خير وسعدت جدا بمقابلة حضرتك، الوحيد تقريبا اللي التزم بكارت التعريف بالاسم، غير الأدب والهدوء والوقار...حقيقي حاجة تفرح ..ربنا يحفظك

شنوري: اللذيذ إننا اسكنرانية ونتقابل للمرة الأولى في القاهرة.. بس سيبك واضح إنك دماغ جامدة.. لازم نتقابل إن شاء الله وربنا يحبب فيك الناس كمان وكمان

محمد محسن: شاب محترم وذوق ربنا يكرمك سعيد جدا بمقابلتك وربنا يوفقك في دراستك وتبقى أحسب محاسبين حسابات مصر

نور بيجو: سبحان الله (أكيد انت عارف ليه) ربنا يحفظك من كل سوء، شاب حبوب ويارب مستقبل البلد والمسلمين يكون أحسن على إيدك إنت والشباب اللي في سنك

أبوعبد الله: طلعت رفيق في التنظيم وأنا مش عارف ، سعيد جدا بمقابلتك و إن شاء الله يكون في بينا تواصل أكثر الفترة اللي جاية ومتنساش السلام اللي حملتهولك

أبو الوليد المصري: رفيق آخر في التنظيم ومعلش يا بوحميد صورتك مطلعتش ربما لأسباب أمنية على سبيل التمويه عشان مش كل التنظيم يبقى مكشوف

محمد عبد الباسط: لم أتشرف بالحديث معك بما فيه الكفاية ولكن أعجبني جدا هدوءك والجايات أكثر إن شاء الله

محمد موتورايزر: (شكلي مختلف خالص مش كده؟) أيوه طبعا يابوحميد شكلك مختلف عما كنت أتصور بس واضح إنك لذيذ ورايق وإن شاء الله يكون في بينا تواصل أكثر الفترة الجاية

أحمد حسن ahit : جزاكم الله خيرا يا أستاذ أحمد طلعنا عينك معانا في شيل المصاحف وربنا يتقبل منا ومنك

أحمد وطارق زويل: نفس النموذج المحترم الوقور فصيلة الدكتور محمود، سعيد جدا بوجود حضراتكم معانا وسط الشباب وحرصكم على الاندماج...الشباب شباب القلب

محمد عبد السلام ومحمد مجاهد: شرفتوا الإفطار بذوقكم وفهمكم العالي بالتوفيق دايما

محمد علاء: كنا بنفطر جنب بعض ولكن قلة ذوق مني إني متعرفتش على حضرتك كفاية فسامحني وتتعوض إن شاء الله

سمير الشهاوي: سعيد بمقابلة حضرتك وواضح إن وراك سر كبير وسفريات وانشغالات، سلمت عليك يجي مية مرة في آخر اليوم عشان كتر السلام يزيد المعرفة،، ترجعلنا بالسلامة إن شاء الله

أحمد سامي وأحمد كمال (ثالثهم الشنوري): فاكهة الإفطار وكانوا عاملين جو مرح وفعال..ربنا يجمعكم دايما في الخير وبعيدا عن أي حبوب زرقا أو زومبراكس

أسامة شحاتة amecath: زبون تقيل معانا في مشروع المصحف فجزاكم الله كل خير وسعيد جدا بمقابلتك وإن شاء الله تتكرر تاني قريب

خالد طلعت: واضح إن كل الناس بتحب حضرتك وتحترمك..ربنا يزيدك من محبته ومحبة الناس

أحمد عيد: اسم حضرتك على اسم واحد حبيبي قوي (صديق عمري) ربنا يجمعنا على الخير دايما

الحاج أحمد إبراهيم aif: عم الشباب كلهم...يعني التواضع و الذوق والاحترام وفي نفس الوقت المرح والفكاهة والروح السمحة ربنا يبارك في حضرتك ويجازيك خير على مواضيعك الشيقة في المنتدى

أسامة (شاب مسلم): يعني شباب دار العلوم صمام أمان اللغة العربية والهوية الإسلامية، انت جيت في الآخر وملحقناش نقعد معاك قد كده بس الجايات أكثر إن شاء الله، كلية دار العلوم من أحلام عمري ربنا يأذن وأعرف أنتسب ليها

أشرف فتحي: حضرتك وصلت متأخر شوية وملحقناش نتكلم مع بعض قد كده بس حقيقي سعيد جدا بمقابلة حضرتك

زميل بنضاره وشنبر إسود: ملحقتش اتعرف عليه للأسف، هو قالي كلمة سر كده وإحنا بنوزع المصاحف، أكيد هو عارف نفسه فياريت يبعتلي على الخاص بدل ما أعمل تسييح هنا، كان نفسي أتعرف على حضرتك بجد بس الوقت كان ضيق

نايل ستورم: ملحقناش نتعرف بس إن شاء الله حيكون لينا كلم كتير قوي مع بعض

أكيد أكيد أكيد نسيت ناس وفي ناس ملحقتش اتعرف عليهم أصلا وفي ناس مجتش الإفطار، سامحوني لو كنت نسيت حد وتتعوض إن شاء الله
كل سنة وكل أعضاء المنتدى إلى الله أقرب وربنا يجمعنا في الجنة

[quote=ba7ary;3871970922]

محمد موتورايزر: (شكلي مختلف خالص مش كده؟) أيوه طبعا يابوحميد شكلك مختلف عما كنت أتصور بس واضح إنك لذيذ ورايق وإن شاء الله يكون في بينا تواصل أكثر الفترة الجاية

[/quote]

محمود معلش يا صديقي جت معايا محمد ولما افتكرت كان فات وقت التعديل

كان يوم لذيذ
شكرا

المشاركة الأصلية كتبت بواسطة ba7ary

خالد طلعت: واضح إن كل الناس بتحب حضرتك وتحترمك..ربنا يزيدك من محبته ومحبة الناس

الله يكرمك يا باشا .... والله أنا اللي اتشرفت بمعرفة سعادتك وكنت اتمنى ان يكون بينا حديث أطول بس تتعوض في المقابلات اللي جايه بأذن الله عايزينك معانا دائما

وشكرا على هديتك الغالية وجزاك الله عنها كل خير

المشاركة الأصلية كتبت بواسطة shnory

طيب يا ريت يا جماعه كل واحد يحط صورته مكان الصوره الشخصيه علشان نقدر نعرفه
لان مع العدد الكبير الواحد بيبقي فاكر الشكل بس الاسم بيضيع

شنوري باشا

والله كنت واحشني جدا قبل المقابلة ... بس للأسف مجتش فرصه نقعد مع بعض كتير المره دي وكنت ناوي أحصلكم على مركز شباب الشيشه بس جالي مشوار مهم ومخلصتوش الا على الساعه واحدة ونص ..... على العموم كفاية اننا شوفناك المره دي يا باشا وتتعوض في المقابلات اللي جايه

أنا اللي جوه الدايره الصفرا


جزاك الله خيراً يا أستاذ بحري... إن شاء الله نعرف بعض أكثر المرات القادمة بإذن الله
توزيع المصاحف والكتيبات الدينية المميزة فكرة جميلة جداً...شكراً لحضرتك و أستاذ أبو عبد الله

المشاركة الأصلية كتبت بواسطة ba7ary

أبو الوليد المصري: رفيق آخر في التنظيم ومعلش يا بوحميد صورتك مطلعتش ربما لأسباب أمنية على سبيل التمويه عشان مش كل التنظيم يبقى مكشوف

على فكرة انا قاصد اني مطلعش في الصور.

يارب دايما متجمعين