الموضوع: هزقني .. شكرا !

للأسف انا مش بتاع مشاكل خالص وحتى عمرى ما اتخانقت :) دانا بتكسف لما اقعد فى وسط شلة كل واحد يحكى عن نفسه وعن الشومة ام 15 جنية وعن الالكتريك الى دمر بيه الواد الى عايز يغزه :) ببقى قاعد بتفرج كأنى بشوف فيلم :) بحس انى سعيد بردو رغم انى بتكسف ان الناس كلها بتحكى وبتحور وانا قاعد كدا :) بس بردو بقول ايه لازمتها؟ اولاً قلبى مش جامد خالص ثانياً عندى كرامتى غالية ودا شئ سيئ جداً وبحاول اغيره ومش عارف

المشكلة كلها فى السواقة! بنزل بقابل انواع كثيرة من عدم الذكاء بتعصبنى, عمرى ما تخيلت انى هتخانق مع حد عشان السواقة وكنت بتكلم مع بابا كتير اول ما الاقيه بيشتم اقول له ليه كدا بس :) عرفت ليه اخيراً

لما تلاقى نفسك ماشى فى شارع طولة 2 سم وعرضة 1 سم ومايعديش الا عربية والاخ الى جاى قدامك شايفك والحمد للـه ولكن!! اول ما يشوفك يجرى عشان يزنقك؟ طب ليه؟؟ لما تكون ماشى فى الشارع وتحب تعمل خير وتقول يارب اهو حاجة بسيطة وتعدى ست كبيرة كل الى بعمله بهدى والاقى الى وراية شغال رعاش وزمامير؟ ايه الحل؟ لما تكون ماشى فى شارع بالراحة وبقول شارع من شوارع مصر وخصوصاً شارع لوساكا لو حد عارفه فيه مطبين وحفرتين :) وتلاقى الى وراك بيرعش المفروض انك تدمر العربية عشان هو يعدى احياناً التمس العذر واقول انهم مستعجلين واحياناً بتنح!!! وبضحك بـ بلاهه! للاسف هنا احنا فى بلد مليانه بالمشاكل كلو بيحب يتمنظر وكلو بيحب يجرى وكله بيحب يكون الاولى فى كل شئ انا عن نفسى حتى الان مش بحب المشاكل وكل الناس بتقول انى مش هنفع مع الاشكال المستفزة دى لازم تتعصب وتقل ادبك عشان بعض الناس تحترم نفسها وللاسف انا مش كدا الا فى السواقة هى الوحيدة الى بتعصبى بسرعة

مش عارف لازمة الكلام دا ايه بس اهو :) تفريغ ما فى القلب

المشاركة الأصلية كتبت بواسطة motorizer

فيه ناس تيجي تقولك انا مسكت واحد و انا جي إنهاردة .. هزقته تهزيق !! بستفته !! مسحت بكرامته الأرض ! و تقولها بمنتهي الفخر و كأنه قد أحرز ميدالية أولومبية .. انا مش منهم .. مبحبش أحسس حد بالدونية خاصة البسطاء زي حارس أو عامل مثلاَ لأنها بتقلب معاه بحقد طبقي و بتخش في دماغه إن عشان انا غلبان يتعمل فيا كدة ولا إييه و تنزل في الخلفية أغنية نحن لا نزرع الشوك .. لأ انا بحب أعامل الناس كويس و أمشي و هما مبسوطين و فيه إبتسامة علي وشهم و في الخلفية ناس ماسكين أيدين بعض و بيغنوا محلاها عيشة الفلاح .. لأن كمان انا مؤمن اللي بيتهزق لازم بيحتاج ينفس فا يا هيروح يضرب مراته يا عياله يا عيل صغير بيشتغل عنده فا بتجنبهم خالص .. مش دي المشكلة .. المشكلة إن فيه ناس تكاد تكون بتتوسل إليك عشان تهزقها !!! فيه ناس بتحب تتهزق .. و متجيش إلا بالتهزيق .. ولو حاولت تتعامل معاهم بطريقة تانية هيسوقوا فيها ! مثال .. حارس أمن بالمقابلة أمس .. بعد إنتهاء المقابلة و كله جميل و إتفقنا علي الذهاب إلي مركز شباب الشيشة قلتلهم يا جماعة هروح أجيب العربية و أمشي وراكم عشان معرفش الطريق .. و رحت .. و فتحت العربية و ركبت و متوجه إلي باب الخروج و لقيت قمع قدامي .

الحارس : خير يا باشا .
انا : طالع برة إن شاء الله .
الحارس : أيوة بس النادي بتذاكر أو كارنيهات
انا ( أنظر حولي مستغرباَ ) : إحنا جوة النادي !!
الحارس : أيوة حضرتك يبقي تطلع من البوابة التانية و تمشي شوية عالأوتوستراد هتلاقي البوابة الرئيسية بتاعة النادي خش منها .
انا : انا مش عايز أدخل .. انا عايز أخرج !! انا مروح !! و بعدين إحنا بالفعل جوة هدخل كمان ليه !!
الحارس : طب ماهو لازم تذكرة
انا : امال انا دخلت هنا إزاي !؟ نطيت من عالسور بالعربية !؟ انا لي تصريح عالباب .. دخلت و ركنت العربية و قعدت شوية و ماشي !
الحارس : أنهي عربية !؟
انا : العربية دي !!
الحارس : إنت دخلت بالعربية دي دلوقت ؟!
انا : لأ انا جيت لوحدي و هي قابلتني هنا ! يا عم إنت بتقول إيه ! خلصني عشان فيه ناس مستنياني ! و مش خارج من بوابات تانية عشان فيه ناس مستنياني عالبوابة دي
الحارس : بص يا أستاذ .. مينفعش تخرج من هنا .

دي عينة بسيطة من الحوار .. و كان بهذا الحارس من الغباء يرتسم في طريقة نطقه و تعبيرات وجهه ما يكفي إنه يخليني أشد في شعري .. و قررت أن أشوط القمع و أخبطه بالعربية و أمشي .. قام رامي نفسه تحت العربية و متكلم في لاسلكي معاه جالي واحد تاني! قلتله البهيم ده بيقولي كذا كذا و بلهجة حادة جداَ .. قاله إيه يبني فيه إيه إيه اللي بتعمله ده ! و فتحلي الطريق ! و اللي يغيظ إن أصلاَ و انا داخل النادي من البوابة الرئيسية كمان قلبتلهم نور قاموا فاتحين الباب !

مثال أخر : القهوة اللي قريبة من البيت فيها ناس ساعات يجيبوا كراسي و يقعدوا جنب العربية و يسندوا الكراسي عليها و أحلي نقر تستناك تاني يوم و إنت نازل .. و الناس دي ناس معينة لا تتغير .. رحت مرة قلتلهم بوجه مبتسم ينفع يا رجالة اللي إنت عملتوه ده ؟ قاموا بقي لا مؤاخذة يا باشمهندس و الله ما نقصد و عربيتك في عنينا و بتاع .

تاني يوم .. هما هما .. نفس السندة .. نزلت (وش خشب) .. إيه يا جماعة إحنا مش لسة متكلمين ولا إيه !؟ لا مؤاخذة يا باشمهندس .. إبعد يا إبراهيم شوية عن العربية !

تالت يوم .. هما هما أكنهم راكور جنب العربية ... من البلكونة بقي (زعيق) إنت يا بني أدم إنت و هو .. هو انا موراييش غيركوا ولا إيه !؟ أجبلكم حكومة تقفل أم القهوة دي خالص !؟ ........* !!! و دي كانت أخر مرة يقعدوا فيها .

مثال كمان .. السايس بتاع الجراج اللي في الجامعة .. متغسلش العربية يا أحمد غير لما أقولك .. متحطنيش قدام الأمر الواقع كدة !

هو : ماشي يا باشا أؤمر إحنا بس بنحب نخدم .

بعديها بكام يوم أطلع ألاقي العربية مغسولة برضه و ألبس 7 جنيه ولا عشرة جنيه في ركنة .. يا أحمد انا مش قلتلك متغسلش العربية ؟ يا باشا أصل كانت متربة و الله و صعب عليا تمشي بيها كدة ! شغل محلسة بقي .

تالت مرة .. ............* يا أحمد !!! إنت هتشتغلي بقي !!!! طب مش دافع .. و إبقي إغسلهالي كل مرة ببلاش عشان مش هدفع حاجة .. و دي كانت أخر مرة أطلع ألاقي العربية مغسولة .

المشكلة في هذه الفئة اللي تتغذي و تترعرع علي التهزيق و قلة القيمة .. متاخدش منه حاجة و متتقيش شره غير لو إتهزق .. هذه الفئة اللي تربت في بيئات جعلت التهزيق لهم كأغنية لأم كلثوم يوم الخميس .. مزاج ! انا كنت بتجنب التعامل مع الناس دي بس فيه مواقف لازم بتضطر تتعامل معاهم فيها ! أعمل فيهم إيه بجد .. انا بضايق اما أضطر أهزق حد بس مش ممكن كمية الغباوة دي !! إيه الحل عشان مقللش من قيمة حد و محرقش دمي في نفس الوقت!؟

والله ياباشا كأنك بتحكى حكايتى مع المعاناة
الى مكتوبه علينا كل يوم من الناس الجاهله ديه
والى مش بتعرف تتعامل مع الناس بالاسلوب اللائق الصحيح
بجد حاجة تحزن وتخلى الواحد يضايق جدا
انا من اول رمضان واخد عهد على نفسى انى ماألفظش اى لفظ يسىء لحد
وساعت مانزل من بيتى كأنى نازل الحرب وساعت لما بفتح باب عربيتى بقول
يارب عدى اليوم ده على خير عشان أتجنب الناس الى تحب تهزأ نفسها الله يهديهم
وللأسف حصل امبارح موقف مع سواق تاكسى فى اسكندريه
خلانى فقدت السيطرة على نفسى وخالفت الوعد الى وعدت بيه نفسى
وكنت متعكنن ومتنكد طول اليوم
نفسى اعرف اتحكم فى نفسى شوية...أو ياريتنى أكون إنسان بارد
ياإلا اعاملهم بنفس طريقتهم الى عمرى ماعرف حتى اقلدهم