الموضوع: تعالوا نحكي أظرف مواقف حصلتلك مع العربيات

كنت خرجت و معايا إبنى عبدالرحمن ( 4 سنوات ) و من كتر اللف معيا تعب و نام على الكنبة الخلفية المهم نزلت أشترى حاجة و قفلت العربية و نسيت إنه معايا و قعدت ألف يجى ساعة و بعدين موبايلى رن لقيت أم عبدالرحمن بتكلمنى و فى وسط الكلام سألتى هوا عامل معايا إيه فافتكرت إن كان معايا بس مش ماسك إيدى زى ما بنمشى أنا و هوا دايما و قعدت ألف و أدور عليه فى المول و أنا فاكر إنى سيبته فى أى محل لحد ما رجعت العربية لقيته لسه نايم على الكنبة حمدت ربنا إنه ما اتخنقش جوه العربية و هى مقفلة بس لما لقيته قعدت اضحك لأنى كنت فاكر إنه كان ماشى معايا ونسيته فى محل من المحلات.

صباح الدماغ :D :D

كان عندي عربية 128 و ما ردتش تدور ،، المهم رحت جبت ميكانيكي عشان العربية كانت في اخر الدنيا قعد ساعة يعمل كل المحاولات ، و مش عارفين فيه أيه .

لحد ما اكتشفت إن في زرار فصل الكهربا اللي الناس بتعمله تحت الدواسة كان مقفول ،، بصراحة اكسفت اقول للميكانيكي كده ، قمت مشغله من غير ما ياخد باله ،، العربية دارت
الراجل هيص و قعد يقوللي أصل مش عارف كان فيه أيه و انا عملت أيه و انا مش عارف امسك نفسي من الضحك و اديته أجرته إحراجا منه ،،،

غلطان انك اديته فلوس لأنه حرامي و كداب

أحلى موقف حصل من حوالى سنه بعربيتى القديمه فيات 132 المهم كنت ماشى فى أمانة الله و معدى من فوق شريط القطار فى حته اسمها مزلقان المطار المهم كنت ماشى بالراحه عشان العفشه و الكلام ده متبوظش من المطبات الصغيره اللى بين القضبان و مره واحده العربيه وقفت أجى أشغلها مش عايزه و كان فى قطار جاى بالراحه أوى عشان هيقف فى المحطه دى أول ما الناس شافتنى واقف و القطار جاى لقيت أمة لا إله الا الله بتزق العربيه و الحمد لله عدت على خير و لولا الناس كان زمانى بتحاسب مع أبو لهب :-? :-? :-?