مأساتي مع المرور .....قصة حقيقية واقعية
حدث وان ذهبت لاجدد وانقل رخصة العربية من مرور م. نصر الى الشرقية ا.....المهم رحت ودخلت فحص في مرور الشرقية بعد ما استوفيت اوراقي كلها """"ومعي رخصة لسه سارية """ ...المهم فحصت و الحمدلله ولسه مستني تأشيرة الظابط وفجأة البيه يقول ....ز انت لازم تروح تعمل مطابقة في مرور م.نصر ....
رديت وقلتله ...هو سيادتك مش رفعت البصمه هنا ...قال ايوه .....قلتله وحضرتك رخصتي لسه سارية ...قال اه .... قلتله و الرقم اللي فيها هو اللي في البصمة بتاعتك ...قال اه ....قلتله و الرخصة دي معتمده ...قال اه .....قلتله امال ايه بقى ....قالي لا ما ينفعش لازم مطابقه
ومع اللاسف كان نفسي ما استعملشي تليفوني واخلص زي اي بني آدم عادي ....ولكن اتصلته بنسيبي الظابط اللي كلمه ...وطبعا ظابط الفحص قاله نمشيها عشان خاطرك يا باشا ......ده كان اول ضربة
الضربة التانية واللي جت على دماغي .....اني خلصت المرور الساعة 3 وطلعت عشان اعلق اليفط ملقيتش اي حد يعلقها فروحت وقلت اخرمها في البيت وبعدين انزل اعلقها ...وصلت البيت وغطيت العربية وطلعت ....
وجيت انزل بعد الفطار عشان اعلق اليفط ....ولسه بشيل الغطاء ...لقيت ونش جاي يسحب العربية ....وأمين بيقلي رخصك .....المهم قلت اشوف اخره ....لقيته بقول في اللاسلكي انه ظبط العربية اللي متبلغ عنها ....فلما سأللته ...قالي اصل مدير الامن ماشي في دورية ولقط العربية وهي من غير نمر من دقيقة " يعني اول ما رفعت الغطاء"
المهم لقيت الظابط جاي وراح ساحب الرخصتين ....وقالي انه مدير الامن طالب سحبهم على المرور ...وهو في المنطقة ومينفعش يعمل اي حاجه
اللي يغيظ اني بقوله طب هو فين وانا اشرحله لانه مرديش هو يكلمه مع انه قالي انا مصدقك وعارف انك مبتكدبش.......فابتدا يزعق ويقولي انت اتجننت ..في حد يقدر يكلم مدير الامن من غير ما يعدي على 50 ظابط ......((الحمدلله ان الواحد بيقدر يرفع ايديه ويناجي ويكلم ربنا دو حجاب ..عشان ندعي على الناس اللي زي دي ))
المهم يا جماعه عشان ما اطولش اللي حصل انه رحت المرور عشان اكتشف ما فيش غرامه فورية ولازم اخش فحص تاني واتعرض على النيابة تحت مسمى " بدون لوحات معدنية" ...وطبعا يوم تاني ضاع في المرور وغرامه 300 جنيه