-
لانسر 2001..ميت غمر
السلام عليكم ورحمه الله...
كل سنه وكل الاعضاء طيبين وبخــــــــــــــــــــــ ــــــــير
أخوكم باع الانوس 99.
واشترى عربيه لانسر مكوه2001...من معرض ( الشعار ) في ميت غمر
أخدت الميكانيكي بتاع واحد صاحبي ورحنا شفنا العربيه.......
الميكانيكي قال فيها شعر وهوا إلي جربها
المهم...أنا سألت عليها كام مره, وكان سعرها 60 الف..شويه فوق-شويه تحت حسب حاله العربيه.
العربيه دي كان أول كلام فيها 55 ألف عشان كان عامله كيلوات كتـــير
المهم
العربيه عجبتني..وكلام الميكانيكي ريحني
وإتفقفنا على 51 ألف..ودفعت عربون
وإستلمت العربيه تاني يوم
وروحت بيها...تخيلوا بقا كلام الناس..أبو واحد صاحبي شافها..طلعلي فيها القطط الفطسانه..مقلوبه..مخبوطه..ال مكنه مفوته..عفشه وحشه..
وكل الي يشفها يقولي مقلوبه..عشان رشت بره وواخده معجون
بس أنا فعلا إكتشفت إن الميكانيكي باعني لبتوع المعرض..والعربيه كان عدلها أقل من كده.
المهم في الكلام دلوقتي
نصيحه
حاول لو هتجيب عربيه..تجيب عربيه خرج بيت..مش خرج معرض
ده لو هتجيب مستعمل..
بس الأحسن..متجبش مستعمل,,أصله زي البطخه تمام..مهما جبت ناس تشوف وتفحص قبل ماتشتري.
ويقابلني واحد معرفه صاحب معرض ..يقولي الانسر دي أخدها منك على 40 الف....؟؟؟
طيب أموت نفسي ولا إيه
ربنا يعوض
أنا قلت أحكي الموضوع..يمكن حد يقراه ويستفيد منه...
أه
حاجه تانيه مهمه..
متدفعش مليم مقدم..ولا أي عموله إلا لما تكون ضامن حقك والموضوع يكون منتهي تماما
وإدعولي ربنا يديني خيرها...ويكفيني شرها
-
ربنا يعوضك خير ان شاء الله
وشكرا علي النصيحه
-
الميكانيكى هو ميزان العملية كلها .
كده كده هياخد فلوس و هو ملهوش دعوة بقي , فلازم يكون معرفة و معرفة قديمة كمان .
لان انا ليا تجربة مع ميكانيكى برده لحد دلوقتى بدعى عليه و مش مسامحه ابدا .
عموما ربنا يبارك لك فيها و يديك خيرها .
-
ربنا يعوضك عليك
منهم لله مش بقى فى امانه
-
بص يا ابو حميد انا عارف انك مش محتاج تسمع الكلام اللى مفروض اقوله بس كل شىء نصيب ودى نصيبك
خلينا ناس عمليه شويه واركن العواطف
شىء جميل اوى انك كنت راكب لانوس وبعدها ركبت لانسر خطوه كويسه كده بقا احنا بنبص من نصف الكوب الممتلىء
انا ممكن اقولك كلمه انا عارف انها تزعل بس انا هاقولهالك وياريت ماتزعلش منى فى التعبير ده وانا كنت زيك فى يوم من الايام واتعلمت الكلمه دى (وراء كل طماع نصاب) ماتزعلش منى انت طمعت وكان لازم تشير عقلك لما عربيه انت على يقين ان سعرها 60000ج وانت اشتريتها بمبلغ 51000ج ومن معرض والمعرض استحاله يبيع عربيه من غير مايكسب فيها ياعنى سعرها اكيد اقل من 51000ج
سيبك بقا من كل الكلام ده وخلينا ننزل على ارض الواقع
هانفترض ان دى عربيتك من الاساس وكان سعرها 60000ج وكانت سليمه وقدر الله وماشاء فعل والعربيه هانقول اتخبطت وهى مركونه والحمد لله انك بخير ومافيش حاجه حصلت مش كنت هاتصرف على العربيه دى وترجعها زى الاول
خلاص اعتبر ده اللى حصل
معنى كلامى اللى عاوز اوصلهولك هو انك تشيل فكره ان العربيه سيئه ووحشه من دماغك وتطلع من الحاله اللى انت فيها دى واعمل ميزانيه للعربيه وابداء اصرف عليها بحيث انك تكون راضى عنها ومش شايل منها
ابداء بالموتور والعفشه لو فيهم اى مشاكل اعملها وبعدها الصالون لو فيه حاجه اعملها واعمل ميزانيه صغيره كده بحيث انك تدلع وتروش العربيه وتعمل حاجه تخليك تحبها وانسى الموضوع ده واكيد انت اتعلمت وصعب تقع فى حاجه زى دى تانى
وبعدين مش كنت ركبت الاسبويلر على الانوس وخلاص :36_1_1[1]:
وربنا يوفقك ,,,:S_thum1[1]:
-
صدقنى الحكايه مش حكاية معرض ولا خرج بيت
فى الحالتين ممكن تكون كويسه وممكن تكون مقلوبه
وعلى العموم ربنا يباركلك فيها ويكفيك شرها
ويجازى الميكانيكى اللى ماعندهوش ضمير ده
-
معلش ، طالما إنك اتعلمت حاجة خلاص متزعلش ، لما تيجي تشتري ال بي إم إبقى خد بالك من الي اتعلمته
-
يا سيدى ولا يهمك انت جايبها ب51000 وهى تمنها 60000 يعنى عندك 9000 جنيه فرق المفروض كانوا يبقوا فى العربيه دلوقتى استعوض ربنا فى اللى حصل وب9000 اعمل عمره صاج للعربيه ومش حيبان عليها حاجه وهات جنوط اسبور وروقها وعلى فكره عربيه ممتازه ولو حبيت تظبطها حتريحك
وربنا يديك خيرها و يكفيك شرها
-
النصيب يا مان
إحمد ربنـــــــا
-
على فكرة سعرها مش 60 ألف ولا حاجة انزل السوق و اسأل عليها هتلاقيها في حدود 55 الف فابريكة ..
ف عربيتك ب 51 الف ف ده يبقى سعرها لو فيها شغل خوارج بس .. لكن لو راشة دواخل يبقى كتير عليها فعلا .. عموما ان شاء الله خير و ربنا يباركلك فيها و متسمعش كلام التاجر اللي يقعد يقولك 40 الف والكلام الفاضي ده .. اللانسر دي اكتر عربية ماشية في السوق و ممكن تنزل بيها سوق الجمعة تبيعها في ظرف ساعتين و يبقى التاجر او المشتري بيتحايل عليك كمان ..
Content Relevant URLs by
vBSEO 3.6.0 PL2