الموضوع: تقييم نص سوى للنيو لوجان

السلام عليكم ورحمة الله وبركاته ........ افتقدتكم كثيراً الفتره اللي فاتت دي يا وحوش ويا رب الظروف تكون احسن معايا وارجع اغرقلكم قسم الرينو مواضيع ومشاركات زي زمان .....

المهم اللوجان واكله دماغي ودماغ ناس كتيييير والكل نفسه يعرف عنها اي حاجه حلوه ولا وحشه قويه ولا ضعيفه الخ الخ.......وانا من الناس اللي كنت متابع جداً للعربيه دي ومعجب جداً بيها خصوصا الشكل المعدل منها ... الحمد لله ربنا قدرني واستغليت فرصة امتلاك احد اصدقائي اللوجان وقلت اتعايش معاها شويه واشوف العربيه دي فيها ايه شاددني كده ......... ندخل في الموضوع عشان حسن عيسى ما يزهقش مني ويقوللي ايه الرغي ده .

بداية اول ما تقرب من العربيه وتفتح السنتر تحس ان في مسدس طلع منه عيار ناري عشان يفتح الباب مش عارف ليه الصوت عالي اوي كده اللوك بتاعها حديد ولا ايه مش عارف لكن صوته ملفت جداً ......ندخل العربيه الكرسي فيها مريح كتير عن الفيرنا لكن وضعية القياده نفسها غريبه مش عارف الكرسي عالي ولا انا قصرت ولا الدركسيون عالي لكن هو وضع غريب لكن بتاخد عليه على طول لانها ( رينو ) او يمكن لاني ( رامي ) مش عارف ......تحط المفتاح في الكونتاكت وتبدء اول تكه .......... تحس بتدفق البنزين من الخلف وصوت خفيف كده لمدة ثانيه.........اول ما ركزت على اللمض اللي في التابلوه تعبت نفسياً وقلت حسبي الله ونعم الوكيل.......العداد مليان مؤشرات وعلامات لكن عشان انت اكيد في مصر الحاجات دي كلها عيب تنور في تابلوهات عربياتنا !! كل اللي بينور من بين 10 مؤشرات على الاقل 2 لمبة البنزين و لمبة الايرباج للسائق..........حتى لمبة حزام الامان مفصوله قال يعني سينسور الحزام لو اتحط هايغللي تمن العربيه !! ..... بعد الحاله النفسيه اللي دخلت فيها قلت انتقل الى مرحله تاليه وقلت ادور بقى العربيه ...... تحولت الحاله النفسيه من احباط وزعل الى انبساط وفرح .....الموتور تدوره كده تحس بقوه وهيبه كده فيه مش موتور عربيات تانيه تدوره تحس ان فيه تروس جوه بتتكسر او عربيه تانيه تحس ان فيه تيس زي اللي فطرنا بيه من كام يوم بينعر ...... لأ صوت محترم وموزون ويوحي بالقوه والكبرياء.........يعني فوق يابني انت وهو وخدلك بق بنزين ......... دي مش عربيه يا اساتذه .......دي رينووووووو......

الاضاءه الداخليه للعدادات محترمه جداً جداً مع اني كنت شايقها منخفضه اول مره اركبها الا اني حسبت العكس لما اتعودت عليها واتحركت بيها كتير ..... اضاءه جميله ومحترمه ومريحه مش محتاج تكون اقوى من كده وبعدين مبهجه لونها برتقالي كده ونور التابلوه اخضر مع نور الشبوره برضه اخصر مع الاشارات مع الازرق بتاع النور العالي بجد منظره جميل ومتناسق وجذاب....الكونسول الامامي شكله مقبول جداً وخاماته جيده ومقبوله الى حد كبير .... الفضي بالنسبه للفول اوبشنز متوزع كويس ومدي انطباع محترم جداً بجانب اضاءة الكاسيت برتقالي ايضاً والغريب انه بينور مع نور التابلوه مش لما تشغل الكاسيت!! ودي حركه عجبتني اوي لانها بتدي عمق للتابلوه وجمال ...... زراير التكيف نورها لا هو اصفر ولا هو برتقالي لكنه قوي وواضح وجميل......

بعد حوالي ربع ساعه قاعد في العربيه نص قاعده وبافعص في التابلوه والدركسيون والحاجات دي قلت اقفل الباب بقى وندخل في تقييم من زاويه اخرى........تجربة القياده والعزل والتكيف والفرامل والاستجابه للسائق والاتزان ........كل دي حاجات حطيتها في الاعتبار وهاسردها ان شاء الله بتفصيل معقول على قد ما اقدر وربنا يكرم واقدر افيد الناس اللي نفسها في العربيه دي وربنا يرزقهم اياها ان شاء الله لانها بجد صفقه رابحه حتى لو لنا مآخذ عليها فا الكمال لله وحده .........

عشان اقدر اخد صوره كامله عن العربيه واتعامل معاها ببراح قررت اني اخدها في مشوار على الصحراوي واعملي 200-300 كيلو بيها .

اول ما تيجي تتحرك بالعربيه يشدك سهولة الدبرياج .........غرييييييييب جداً عمري ما شفت ولا هاشوف دبرياج خفيف زيه وسلس زيه كده.......تمد ايدك على الفتيس تلاقي عكس المرونه والنعومه دي تماماً .....الفتيس عجيب ودايما معترض على النقله! يعني اكون عاوز اطلع من تاني للتالت تلاقيه قاافش في التاني زي ماكون باخلعه مش بانقل ......90 % الموضوع ده دلوقتي بس عشان العربيه جديده وماتحركتش لكن في المجمل الفتيس مش فاهمه ........ مع انه في طياته ناعم جداً ومرن جداً يعني تنقل النقله لا تسمع صوت ترس بيخبط في اخوه ولا تحس اصلاً انه بيعشق في حاجه انت بتنقل الفتيس بس في اتجاه الاول والتاني والتالت لكن مابتحسش انه عشق خالص ودي حاجه انا شايفها كويسه ومدياني ايحاء ان علبة التروس في العربيه دي بلاستيك مش حديد !!......المهم بدأت اتحرك بالعربيه وهنا ابهار تاني ......استجابة الموتور رهيبه ....... حساس جداً لدوس النزين لدرجة اني بقيت المس بس دواسة النزين عشان ما احرقش من اولها كده وصاحب العربيه يرميني منها وماعرفش اقيم..........

كفايه كده انهارده عشان اخوكم خلاص شايف الشاشه بتتشقلب ............ ان شاء الله هاكمل تقييمي وعلى قد ما اقدر هاغطي اي استفسار واسئله بس الوحوش اللوجانويين يشدوا حيلهم معايا مايسيبنونش لوحدي حيث اني باقول انطباع فقط عن سياره لكن مالك العربيه معاه العربيه على طول واكيد اتعرض لمواقف ومشاكل وحاجات من دي وبالتالي هم اقدر مني كثيراً في توضيح مثل هذه المسائل ..........

اراكم في الجزء التاني من التقييم ان شاء الله ............ واهو فرصه يكون استوى شويه بدل ما هو نص سوى بس..........

سلام عليكم