يا احباء ميتسوبيشى توجد الان فى السوق لانسر ex1500 اوتوماتيك استيراد بسعر 114000 جنية فقط افيدونا عن هذة السيارة وهل هذا السعر مقابل مواصفات اقل (يقال بأنها بمواصفات اردنية) وهل مستقبلا ممكن صيانتها فى التوكيل ارجو الافادة
عرض للطباعة
يا احباء ميتسوبيشى توجد الان فى السوق لانسر ex1500 اوتوماتيك استيراد بسعر 114000 جنية فقط افيدونا عن هذة السيارة وهل هذا السعر مقابل مواصفات اقل (يقال بأنها بمواصفات اردنية) وهل مستقبلا ممكن صيانتها فى التوكيل ارجو الافادة
ايرت حد يفيدنا وياريت حد يفهمنا نعرف الاردني من الخليجي من المصري ازاي؟؟
التفاصيل في هذا الموضوع
http://www.nilemotors.net/Nile/85612-a.html
باشمنهدس طارق كل سنه وحضرتك طيب بمناسبه رمضان ولو انها جات متاخره
انا كنت اتكلمت مع حضرتك من فتره عن الشارك وكنت فعلا نازل وناوي الشرا بس قولت استحمل شويه واصبر شهرين او تلاته لحد شهر 12 وتكون مموديلات 2010 نزبت ويمكن ترخص 2009
عموما انا لفيت كتير عالمعارض وبلاقي العربيه عند كل واحد بسعر وبشكل تاني
يعني مثلا انا لقيت موديل glx عند سمير ريان الاقي فيها جنوط اسبور وبسال الموظف قالي اه ودي خليجي وفي نفس الوقت لقيت هناك واحده gls من غير جنوط ودي بسعر ودي بسعر والموضوع من غير ظوابط ولا اي حاجه وبيشيل من هنا ويحط هنا
عموما واضح ان موضوع الشراء ده صعب شويه ولازم الواحد يفتح عينه شويه انها لقيت اول ليفل اتوماتيك عنده 114 الاف وفيها جنوط ونور شبوره خليجي
مهندس طارق ليا سوءال وحيد ومحدد بس ياريت حضرتك تجاوبني عليها بالتفصيل والشرح مع امثله واكون شاكر جدا لحضرتك
ازاي انا كمشتري عادي افرق بين الانسر شارك الخليجي عن بعضها زي الاماراتي او السعودي او الكويتي والفرق بينهم وبين الاردني ... وفي الاخر ايه الفرق بين دول كلهم عن المصري؟؟
وتقبل مني فائق الاحترام والتقدير
انا لقيت الشارك البيزك اوتوماتيك ب 114.000 بس مفهاش لا جنوط و ولا فوج لايت عند ناشونال موتورز
الموديل اللي فيه جنوط و فوج و كاسيت اصلي ب 123.000
يا ريت تقولي الاسعار اللي انت شفتها لقيتها فين لاني ناوي علي الشراء باذن الله
علي فكره المواصفات بتاعت الاسعار دي مواصفات سعوديه
سمير ريان
سمير ريان معندوش غير توكيل
لا يا باشا انا كنت هناك يوم الاحد اللي فات وعنده 3 عربيات شارك خليجي
انا كلمته في التليفون و قالي هيبجيبلي العربيه من بره و سعر الهاف اوبشن هوه هوه زي بره ب 123.000
الف شكر ياجماعة على المدخلات الرائعة واللينك الجميل من البشمهندس طارق بس الى أنا شفتة من المداخلات السابقة ان لانسر الشارك الاوتوماتيك اللى نازلة ب 114000 عند ناشونال موتورز ناقصة غطاء للمحرك وكاسيت وجنوط
الكاسيت والجنوط ممكن نركبهم بعدين لكن هل غطاء المحرك دة مهم ؟
والصيانة الخاصة بالشارك الخليجى بتتعمل فين
بصراحة أنا كنت ناوى اجيب سيراتو بس لما سمعت اسعار الشارك الجديدة قررت اعادة النظر خصوصا انا بحب ميتسوبيشى ومعايا كريستالة 99 بس الاسعار العالية بتاعة الوكيل كانت مطفشانى من الموديلات الجديدة
اكون سعيد جدا لو الباشمهندس طارق رد على وياريت اى حد اشترى العربية دى من ناشيونال موتورز يطمنا اكتر عليها
كل الفروق بين المصري والخليجي وبين الخليجي والخليجي فروق كماليات حيث ان كل وكيل بيختار مجموعة من الكماليات تكون مع كل موديل GLX , GLS half sport , GLS Sport
الخليجي بيتعرف بلد الاستيراد فيه من على قايم العربية عند السائق
الفرق بين المصري والخليجي
ان المصري يتميز بزجاج فيميه خلفي وزجاج ابواب خلفية ويسجل على الرخصة اما الخليجي زجاج عادي
بعض الخليجي وخاصة الكويتي يتميز عن المصري بفوانيس الزينون المتحركة ، وحساس الضوء والمطر في الزجاج الأمامي ، سي ديكفورد 9 سماعات منهم صب في الشنطة الخلفية بدلا من 6 سماعات فقط
غطاء المحرك يباع لوحده كقطعةغيار اعتقد حدود 400 جنيه
الف شكر يا باشمهندس ودايما عودتنا عالشراح الكافي والرد الوافي لكل اسئلتنا ولك جزيل الشكر
اشتريت لانسر شارك الكاملة من ناشيونال موتورز اسيوط اول الشهر و طبعا يادوب مشيت بيها حاجة بسيطة لغاية ورقها ما خلص ... وفجاة قفلت العربية بالريموت عادى خالص و نزلت اشترى حاجة ... رجعت لقيت العربية مش راضية تفتح خالص !!!
قعدت ادوس بالريموت اكتر من مرة فى كل حتة مافيش فايدة !!!
قلت خلاص افتح بالمفتاح ... وكانت الصدمة ان المفتاح مش راضى يفتح !!!!
كلمت التوكيل و كان الرد : هات سمكرى يفكلك الشبكة اللى قدام و يكشف على البطارية اكيد ضعيفة (مع انى كنت ماشى بالعربية!!)
انا كنت هاتجنن لسة شارى العربية و افك الشبكة ؟
لا و كمان سالت ايه دخل البطارية بالباب اللى مش بيفتح بمفتاحه ؟؟؟؟
وكان الرد : ؟؟؟؟ لا احد يعرف !!!
المهم انا كنت ع الطريق و ما فيش حد ... تطوع واحد كهربائى طيب ييجى معايا و لما شاف العربية جديدة صعب عليه و قال لى : لو فكيتلك الشبكة الدنيا قدام هتبوظ !!
وسالنى : مفيش مفتاح تانى ؟ وافتكرت انى سالت نفس السؤال وقالولى لا هوا واحد بس !!
المهم قدر عن طريق الرفرف يفتح الكبوت و يوصل للبطارية و لقيها سليمة خالص !!
طبعا حصلت بهدلة علشان يوصل للبطارية دا غير الحاجات اللى قعد يجربها و كنت واقف جنبه حاسس انى هاعيط من المهزلة اللى عايشها مع عربية المفروض انى جايبها جديدة و دافع فيها تحويشة عمرى ودلوقتى بقها مفتوح و بيتلعب فيها !!!
خدت تاكس ودخت على بتاع ساعات علشان اغير حجر الريموت (يمكن ؟) وقالولى الحجر سليم خالص .. مع كدة حطيت واحد جديد !
المهم جربنا كل حاجة و مفيش فايدة ... اتصلت بمهندس الشركة و كان رده انى اجيبله العربية القاهرة (طبعا كوميديا لو عرفتوا ان العربية واقفة فى طريق اسيوط - سوهاج و مش بتتحرك !!! دا غير انها اتوماتيك ما بتتزقش)
دا غير الوقت اللى ضاع و البهدلة اللى خدتها و انا دلوقتى سايب العربية على الطريق و مشيت اشوف شغلى
لو برمجة المفتاح طارت المفتاح هيفتح الكالون بتاع الباب عادي
انا قلت نفس الكلام بالحرف لبتاع التوكيل .. وكانت الردود :
-العربية دى جاية بمفتاح واحد !!!
-موضوع ان المفتاح ما بيفتحش دى غريبة و عمرها ما حصلت !!
اللي انا باقوله
فيه حاجة ملعوب فيها مش تمام
انا سألت مدير الصيانة على الموضوع ده قال لي
فيه مفتاح طوارئ حديد داخل الريموت (يتم سحبه من مكانه فيظهر مفتاح كامل عادي جدا حديد) بحيث ان المفروض يتم الفتح به في حالة ما اذا الريموت لم يعمل فأنا مستغرب جدا ان المفتاح الحديد لم يفتح الباب حيث ان فتح الباب في الحالة دي ليس له اي علاقة بالدوائر الكهربية
, شنطه العربيه مش راضية تفتح بالريموت و مافيش مكان لمفتاح !!
انا اعصابى اتحرقت .... كل يوم يقولولى هانبعت لك حد ... و العربية واقفة على الطريق
حضر احد الفنيين بعد ان قام احد العاملين بالتوكيل بالاتصال به .. و الرجل فنى تويوتا اصلا ... لما شاف العربية قال لى :
يا باشا ايه البهدلة دى !!!
طبعا صعب عليه منظرها و طبعا هوا عارف انها عربية جديدة
المهم باستخدام عتلة حديد عرف يفتح الباب ولقى كالون الباب بايظ خالص و قال بالحرف :
انا عمرى ما شفت حاجة زى كدة فى عربية جديدة فى حياتى !!!
وسالنى - كالعادة - على المفتاح التانى !! و كالعادة برضه استغرب خالص لما سمع موضوع انى استلمت واحد
و لقى الريموت بايظ خالص و قاللى تشغلها بالمفتاح و انا هاظبطلك الكالون
وطبعا انا دلوقتى كل حاجة باعملها بالمفتاح
اتصلت بالتوكيل "ناشيونال موتورز" وكان كلامهم معناه "بالذوق" = اخبط راسك فى الحيط !!
ولكن علشان يثبتوا انهم لسه بنى ادمين دلونى على ورشة فى القاهرة اعمل مفتاحو اصلح الحاجات اللى باظت على حسابى !!!!!!!!!!!!!!!!!!
الحكاية خلصت بالاتصال التالى من احد العاملين بالتوكيل :
"ياريت يا دكتور ما تتعبش نفسك لان انت اللى هتتاذى !!!"
"يعنى ايه ؟ ... انا هاعمل محضر و اكلم بتوع حماية المستهلك"
ضحكة قصيرة (زى بتاعة بتوع المافيا فى الافلام الاجنبى)
"يعنى عماد بيه بيقول ما تتعبش نفسك لان انت اللى هتتاذى"
والبقية فى حياتكم فى الامانة والصدق والاحترام و الالتزام و ...و..
واهلا بالغش و النصب و الاحتيال و البلطجة و ...و...
وابعدوا عن ناشيونال موتورز النصابين ...
وكل سنة و انتم طيبين !
اخى العزيز، انقل القصة الى موضوع جديد فى المنتدى العام بكل تفاصيله، وصدقنى ان المنتدى بيقراه الآلاف وكل من هؤلاء الألاف بيحكى للعديد من اصدقائه، وساعتها هتكون عملت للناس دى فضيحة فى سمعتهم وفى اكل عيشهم تساوى البهدلة اللى انت اتبهدلتها، لو عشرة اشخاص فقط بناء على قرائتهم للموضوع غيرو رأيهم من الشراء من هذة الشركة الى مكان آخر يبقى انت خسرتهم 150-200 الف جنيه على الأقل