الموضوع: انا متضايق اوي من نفسي

طبعا اول حاجة الحمد لله على كل شيء و لازم الواحد يتعلم من اخطائه و دي مفيهاش نقاش ..
انا والحمد لله طلعت لانسر 2007 زيرو من التوكيل في اواخر سنة 2006 و كانت 1600 مانيوال بضمان مصرية و كان تمنها وقتها 100 الف جنيه
المهم العربية فضلت معايا سنتين والحمد لله مكنش فيها خدش لغاية ما عملت بيها حادثة كبيرة عالدائري و العربية اتعجنت من قدام .. المهم ساعتها حصلي كسر في فقرتين من ضهري و نمت في السرير شهر .. و والدي اخد العربية و راح وداها عند سمكري حوادث معرفة واحد صاحبه و كل العربيات عنده غالية سواء كانت سيفيك 2008 او جيتا او ياريس .. كلها غربيات عاملة حوادث و بيشتغل فيها .. المهم اخد مني العربية و قاله هشوفلك هتحتاج ايه بالظبط .. المهم قعد يحل في العربية من قدام و يشيل المكسر و يرميه و رفع الماتور و العربية بقت فاضية من قدام .. قالي العربية دي محتاجة نص كامل من غير ماتور و فتيس ..نزلت الحرفيين دورت ملقتش نفس لون عربيتي اللي هو الفيراني .. المهم قالي هتصرف و هات الفلوس و انا هجيبهولك ف راح جابلي نص فاضي خالص و عفشة استيراد ب 10 الاف جنيه .. و اتفقنا على 3 الاف جنيه مصنعية و اتكلنا غلى الله .. المهم العربية فضلت عنده شهرين قطع النص القديم و ركب النص الجديد و جابلي بقية الحاجة تايواني من فوانيس و اكصدام و شبكة و رادياتير و سربنتينة .. و لما جه يرشها قام راششها برة و جوة .. طبعا انا اتضايقت انه رش دواخل و اتخانقنا و بتاع قالك عشان اللون كان اغمق من اللي بينزل هنا في مصر .. المهم جه معاد تسليم العربية سلمهالي موتورها بيقطع و صوت ترزيع في الماتور و من غير عمة هوا ولا ايرباج و اخد مني الظبط 16 الف جنيه .. طبعا انا اخدتها منه على اساس اني خلاص اتخنقت منه و قلت الحاجت الباقية دي بسيطة و هبقى اعملها في التوكيل لما افضى .. المهم تعايشت بالعربية كدة لمدة 5 شهور و قلت اوديها التوكيل يكشفوا عليها و يعملولها صيانة .. رحت قالولي العربية دي كانت عاملة حادثة جامدة و الشاسيه بتاعها من تحت معووج والعربية من تحت ملووحة فالاكس اللي ماسك العجل ملووح شمال سنة ف الماتور بيلف العجل غلط فرزع .. قلتله طب دي لو صلحناها عندكوا هتتكلف كام قالي هتعدي ال 20 ألف .. قلتله شكرا و تاني يوم طلعت عالحرفيين وريتها لميكانيكي قالي الماتور نقصه زيت في الحادثة ف السبايك اتهرت فقلتله هتتصلح بكام قالي هتكلف 2500 ل 3000 جنيه و قالي الحساسات كلها مكسرة منهم حساس الكرنك و حساس ال tps و دول هيتكلفوا الف جنيه .. قمت سألت عالايرباج ب 2500 جنيه قلت الحم القديم المقطوع و ارشه و خلاص عشان الشكل فقط ب 350 جنيه .. و اشتريت عمة هوا استيراد ب الف جنيه..
المهم قلت ابيعها على عيبها عشان مش قادر اصرف عليها اكتر من كدة .. فقلت انزل بيها السوق .. سألت على اختها فابريكة برة و جوة كانت بتتباع ب 80 الف .. قلت انزل 5 الاف و اعرضها ب 75 الف .. ف جالي اشكال و الوان و كنت لما بقول عاوز فيها 75 الناس تقولي دي رشة دواخل و متسواش اكتر من 65 ألف .. المهم انا طبعا اتضايقت و صبرت عليها شوية مكانش حد بيتكلم غير في ال 65 ألف حتى لما طلبت سبعين محدش كان عاوز يشتري .. المهم اتخنقت و قلت اخلص منها.. فجالي تاجر قلتله على كل حاجة فيها من اول الماتور لغاية الشاسيه و الايرباج و خلصت معاه على 66 ألف ..
بعد ما مضينا العقود و استلمها قعدت اقول ازاي لانسر 1600 سي سي و 2007 تخلص ب 66 ألف .. بجد انا قربت اتجنن مش عارف هل انا اتسرعت في البيع ولا هو ده تمنها بعد الحادثة ولا ايه .. ربنا يعوض عليا .. يا ريت تقولولي هل انا اتسرعت ولا كان تفكيري في حاجة غلط ؟ و متأسف للاطالة

اظن العيب مبدئيا من الصنايعى وهو على اساس كلامك
لان المفروض كنت تروح لواحد صانيعى عنده ضمير وشاطر لكن ماتروحش لواحد يمص فى دمك
على العموم حصل خير وكويس انك بيعتها وبأذن الله ربنا يعوض عليك وتجيب احسن منها