مشكله فتيس لانسر كريستاله 98 اتوماتيك

**ConDoR** · 08-09-2009 01:15 AM

بسم الله الرحمن الرحيم

انا اخوكم في المنتدى واسمي كريم متابع المنتدى من زمان جدا بس اول مره اكتب عن مشكله اتمنى الاقي طوق النجاه بعيدا عن افتاءات الميكانيكيه خصوصا لما تكون حاجه حساسه زي الفتيس الاتوماتيك

المشكله بدات عندي لما غيرت الكربراتير بواحد استيراد من بره لان الكربراتير القديم كان بيقطع قررت اني اجيب واحد استيراد واريح نفسي من الفك والتركيب والتصليح ودفع الفلوس وفي الاخر مفيش نتيجه

ركبت الكربراتير والحمدلله شغال تمام ومفيهوش مشاكل واكتر من ميكانيكي شكر فيه بس بعد فتره كنت مسافر وكنت محتاج الكيك داون بس للاسف مكانش شغال حاولت فيه بس مفيش استجابه خالص بعد ما رجعت رحت للميكانيكي وقالي فيه حساس في الكربراتير بتاع الكيك داون قالي دا بايظ رحت سألت عليه وكان سعره حوالي 170 جنيه هو عباره عن فيشه كدا سودا في جمب الكربراتير ناحيه الاسبراتير

الميكانيكي قالي انا ممكن اعمله ليك ونوفر فلوس قلت امين فك الفيشه نضفها وروق عليها وغسلها بالبنزين وجاز ومش عارف بصراحه عمل ايه تاني ركبناها طلعن على الطريق مفيش استجابه رجعت البيت وانا محبط وقلت الحمدلله

تاني يوم نازل دورت العربيه نقلت على ال d كانت المفاجاه ان الغيار مش بينقل الاربي ام بيعلى لحد 7 بس مش بتجيب التاني رجعت البيت وانا مش حاسس بالدنيا ركنت العربيه ونزلت بليل اجرب تاني مشيت بالراحه كدا الفتيس نقل قلت الحمدلله تاني يوم نفس المشكله ادوس والاربي ام يعلى والعربيه مش بتنقل للتاني رحت لميكانيكي تاني قالي احنا نفصل الفيشه وفعلا شلناها وبنجرب الفتيس بيهرتل شويه ينقل وشويه لا بس لازم اشيل رجلي بس لما احرق احس انه بيعمل كيك داون ويجمع لحد 4 ويطلع مره واحده بس في الاخر بتنقل مش زي الاول مش بتنقل خالص

قالي تعالى بكره نغسل الفيشه بالبنزين وترجع تنظم النقلات تاني بس امشي براحه ومتحرقش على الغيارات

معلش انا متاسف طولت عليكم بس خايف الفتيس يكون باظ او حيبوظ ومش عارف اعمل ايه

شكرا

**samirayad** · 08-09-2009 01:19 AM

طيب ماتكشف على زيت الفتيس والفلتر بتاع الفتيس
وياريت تقولنا الزيت لونه أيه دلوقتى

**ConDoR** · 08-09-2009 01:35 AM

شكرا يا استاذ سمير على سرعه مداخلتك بس انا كشفت على الزيت والزيت كويس ولونه تقريبا شبه احمر دم غزال بس مش عارف بجد اعمل ايه ازاي اعرف ان الفتيس بايظ او لا وياريت المشكله جت لوحدها كنت قلت الفتيس بس مش عارف برده الحساس او الفيشه هي اللي بتعمل كدا ولا الفتيس اللي بيعمل كدا ولو بايظ ايه علاماته

**samirayad** · 08-09-2009 01:42 AM

وقالي فيه حساس في الكربراتير بتاع الكيك داون قالي دا بايظ رحت سألت عليه وكان سعره حوالي 170 جنيه هو عباره عن فيشه كدا سودا في جمب الكربراتير ناحيه الاسبراتير

فى الغالب ده حساس ال tps
أى حساس تحديد وضع وشكل فتحة باب الكربوراتير لوحدة تحكم الفتيس
وبالتالى الوحده بتعرف من أشارة الحساس ده التسارع المطلوب
أو الكيك داون زى مابتقول
ويجب أنك تغير الحساس ده ( علشان الفتيس يشتغل كويس )

والحمد لله طمنتنى أن الزيت لونه أحمر بقولك هذا

انا كشفت على الزيت والزيت كويس ولونه تقريبا شبه احمر دم غزال

وكده مجموعة كلاتشات التعشيق تمام والحمد لله
وباقى تشوف موضوع حساس تحديد وضع البوابه (بوابة الكربوراتير )
أى ال TPS SENSOR

**ConDoR** · 08-09-2009 02:03 AM

انا مش عارف اشكر حضرتك ازاي انت انسان محترم وخدوم جدا بس ممكن حضرتك تقولي كدا الفتيس كويس ولا فيه حاجه وازاي اعرف انه فيه حاجه

وبالنسبه لحساس ال tps هو كان شغال كويس بس لما اتغسل واتروق باظ مش عارف ليه وياترى لو فصلته زي ما انا عامل دلوقتي دا يبوظ حاجه ؟ وهل المفروض لما افصله العربيه تمشي كويس ولا تهرتل زي عندي كدا لانها شويه تنقل على 3 rpm وشويه على 2 وشويه تجميل لحد اربعه وتطلع مره واحده مش فاهم ايه دا بالظبط

انا سمعت من الميكانيكي حاجه اسمها فالفات وحاجات كدا بس مش عارف ازاي اعرف الفتيس كويس ولا فيه حاجه اعذرني لو تقلت على حضرتك بس انا بجد محتاج النصح والمشوره

**samirayad** · 08-09-2009 02:11 AM

انا مش عارف اشكر حضرتك ازاي انت انسان محترم وخدوم جدا بس ممكن حضرتك تقولي كدا الفتيس كويس ولا فيه حاجه وازاي اعرف انه فيه حاجه

ياباشا الله يخليك ده من زوقك
على فكره أحنا بلديات
وأنا من جنبك ( مركز بسيون )
غرباوى برضه

والفتيس عندك كده
مكوناته الداخليه تمام
ولكن لازم تشوف موضوع الحساس ده
من غيره الفتيس حيبقى تعبان فى آداؤه

انا سمعت من الميكانيكي حاجه اسمها فالفات وحاجات كدا بس مش عارف ازاي اعرف الفتيس كويس ولا فيه حاجه

لا خللى موضوع الفلف بودى ده بعدين
وطالما الزيت لونه كويس ورايق زى مابتقول ولونه أحمر دم غزال ( شبه زيت الباور)
يبقى حوارى الفلف بودى سالكه تمام ومفيهاش سدد ولا حاجه
فيجب أننا نشوف موضوع الحساس ده الأول
فيه نوعين من حساسات الtps
واحد بيبقى على أتصال مباشر بكمبيوتر الفتيس وكمبيوتر المكنه
ونوع تانى بيبقى على أتصال بكمبيوتر الفتيس بس
أنت تقريبا عندك النوع الأول
ومن رأيى سيبك من موضوع الفلف بودى ده دلوقتى وركز مع موضوع الحساس
علشان تظبط عملية التحكم بتاعة الفتيس

وحجيبلك موضوع أنا عامله فى المنتدى التعليمى عن الفلف بودى للأطلاع فقط والتعرف على الفلف بودى

الفلف بودى

**ConDoR** · 08-09-2009 03:53 PM

المشاركة الأصلية كتبت بواسطة samirayad

ياباشا الله يخليك ده من زوقك
على فكره أحنا بلديات
وأنا من جنبك ( مركز بسيون )
غرباوى برضه

والفتيس عندك كده
مكوناته الداخليه تمام
ولكن لازم تشوف موضوع الحساس ده
من غيره الفتيس حيبقى تعبان فى آداؤه

لا خللى موضوع الفلف بودى ده بعدين
وطالما الزيت لونه كويس ورايق زى مابتقول ولونه أحمر دم غزال ( شبه زيت الباور)
يبقى حوارى الفلف بودى سالكه تمام ومفيهاش سدد ولا حاجه
فيجب أننا نشوف موضوع الحساس ده الأول
فيه نوعين من حساسات الtps
واحد بيبقى على أتصال مباشر بكمبيوتر الفتيس وكمبيوتر المكنه
ونوع تانى بيبقى على أتصال بكمبيوتر الفتيس بس
أنت تقريبا عندك النوع الأول
ومن رأيى سيبك من موضوع الفلف بودى ده دلوقتى وركز مع موضوع الحساس
علشان تظبط عملية التحكم بتاعة الفتيس

وحجيبلك موضوع أنا عامله فى المنتدى التعليمى عن الفلف بودى للأطلاع فقط والتعرف على الفلف بودى

الفلف بودى

دا شرف ليا ان حضرتك تكون غرباوي برده انا بجد متشكر جدا على سرعه تفاعلك اللي بجد طمني جدا وخلاني اتعامل مع المشكله بشويه تفكير وموضوعيه مش متسرع زي اي حاجه بعملها انا النهارده نزلت ركبت الحساس او الفيشه دي العربيه فعلا مش بتنقل خالص ولا على 6000 rpm نزلت فصلت الفيشه الحمدلله العربيه اشتغل تاني وبقت تنقل تقريبا الحساس دا اللي عامل المشكله كلها والمفروض اني اغيره انا سالت على تمنه استيراد ب 150 جنيه مش عارف كدا كتير ولا سعره مناسب
اتمنى المشكله تكون فعلا منه ...

بالمناسبه يا باشمهندس سمير انا ليا قرايب في برما جمبكم في بسيون يعني احنا جيران جيران يعني

**samirayad** · 08-09-2009 04:04 PM

نزلت فصلت الفيشه الحمدلله العربيه اشتغل تاني وبقت تنقل تقريبا الحساس دا اللي عامل المشكله كلها والمفروض اني اغيره انا سالت على تمنه استيراد ب 150 جنيه مش عارف كدا كتير ولا سعره مناسب

لا مش تقريبا ....دى باينه أهه
وثمنه مش غالى ولا حاجه
هاته وتوكل على الله
بس طالما أستيراد
يبقى تحت شرط التجربه

بالمناسبه يا باشمهندس سمير انا ليا قرايب في برما جمبكم في بسيون يعني احنا جيران جيران يعني

دا شرف لينا ياباشا
ماهما يادوب 12 كيلو تقريبا من برما الى بسيون

**aYaBooY** · 08-09-2009 04:42 PM

اسال عليه جديد الاول بكام لو فرق السعر مش كبير يبقي الجديد افضل

**ConDoR** · 10-09-2009 02:42 AM

الحمدلله غيرت الحساس والنقلات اتظبطت بس خد 180 جنيه والكيك داون اشتغل الحمدلله بجد من غيره العربيه ملهاش لازمه شكر

خاص للباشمهندس (سمير عياد) اللي رده طمني اوي وخلاني اتصرف صح والحمدلله انها مش مشكله فتيس