اجتماع سوء الحظ مع الجهل ، جابولي المكنة الأرض ، بس الحمد لله
أولاً دي مش أول مشكلة أقع فيها مع العربية ، أنا عربيتي ركنتها أكتر ماركبتها و مكلفاني ما يقارب الخمسين ألف إجمالي الحوادث ، و الله يا جماعة أكتر وقت العربية قعدت فيه من غير حوادث 3 شهور و عامل أربع حوادث في سنة واحدة . ( معملتش حوادث قبل السنادي ) .
آخر حاجة حصلتلي على الطريق الزراعي ، نازل بعد كبري قها الجديد ( مش عارف فين بالتحديد ) كانوا رصفين وش أول و سايبين مقلب في الطرق ، حته واطية عن بقيت الأرض مش عارف سايبنها ليه و بعدها على طول جزء عالي عن الأسفلت ، و الكلام ده في كرف ، المهم أنا ماشي على اليمين 80 أو 90 و جمبي لانوس ماشي جمبي و بطأ معايا في الكرف و زنقني في حارتي و لقيت الحوار ده في طريقي مش هعرف أفاديه من يإما هخبط اللانوس ، فأكلتها ، الغريبة بقى إن الخبطة ماكانتش قوية جدا يعني ، و العفشة الحمد لله سليمة ، الغريبة إن قاعدة الفتيس و قاعدة الماتور إلي عند الباور ( لانسر 2003 ) إتكسروا مع بعض( قاعدة الفيتيس كانت تعبانة أصلا ) ، فالمكنة اتهبدت فاتكسر ترس سير التقسيمة فقعد ينحل في السير لحد ما اتقطع و العربية بطلت .
هنا يجي دور الجهل ، كنت قال يعني بعمل تشيك على قواشيط البطارية و سير الدينامو و كل شوية أحاول أدور ، الحركة بتاعت التدوير دي جابتلي صبابات و داخل في نص عمرة و ربنا يستر على ابساتم و الكرنك . و الله العربية كنت مصلحها و صارف عليها 25 ألف قبلها بشهر بس . بس الحمد لله رب العالمين ، اللهم إن لم يكن بك غضب علي فلا أبالي .
المهم حبيت أكتب موقفي ده جايز واحد غيري يتعلم لما العربية تبطل منه لأي سبب ميحاولش يدور قبل ما يتأكد إيه السبب بالضبط ، و أنا شخصيا متعلمتهاش ببلاش .
طولت عليكم في أول مشاركة ليا أنا آسف .
