المطار من مصر الجديدة ثم فيصل

**wardet** · 08-09-2009 08:52 PM

ان شاء الله يوم الاحد رايح القاهرة
هبقى جاى من الاسكندرية الزراعى
هروح الاول مشوار عند ميدان الكلية الحربية
وبعد كدا هروح المطار اجيب خالى واحتمال اطلع على فيصل
ان عارف الطريق لغاية مديان الكلية الحربية
ياريت بقى ازاى اروح المطار وهركن فين ولو حبيت اطلع الدائرى عشان انزل منزل الكسندرية الزراعى ازاى
او لو حبيت اروح فيصل ازاى

**mahmoud_magdy** · 08-09-2009 09:29 PM

الطريق للمطار من الكليه الحربيه كالتالي
1- من عند صلاح سالم تطلع الكوبري الموازي للكليه الحربيه وتنزل منو وبكدا تكون في طريق المطار
2- في دخله بعد بنزينة موبيل اللي عند الشيراتون (مش عارف لسه موجوده ولا لا ) بس هي الدخله بتاخد اقصى اليمين وخد بالك لا تطلع الكوبري ولا تاخد الشمال (اقصى اليمين ) وبكدا هتكون في طريق المطار بردو
ملحوظه : انا معرفش فين ميدان الكليه الحربيه ولا عمري سمعت عنو او روحتو

الجزء الثاني وانت راجع بقى
1- طريق اسكندريه الزراعي : وانت راجع من المطار اخرج من الطريق اللي بيوديك على صلاح سالم خد بالك ان الطريق ده نفس الطريق اللي انت هتدخل منو لو جاي من صلاح سالم
المهم متطلعش الكوبري وبردو خد اقصى اليمين وهتلاقي الطريق تلقائي بيجبرك انك تدخل يمين لحد ما تلاقي الكليه الحربيه على شمالك
افضل مكمل زي مانت هتلاقي ملف مقسم لجزئين خليك في الجزء الايمين وافضل ماشي علطول هتلاقي السندباد على شمالك
كمل علطول لحد ما تلاقي كوبري اطلعوا وكمل الطريق لحد ما توصل موقف العاشر كمل في طريق مصر اسماعيليه والمره دي خد شمالك عشان هتاخد اول يوتيرن (قريب مش بعيد ) وتلف وترجع وخد يمينك وهتلاقي ملف لليمين وده هيكون الدائري وطبعا بتفضل مكمل علطول لحد طريق مصر اسكندريه الزراعي وبعديه بشويه بتلاقي طريق مصر اسكندريه الصحراوي

2- بخصوص فيصل ( الطريق الافضل بالنسبالي ) وانت خارج من المطار فاكر الكوبري اللي قلتلك بيطلع على صلاح سالم ؟
اطلع الكوبري ده وهتنزل منو على صلاح سالم وافضل ماشي علطول
لحد ما توصل العباسيه وهتلاقي كوبري اطلعوا وافضل مكمل علطول لا يمين ولا شمال لحد ما توصل منطقة السيده عائشه
ومن هناك اطلع كوبري السيده عائشه وافضل مكمل علطول لحد ما توصل الجيزه وبعد الجيزه هتلاقي كوبري بيوديك على فيصل تنزل منو تبقى في المنطقه المطلوبه

واضح طبعا انك من اسكندريه
خد بالك ان الكوبري كوبري والنفق نفق يعني مش العكس زي اسكندريه
التزم بالسرعات المكتوبه جوه البلد وبراها
والبس الحزام
ربنا معاك في مشوارك
لو في اي استفسار تاني أسأل وان شاء الله اجاوبك

**brown-eyes** · 09-09-2009 12:28 AM

انت هتروح فين في فيصل لانك لو رايح اول فيصل تفرق عن اخره لو اخر فيصل من ناحية ميدان الجيزة يبقي تاخد الدائري احسن وتنزل المريوطية وفي 5 دقايق هتبقي هناك لو رايح اول فيصل من ناحية ميدان الجيزة يبقي تاخد الدائري بردو وتنزل نزلت المنيب وممكن بردو من ميدان السيدة عائشة اهم حاجة التوقيت عشان الزحمة واحنا هنحاول نفيدك قدر المستطاع

**wardet** · 09-09-2009 01:03 AM

انا رايح فيصل عند شارع حسن محمد كدا
يعنى موازى للهرم فى الحتة اللى فيها كاير مول

**brown-eyes** · 09-09-2009 01:31 AM

انت كده تقريبا هتكون في نص فيصل علي ما اعتقد احسن طريق ليك هيكو انك تاخد الدائري وتنزل نزلت المنيب وتاخد شارع البحر الاعظم ولو الوقت مش زحمة يبقي تاخد صلاح سالم لغاية اخره هتبقي في الجيزة وتخش شارع فيصل

**wardet** · 09-09-2009 06:01 AM

المشاركة الأصلية كتبت بواسطة musiccairo

ملحوظه : انا معرفش فين ميدان الكليه الحربيه ولا عمري سمعت عنو او روحتو

دا يا باشا جنب ميدان تريمف
يعنى ميدان تريمف هو اللى بالاحمر وميدان الكلية الحرربية بالازرق

المشاركة الأصلية كتبت بواسطة musiccairo

كمل علطول لحد ما تلاقي كوبري اطلعوا وكمل الطريق لحد ما توصل موقف العاشر كمل في طريق مصر اسماعيليه والمره دي خد شمالك عشان هتاخد اول يوتيرن (قريب مش بعيد ) وتلف وترجع وخد يمينك وهتلاقي ملف لليمين وده هيكون الدائري وطبعا بتفضل مكمل علطول لحد طريق مصر اسكندريه الزراعي وبعديه بشويه بتلاقي طريق مصر اسكندريه الصحراوي

قصدك اطلع كوبري الهايكستب وافضل ماشي وادخل كدا

**wardet** · 09-09-2009 06:36 AM

هو انا لو رحت فيصل هيبقى قبل الفطار يعنى على 5 كده
هل الدائرى ولا صلاح سالم هيبقى اقل زحمة

**mahmoud_magdy** · 09-09-2009 03:23 PM

انا مش عارف احوال الطرق في الوقت دا جوه القاهره بتكون عامله ازاي بصراحه
لاني والحمد لله مجربتش امشي في الوقت دا في اي طريق داخل القاهره
لكن الدائري في الوقت دا بيكون متوسط لحد قبل الفطار بنص ساعه مثلا بيبدأ يبقى زحمه

خليك في صلاح سالم وحاول تبدر شويه عن الساعه 5