الموضوع: محطات البنزين وعمال الكاوتش

بمناسبة بنزينة التعاون.....انا حاسس ان البنزين بتاعها زفت وبيخلى العربية تقطع....حتى ال92... المشكلة اللى عندى ان فى الشركة اللى انا شغال فيها بيدونا بدل الانتقال فى صورة بونات بنزين بتاعة التعاون يعنى لازم اروح التعاون وانا ساكن فى المعادى واقرب بنزينة تعاون بالنسبالى هى بتاعة زهراء مصر القديمة(يعنى كمان مش منتشرة) وهى فعلا زى ماحضرتك قلت بنزينة كاها حرامية..تصور عرضت عليهم يشتروا منى البونات وانا امول من اى حتة عايزين يشتروا البون ابو 26 جنية ب 24 جنية رغم ان البون دة ثمنة فية يعنى لما بيتبقى منة فلوس باخدها كاملة وميقدروش يخصمة حاجة...ايام لما مكنش فية بونات كنت بمول من شل و موبيل وكانت الدنيا ماشية زى الفل.....على فكرة كان فية بنزينة تعاون عند مدخل المعادى واتباعت لأن كان اسمها كان مؤثر على شغلها.....بجد انا كرهت التعاون ومش عارف اعمل اية ياريت لو اى حد عندة حل.....
على فكرة انا كنت بدفع tips لكن قررت من المرة الجاية مش هسيب ولا مليم وهاخد حقى تالت و متلت ..حاجة تقرف... :x ....محمد يسرى....

كنت قد كتب هذا الموضوع على كونتاكت وأنقله الآن بمناسبة فتح موضوع مشابه:
أنا عن نفسي بافضل موبيل أو وطنية
أما شل تحديداً فأنا حريص على أل أدخلها مطلقاً بقدر المستطاع
لأن العمال إللي فيها في منتهى الجرأة والرخامة في طلب البقشيش أو مسح زجاج العربية، فبمجرد أن أدخل البنزينة يقوم أحدهم على الفور برش سائل على الزجاج لإجباري على تركه يمسحه، حدث ذلك في أكثر من فرع لمحطات شل
كما أنني تعرضت لمحاولة للسرقة في كمية البنزين إلا أنني كنت متيقظ لهم
المفروض على قد ماالواحد يقدر يبتعد عن المحطات اللي على الطرق السريعة والموجودة في الأماكن النائية لأنهم فعلاً بيلعبوا في البنزين ولا توجد صيانة بالمرة لخزانات البنزين مما يعمل على تواجد الماء بها إما من المياه الجوفية أو نتيحة للبخر وتراكمه في قاع الخزانات وده عن تجربة شخصية كلفتي مبلغ ليس بالقليل لإصلاح سيارة سابقة كانت معي.
تجربة أخرى أحكيها لحضراتكم للاحتراس وأخذ الحيطة:
كنت باعمل صيانة لعربيتي الاسبيرانزا عند أبو الفتوح اللي في طريق اسكندرية الصحراوي، خرجت من عندهم ودخلت البنزينة الموجودة مباشرة بعد مركز أبو الفتوح (أعتقد هى مصر للبترول)
بداية لم يكن عندهم بنزين 92 وهممت بالمغادرة فقال لي العامل إن الفردة الأمامية شمال نايمة، صدقته بحسن نية ورحت أزودها عند بتاع الكاوتش الموجود في المحطة (برده بحسن نية)
إلا أنه قال يجب الكشف على الفردة الأمامية يمين (تخيلوا مع إن المفروض الشمال هى اللي فيها مشكلة)
وكانت العربية أمام الكشك بتاعة بس بعيد حوالي مترين فطلب من التحضين باتجاه الكشك ورفع العربية بالكوريك وفوراً قال فيها خرمين وقال الواحد بتمانية جنيه قولتله ماشي اشتغل، إلا أنه طمع أكثر وأخذ يدعي إنه بيكشف على الفردة لحد ما وصل لسبعة خروم (تخيلوا سبعة خروم في فردة كاوتش عربية لسة في التليين) ووراني زجاج في الفردة، هنا عرفت أني وقعت في براثن نصاب لا يخشى الله لأني نظرت بجوار العربية لقيت نفس قطع الزجاج بلون أخضر منتشرة (علشان كده كان طلب مني أحضن بالعربية ناحيته حتى يأتي الزجاج بالمفعول ويحدث أكبر قدر من الثقوب)
إلا أنني اكتشفت الخدعة وطلبت مدير المحطة وعملت مشكلة كبيرة وكدت أن أستدعي الشرطة لولا تدخل رئيسهم واعتذاره
في هذه الأثناء لم ينطق العامل ببنت شفه وكنت أدعو الله أن يتكلم لأكون أنا المخطئ ولا أمنع عنه المقابل المادي لعمله، إلا أنه لم يدافع عن نفسه مطلقاً مما أكد لي موقفي فانصرفت قائلاً حسبي الله ونعم الوكيل
أسف جداً للإطاله
وائل عطية