بعد ما اشتريت العربية بشهرين ( انا شاريها اساسا من خمس شهور ) لمبة الاعطال نورت و العربية ابتدت ما تسحبش و تنتش و هى ماشية و بتتخنق لما ادوس فرامل فروحت على مقار بكل براءة ( لانى لسه مش فاهم حتى الان اى حاجة فى الاوبل و انا حبيت العربية اكتر بعد ما اشترتها ) و بعد الكشف قاللولى ان الماف عايز يتغير و مدير الصيانة من نفسه لقيته بينصحنى بتغييره بره لانه غالى قوى هنا و بره هو هو بس ارخص و انا طبعا عارف ان فى قطع غيار فى التوكيل بتبقى غالية جدا بدون سبب فسمعت كلامه و مشيت
و بعد كام يوم روحت لمركز اليسر بتاع حسام اوبل فى المعادى و اليكم الحوار مع الفنى اللى كان موجود فى الورشة ساعتها ( من 4 شهور )
انا: لمبة الاعطال نورت و العربية ابتدت ما تسحبش و تنتش و هى ماشية و بتتخنق لما ادوس فرامل
الفنى: هكشفلك عليها يا باشا....و بعد الكشف قاللى الماف عايز يتغير
و بعد الكشف قاللى الماف عايز يتغير
انا : عندك الماف الاصلى بتاعها ؟
الفنى : اه موجود
و دخل الورشة جاب واحد شبه اللى راكب تمام و مكتوب عليه BOCSH و made in Germany
انا: الماف ده جديد ولا استيراد ؟
الفنى : جديد يا باشا
انا : اكيد ؟
الفنى : اه ياباشا جديد و الله
انا: بكام
الفنى : 500 جنيه
انا : و الاستيراد بكام ؟
الفنى : 350 جنيه
قولت 150 جنيه فرق يبقى طبعا اركب الجديد
انا: طب ركبه بس اضمن منين انه جديد ( وش كدة )
الفنى: يا باشا امشى براحتك و جرب يوم اتنين تلاتة اسبوع شهر و لو فى اى حاجة يبقى بتاعنا
انا بصراحة اطمنت لكلامه و بينى و بينكم انا قبل ما اشترى العربية عرفت عن الاوبل انها جميلة و كل حاجة بس قطع غيارها غالية فقولت بس ابتدينا معاناة قطع الغيار اللى الناس حذرونى منها
اه عاوز اقول لكم انا كان معايا عربية ستروين zx اغلى قطعة غيار فيها تخص الموتور ولا الكهربا كانت بمية مية و خمسين جنيه فلما سمعت ان الماف ب 500 جنيه قولت عادى و ماجاش فى بالى ساعتها انى هتبهدل كدة
نرجع لموضوعنا ركبت الماف ( و اخدت فاتورة ) و مشيت بالعربية وكله تمام و العربية زى الفل
و ا ببتدت تظهر نفس العيوب تانى بعد شهر ين(يعنى من شهر ) فروحتله مرة تانية و كان ساعتها موجود البشمهندس حسام اوبل صاحب المركز و الفنى بتاع اول مرة ما كانش موجود فدخلت عليه عادى جدا و بعد السلامات اليكم الحوار
انا: عندى لمبة الاعطال بتنور و العربية بتقطع و مابتسحبش
هو: هكشفلك عليها حالا
سيبته يكشف و مستنيه بره العربية عشان عارف انه هيطلع يقوللى ماف
هو: نازل من العربية بكل بساطة يقولى فيها ماف
انا: ده انا لسة مغيره ( و قومت مطلعله الفاتورة بتاعت المركز بتاعه فى وشه من تاريخ شهرين بس ساعتها )
هو : اتكسف طبعا و بقى مش عارف يروح فين و قاللى هنغيره حالا لان الماف اللى راكب ده قديم
المهم الماف اتغير و غير برده ساعتها حساس الكولنت و بعد التغيير:
انا: دخلت فيه شمال بس بالذوق ازاى الماف اللى يركبلى يكون مستعمل و الفنى ساعتها قاللى انه جديد
هو : دى غلطة ياباشا و ده اتلغبط مع المافات الجديدة
المهم الحوار انتهى و العربية تمام و انا بسلامة نية صدقتهم للمرة التانية لانى برده مقتنع بان ال 500 جنيه اللى دفعتهم اول مرة يسوا تمن ماف جديد و اصلى
دلوقتى بقى العربية بقالها 3 او 4 ايام بتعمل بداية العيوب بتاعت ان الماف ضرب ( طبعا هى نفس العيوب اللى حصلت معايا مرتين بنفس الشكل ) بس لمبة الاعطال لسه ما نورتش وانا مش عارف اروحله لتالت مرة ولا استنى لما لمبة الاعطال تنور و لا انا اتضحك عليا كدة خلاص و لا دة مش تمن الماف الاصلى اصلا و لا ايه انا بجد اتخنأت لانى مش عارف حاجة فى حاجة اصلا
المفضلات