الموضوع: السلام عليكم..انا عضو جديد و محتاج مساعدتكم

السلام عليكم

اهلا بيك فى المنتدى , بالنسبة للهوندا 92 , 93 , 94

انا معايا ال 92 الحمد لله ,

شوف بقى انا هقولك على تفاصيل كل شئ بإذن الله , لإنى لفيت كتير اوى قبل ما اشتريها
وشوفت هوندات كتير

نصيحة مبدأية : هاتها اوتوماتيك , المانيوال هيقرفك فى شوارع القاهرة وهيخليك تزهق من السواقة

نقاط هامة بالنسبة ليك

- لما تيجى تشتريها بلاش تجيبها متظبطة اوى , لإن صاحب العربية هيحسبلك تمن الكماليات الزيادة عليك ومش هينقص من سعرها زى ما انت فاكر

- هات عربية يكون فيها كماليات معقولة مش زيادة اوى , يعنى حدودك تكون واحد حاطط الاتى ( جنوط , كاوتش عريض , زينون مثلاً )

- بلاش تجيب عربية فيها ( فلتر سبورت , مسقط موتور اعلى , عدادات إضافية على التابلوة او القايم ) الحاجات دى هتخلى سعرها يغلى على الفاضى بدون فائدة ليك اساسا

- وانت بتجيب هتلاقى موديلين ex و si , وهعمللك مقارنة بسيطة

الكماليات :

ex : ( تكييف , باور , سنتر , زجاج كهربا , مرايات كهربا .. إلخ )

si : كل كماليات ال ex بالإضافة لفتحة سقف ( إوعى تشترى ex وتعمل فتحة سقف بنفسك )

الموتور :

ex : بيكون 1500 سىسى كربراتير

si : بيكون 1600 سىسى إنجكشن

الشكل العام , ميفرقش الاتنين عن بعض إلا فتحة السقف بس
وبالنسبة لل ex احياناً مش بيكون فيها مرايات كهربا إلا فى الخليجى منها بس

الاتنين فى منهم اوتوماتيك ودة انا انصحك بية

ال si اغلى شوية من ال ex ودة شئ طبيعى


أول حاجة شوف كذا عربية , إتفرج و قلب فيها لحد ما تعرف الحلو من الوحش,
اكشف عليها فى بنزينة محترمة او فى توكيلها , أنا بيتهيألى البنزينة اسهل و اسرع و برضو نتايجها كويسة

السيفيك بشكل عام بيكون سعرها من اول 46 الف لحد 60 الف جنية
طبعا دة شامل الأوتوماتيك و المانيوال و الحالة و الكماليات

لو نفسك اوى تجيب عربية متظبطة ومش ناوى تجيب عربية عادية وتظبطها
يبقى خلاص , تجيب عربية متظبطة حديثا , يعنى تكون الحاجات اللى فيها مش مستهلكة اوى
ودة هيبان لك وانت بتتفرج بسهولة إن شاء الله

واى سؤال انا تحت امرك إن شاء الله