مقتل لواء شرطة في مصر برصاص مهربي مخدرات

**youssefmustang** · 12-09-2009 02:30 AM

طب يعنى ايه يا اخونا انا مش فاهم حاجة يعنى يعذبونا وينهبونا ونحبهم او على الاقل اضعف الايمان ما نتمنالهمش الموت !!! تيجى ازاى دى.... انا مش بقول كل رجال الشرطة لان فيهم بعض وقليلين جدا جدا جدا ناس محترمة ... انا لما قولت امناء الشرطة عشان الظباط بيرتاحو بيدو شغلهم للأمناء فالامين يحس انه هو بقى الظابط فايفجر على الاخر ويوقف ده ويشتم ده ... ظباط حديثى التخرج بتبقى قمة الغرور اللى فى الكون بتبقى ركباهم وفرحانين بالبدلة اللى لابسنها (موقف بسيط حصل معايا : كنت مسافر اسكندرية المهم انا قاعد ورا فى الكرسى اللى ورا السواق وواحد سنى راجل كبير يعنى 50 سنة قاعد قدام وبيقرأ قرأن جه عسلية جديد(طالب فى الشرطة) يقول للراجل انزل يا حج انا هاخد الكرسيين دول الراجل يقوله ازاى يا ابنى هو انا مش قاعد قاله قوم بالذوق بدل ما امسح بكرامتك الارض الراجل لاقيته اتحول وقلب الرجل الاخضر وراح ماسك ازازة عصير فيتراك وراح طخخخخخ مديهالو فى وشو ونزل فيه ضرب والواد مش عارف يعمل حاجة ولاعارف يشوف حاجة من كمية الدم اللى نزلت منه ....
طبعا فرحت الدنيا والاخرة مسكتنى ولا كأنى دخلت الجنة ... الناس تحوش والدنيا تحوش فى الراجل محدش قادر عليه وده يشتم ويسب والراجل مابيدرش عليه غير عمال يقوله : ماهو انتو اللى بوظتو البلد انتو اللى دخلتو المخدرات البلد مانتو اللى فتحتو بيوت الدعارة فى البلد ده لو اسرائيل محتلانا لحد دلوقتى مكنش ده حصل ... المهم فضينا المشكلة بالعافية ... والحمد لله ..خلصت على انه الطالب المحترم ركب بيجو 7 راكب ...)
ده موقف من اللى بيحصل قدامى من 100 موقف تانى..
تتوقعو انتو انا يبقى ردى فعلى للشرطة يبقى ايه لما اسمع ان حد مات فيهم..
عايز رأيكم بهدوء وبدون عصبية وبدون نصيحة عشان انا مش متعصب او متطرف
عايز رأيكم بحكمة و ديموقراطية...
اخوكم يوسف

**youssefmustang** · 12-09-2009 02:32 AM

المشاركة الأصلية كتبت بواسطة aif

الله يرحمه ويجعل مثواه الجنة
يا اخونا يوسف .... مهما كانت درجة كرهنا لبعض الظباط او الامناء الغير منضبطين ...
لا يصح ان نتمنى لهم الموت بهذا الشكل
سيدنا على لما بعض اتباعه ذكرو الخوارج بسوء .... والخوارج كانو بيقاتلوه .... نهاهم عن ذلك وقال ... انما هم اخواننا بغو علينا
تخيل ان واحد زميلنا في المنتدي ضابط شرطة او امين شرطة ... ح يبقى شعوره ايه لما يقرأ كلامك
وعلى فكرة هما مش كلهم وحشين ومش كلهم كويسين ....
يعني زي باقي فئات الشعب المصري ..... منهم الصالح ومنهم الطالح
لكن انت عممت كلامك علي الضباط الصغيرين والامناء .... واحنا في شهر كريم ... دي اكيد زلة لسان لا أكثر ...ارجو انك تستغفر الله
وكل عام وانت بخير

انت راجل زى العسل والله كلامك كله حكم
جزاك الله خيرا
اخوكم يوسف

**SeiffoZ** · 12-09-2009 02:35 AM

المشاركة الأصلية كتبت بواسطة newhansol

مقدرش اقول غير الله يرحمة

سؤال برا الموضوع ...

حضرتك جبت البادج الخاص بالقوات الجوية ده منين؟؟؟

**newhansol** · 12-09-2009 04:42 AM

لما كنت فى الجيش وبلاش بقى احسن حد يكون مباحث ولا حاجة يدور علينا ويقولك دة امن قومى ولا حاجة

**tmz9111** · 12-09-2009 11:53 AM

اللهم ارحم موتانا وموتي المسلمين جميعا

**SeiffoZ** · 12-09-2009 05:03 PM

المشاركة الأصلية كتبت بواسطة newhansol

لما كنت فى الجيش وبلاش بقى احسن حد يكون مباحث ولا حاجة يدور علينا ويقولك دة امن قومى ولا حاجة

أصل حضرتك البادج ده من البادجات إللى مانتشرتش على الإنترنت ...

حضرتك كنت مجند فى قاعدة جوية؟؟ و بالتحديد إحدى القواعد فى الدلتا أو فى غرب مصر؟؟

**newhansol** · 12-09-2009 05:21 PM

الاخ Relentless_mayhem
ننسى بقى موضوع البادج دة احنا ولاد النهاردة والى فات مات واهة ايام وعدت وربنا يجعل كلامنا خفيف عليهم
وكل سنةو انت طيب على فكرة البادج اتشال لدواعى امنية ومش هاقول اكتر من كدة

**SeiffoZ** · 12-09-2009 09:20 PM

المشاركة الأصلية كتبت بواسطة newhansol

الاخ Relentless_mayhem
ننسى بقى موضوع البادج دة احنا ولاد النهاردة والى فات مات واهة ايام وعدت وربنا يجعل كلامنا خفيف عليهم
وكل سنةو انت طيب على فكرة البادج اتشال لدواعى امنية ومش هاقول اكتر من كدة

هههههههههههه كلامك يضحك قوى .....

أيوة إللى فات مات ....

و تحيا القوات الجوية المصرية