الموضوع: لسكان مدينة نصر والعباسية .. أروح المكان ده ازاي

المشاركة الأصلية كتبت بواسطة justs

أنت تعرف EDS ؟ واشمعنى يعني عندي انترفيو فيها ؟ ما يمكن معزوم على الفطار عند واحد ساكن جنب النقابة.:10D5C8~1107:

على فكرة جنب نقابة التجاريين مفيش مساكن هنال عشان انا ساكن فى امتداد رمسيس

وعلى العموم هو احسن طريق انك تاخد الدائرى و تنزل نزلة الاتوستراد و تفضل مكمل علطول لحد لما تلاقى كوبرى اكتوبر عند نادى السكه تلف من تحت الكوبرى شمال فى اول يمين هتفضل ماشى علطول لحد ما تلاقى مستشفى الحميات و نقابة التجاريين على شمالك و هتلاقى EDS واخدة اخر 4 ادوار فى نفس المبنى و لو عاوز اى خدمه انا تحت امرك لان بردة كان عندة انترفيو هناك قريب

المشاركة الأصلية كتبت بواسطة د.أحمد سمير

يا جماعة مخرج صلاح سالم إلى شارع امتداد رمسيس اتقفل ..
يبقى يا إما السكة البيضا أو الفنجري .

أنا رأيي الشخصي أفضل طريقين هما ..
الطريق الدائري ثم المخرج اللي بعد كارفور
ثم طوالي لا يمين ولا شمال والعلامات المميزة هي
هتقابلك صينية المدافن عند مطلع المقطم وبنزينة وطنية على شمالك
كمل طوالي
هتقابلك بنزينة التعاون على يمينك عند مدخل الحي السابع
برضه كمل طوالي
هيقابلك تقاطع الجبل الأحمر
برضه كمل طوالي
هيقابلك تقاطع قسم مدينة نصر ثان عند مباحث أمن الدولة وفيها إشارة هناك
ممكن تدخل شمال في يمين وتطلع كوبري أكتوبر وتنزله تاني مباشرة هتلاقي النزلة محدوفة يمين شوية وبعدين تكمل حوالي كيلو متر واحد وتركن هتلاقي النقابة على شمالك
ليه تركن علشان لما ترجع تاخد صلاح سالم بدون مشاكل أو ترجع طوالي تاني ..

لو الوصفة دي توهتك بعد الإشارة كمل طوالي بجوار جامعة الأزهر
هيقابلك الأوتوستراد
هتلف وترجع من أول يو تيرن
إلى شارع الفنجري اللي على ناصيته قاعة المؤتمرات
وأول إشارة هتقابلك عند بوابة الاستاد بعد حوالي 500 متر من بداية الشارع هتخش شمال
إلى شارع ممدوح سالم أو شارع المعرض
هتكمله لآخره هتبقى في امتداد رمسيس على بعد 500 متر من النقابة على شمالك .

يبقى تاني نزلة كارفور طوالي لا يمين ولا شمال حتى الأوتوستراد أول يوتيرن أول يمين أول شمال من أول إشارة طوالي لنهاية الشارع يمين 500 متر واركن ..

الطريق الثاني :
صلاح سالم
سواء من الدائري منزل المعادي فالخيالة فمدينة الفسطاط
أو الدائري كورنيش المعادي الملك الصالح ثم نفق الملك الصالح
أو من ميدان الجيزة المنيل نفق الملك الصالح
زي ما تحب
وطوالي هيقابلك كوبري السيدة عائشة تطلعه
ثم طوالي حتى كوبري الفردوس تطلعه
ثم طوالي حتى كوبري العروبة فوق ميدان العباسية تطلعه
وبعدين هتلاقي أرض المعارض على يمينك وفيه في الأفق كوبري بالعرض
تحضن يمين وتدخل من جنب الكوبري إلى شارع الفنجري
ثم أول يمين مع سور المعرض لنهاية الشارع
ثم 500 متر حتى النقابة .

وتوصل بالسلامة

يا فندم ألف ألف شكر على اهتمامك ، وربنا يسلمك ،
هو فعلا الأحسن هو الطريق الدائري ، والباشمهندس احمد كمال مشكوراً بعتلي رقمه واتصلت بيه وحفظني الوصفة وكتبتها كمان ،

ربنا يا رب ما يحرمني منكم جميعا ويخليلنا نايل موتورز واهله