بنت بالف راجل-مهندسة منار وتجربة بنت عندها هدف

**Karim_Monir** · 11-09-2009 08:49 PM

سلام عليكم ورحمه الله
بتكلم النهاردة عن زميلتنا مهندسة منار
وكنت بنقل انشطة كتير من الجروب للمنتدى هنا للي عايز يشارك
http://www.nilemotors.net/Nile/93896-a.html
كنت بقلب على قناة اقرأ وشوفت زميلتنا في العمل الخيري مهندسة منار عقل مع الداعية مصطفى حسنى بتحكي تجربتها في بناء بيوت الناس المعدمة في الاماكن العشوائية
انا اعرف منار من 8 سنين تقريبا وحتى الان وكنا جروب كبير من المتطوعين
كتير منا تقاعس عن العمل الخيري يمكن بسبب ظروف المعيشة والجواز والابناء وكثرة متطلبات الحياة
ويمكن بسبب نايل موتورز كمان هاها
لكن هيا ما شاء الله واخدة كل مواضيعها جدا
وعندها هدف ومصممة علية انها توصله
ما بين انشاء جروب المنار وجمعية المقسطين للعمل الخيري ودي انشطتها كتير قوي
ما بين تحفيظ قرأن وكفالة ايتام واطعامات وكفالة مسنين ورعايتهم داخل الوفاء والامل وكمان مشاريعها انها تلم هدوم او كراكيب وتبيعها وتصرف منها على العمل الخيري
مش مجرد انها تنتظر تبرعات
ده فيديو لمهندسة منار في حلقة مصطفى حسني
انا كان بقالي كتير مش بسألها عن انجازتها
فوجئت ان عدد البيوت اللي بنتها بالجهود الذاتية 16 بيت
ايون 16 بيت في 4 سنوات ما بين بناء كامل او ترميم
وبالجهود الذاتية
والله فرحت لها جدا جدا وهيا بنت وحركاتها قليل وبتوازن بين عملها كمهندسة ونشاطها الخيري ومتطلبات حياتها
وخاصة انها مش معاها سيارة وده عاملها مشكلة كبيرة
بجد قد ما فرحتلها
حزنت على حال شباب كتير قاعدين على القهوة

ده الفيديو
بس ماتعيطوش على حال شبابنا زيي
Anmelden | Facebook

**icehearted girl** · 11-09-2009 09:23 PM

ربنا يباركلها ويبارك فيها ويعزها بالاسلام ويعز الاسلام بيها وبامثالها

استاذ منير علي فكرة مش معني ان حضرتك مشغول فشغلك تبقي مقصر انت ممكن تتطوع في اي عمل في اضيق الحدود

واوقات فراغك فقط او حتي من خلال شغلك الحقيقي او من خلال حتي نايل موتورز

ومهما كان العمل دا صغير متضمنش ممكن يشد معاه مين تاني

ولاتحقرن من المعروف شيئا

في جروب تم تكوينه مؤخرا عبارة عن حوالي عشر افراد مستمرين...مع شوية اصحابي وحوالي سبعين بييجوا ويرحوا

عاملين نموذج مصغر لجمعية خيرية للاسف مازالت غير مشهرة

بيشمل نموذج مصغر ايضا لتحفيظ قرآن وكفالة يتيم وبنك طعام لعدد محدد من الاسر ورعاية دور مسنين وايتام

وكفالة عدد معين من مرضي المعهد القومي للاورام وموائد رحمن رمضانية

وواحدة بواحدة بنتوسع في المشروع لحد منكون قديرين اننا نتحمل المسئولية دي رسميا

معظم الاعضاء فعلا مشغولين في دراستهم واشغالهم بس كله بيشيل بعض

**OlaOsman** · 11-09-2009 09:32 PM

منار ما شاء الله لا قوة إلا بالله عليها. ربنا يثبتها و يزيدها من فضله يارب.

**aymansaad** · 11-09-2009 09:50 PM

قال الرسول صلى الله عليه وسلم
ان لله عبادا اختصهم بقضاء حوائج الناس اؤلئك هم الامنون من عذاب الله يوم القيامة

**MoToRiZeR** · 11-09-2009 09:55 PM

تجربة رائعة فعلاَ !
يا ريت كل الناس - و انا منهم - عندهم نص المسئولية الإجتماعية دي .

معلش عايز اسأل سؤال برة الموضوع .

انا بصادف كتير يا جماعة متسولين .. و الحقيقة انا ضد التسول تماماَ
و لكن أحياناَ بيكون فيهم كبار السن و سيدات و بيكون شكلهم تعبان جداَ فعلاَ .
أعمل معاهم إيه !؟

هل اللي هديهلهم هيساعدهم في حاجة ؟! طب قد إيه ؟
مفيش جهة مثلاَ أقدر أوصلهم بيها تساعدهم في حياتهم ؟

انا فيه أماكن معينة بلاحظ إن فيه متسولين شبه دائمين في المنطقة دي و بيحكوا نفس القصة .
إيه الطريقة المناسبة للتعامل معاهم ؟

**Terrible_DaRsH** · 11-09-2009 10:19 PM

المشاركة الأصلية كتبت بواسطة motorizer

إيه الطريقة المناسبة للتعامل معاهم ؟

سيادتك تتوجه الى اى جمعية خيرية يكون موثوق فيها و تكون عارف مواردها بتروح فين و بتيجى منين .

و كل شهر تتبرع لهم بمبلغ , ايا كان المبلغ اللى هتدفعه و لكن انت كده قضيت فرض الزكاة اللى عليك .

تمام !

بعد كده كل اول شهر تاخد من كل فرد فى البيت المبلغ اللى هيتبرع بيه و توديه للجمعية .

و هما بدورهم هيوزعوا على المحتاجين و اللى يستحقوا بجد .

و لو متعرفش جمعيات خيرية فأنا اعرف جمعيات بنتعامل معاها من زمان بالنظام ده و بتقوم بتوزيع الزكاة على المحتاجين فعلا مش كل الناس .

**MoToRiZeR** · 11-09-2009 10:31 PM

أيوة يا درش انا عارف بس انا بتكلم إزاي نوصل المحتاجين للجمعيات ؟
و إيه الجهات اللي تساعد في حاجة زي كدة ؟

**Terrible_DaRsH** · 11-09-2009 10:38 PM

المشاركة الأصلية كتبت بواسطة motorizer

أيوة يا درش انا عارف بس انا بتكلم إزاي نوصل المحتاجين للجمعيات ؟
و إيه الجهات اللي تساعد في حاجة زي كدة ؟

اه , ده موضوع تانى .

فى حلول بس هتبقي صعبة عليك او بمعنى اصح مش هتفضى لها .

ممكن مثلا تاخد كروت من الجمعيات و تدى لكل واحد كارت بالعنوان او توصف له المكان و الجمعية تعمل تحريات عنه و تشوف اذا كان محتاج فعلا ام لا ؟

التحريات دى علشان يشوفوا اذا كان بياخد من كذا جمعية ولا لا ؟

عنده اولاد اد ايه ؟ هل قادر على العمل ولا لا ؟ سنه صغير ولا كبير ؟ و هكذا .

انت احسن لك تتبرع بس .

لان فى ناس بتاخد من الجمعيات و تروح تتسول برده , فانت كانك حطيت نفسك فى خلاط .