الحمدلله تميت الألف كيلو (تقييم عل سريع ) New Cerato
أنا يا جماعة الحمدلله تميت الألف كيلو فالعربية ال-New Cerato و اتبعت اجراءت التليين ..
العربية ما شاء الله جميلة و مريحة و فعلاً مش ندمان اني جبتها.. ولعيوب إلي فيها الحمدلله مش حاسس بيها، و فعلاً مميزاتها معوضة
و طبعاً أحب أقدم شكر خاص للأستاذ أحمد سامي.. موضعيتو و أمانته من الأسباب الكبيرة اني جبت العربية دي.. و طبعاً بشكر كل إلي فالمنتدى إلي قدم في توضيح كل مميزات و عيوب العربية .. أنا من أبل مشتريها ونا عارف عنها كل حاجة بفضلكو
أبل متكلم عليها، أنا أحب أوضح اني جبتها خليجي أعلى فئة من جابر عبد الشهيد. و عايز أقول بردو إن أنا قبل العربية دي كنت سايق peugeot 406
أنا معملتش تقرير طبعاً و عمري ما هقدر أبقى وافي فيه ذي كتير منكو ملي عملو، بس أنا ليا شوية تعليقات سريعة:
- بالنسبة للخامات: الخامات الداخلية فالفئة دي بالذات حلوة، هي أينعم أقل من عربيات تانية بس متحسش انها فقيرة.. الجلد فالكرسي ولأبواب مع التطريز الأحمر فالفرش ولابواب ولدركسيون مديين شكل حلو أوي للعربية.. غير إن بليل أنوار الطبلو بيبقى شكلها وهمي
- بالنسبة للعفشة: هي فعلاً ناشفة شوية، بس أنا أول محطيت نيتروجين فالكاوتش الإحساس دة راح خالص، غير إن حاسس انها نعمت أكتر مع الوقت.. دلوقتي مش حاسس فرق بينها و بين ال-peugeot
- بالنسبة للتكييف: التكييف أكتر من رائع و أحسن مما توقعت !! أنا أخويا عندو اللانسر البومة 1600 موديل 2008 و حاسس إن تكييفي أحسن منها بمراحل ! د غير رأيي تماماً إلي كنت سامعو من ناس كتير إن تكييف الياباني لا يعلى عليه.. غير إن موضوع الأوتوماتيك والتاتش عملي و مريح جداً..
- وحدة الصوت: صوتها نضيف جداً و جميل،بس لم تبدأ تعلي جمد تسمع زنة فل سماعات خصوصاً لو أغنية فيها bass عالي
- الثبات: جميل جداً، بس أنا مجرتش بيها جامد عشان التليين فمجربتش أوي بصراحة.. بس تحسها مكلبشة فالأرض
- الكاوتش ال-17": هو بصرحة جميل جداً فالإحساس بالثبات، بس أنا حسو مش عملي أوي بالذات فالحفر، لازم تبقى مركز أوي فالحفر.. لسة هنشوف هيعيش أد اه انشالله
- بالنسبة للباور والدركسيون: الباور بتاع العربية حسو تقيل شوية مع العلم إن ال-peugeot إلي كنت سايقه أبل كدا كانت هيدروليك برضو، بس حاسس بفرق.. والعربية غلسة شوية فالركن فعلاً ذي ما بعض الناس قالو عشان موضوع قطر الدوران دة، لازم تبقى ركنة واسعة شوية مينفعش تبقى أد العربية بالظبط
- سحب العربية: جميل جداً، بالرغم اني معدتش ال-RPM 3 !!
- من الحجات إلي ضايقتني جداً، إن العربية عايزة تظبيط زوايا و هي لسة جديدة !! من أول مجبتحة و هي بتحدف شمال شوية .. انشالله نشوف الموضوع دة في صيانة الألف
-مرايات التعتيم: عملية جداً، أنا سافرت مرتين بليل و حسيت بالفايدة بتاعتها
بالنسبة للعزل: أنا شخصياً شيفو رائع.. طول منا ماشي جوا البلد مش سامع صوت الموتور أصلاً، مبدأتش أسمعو غير عل صحراوي ونا مسافر على 100 مثلاً .. يمكن إلي شايفينو عالي بيحرقو عل موتور جامد أو بيشدو عشان كدا صوتو بيعلى
الفرامل : كذا موقف فرملت بسرعة والحمدلله استجابتها سريعة مشأالله، ربنا ميحوجنا ليها.. بس طبعاً مجربتهاش جامد أوي يعني
بالنسبة للصاج: د أنا شيفو فعلاً من عيوب العربية.. هو أينعم مش ورق بس هو أقل من عربيات تنيا.. بس أنا شايف ناس كتير بتقول إن الصاج دة ميزة مش عيب، والله أعلم.. بس أنا تاني يوم جبتها إتخبطت خبطة خفيفة فالباب والصاج دخل لجوا شوية مع انها مكنتش خبطة جامدة أوي
بالنسبة لفتيس العربية: الفتيس ناعم جداً جداً متحسش بالنقلات خالص.. بس أنا حاسس اني لو بشد هيبقى إستجابة بتعتو بطيئة سنة بسيطة جداً جداً، يعني متحسهاش غير لو بتشد
-تعليقات عال الحجات إلي جية مع العربية:
* معاها ال-6cd شنجر عادي
* إلي عند جابر مفيهاش ولاعة و طفاية زي عند الناس التانية، بس ادولي معاها طفاية من عندهم.. لما قلتلهم من أبل مشتري انتو معندكوش طفاية قالولي لالا موجودة ودوني وحدة أنا عرف انها مش بتاعت العربية أصلاً، بس أحسن من مفيش
* جه معاها ريموت spare، طفاية حريق، مثلث
بس أنا كان عندي سؤال سريع ، هل أنا المفروض دلوقتي بقى اقرص عل موتور براحتي ومشي على سرعات عالية ولا استنى لم أعمل صيانة الألف كيلو أحسن ؟
يرب أكون فدتكو بالتعليقات السريعة دي.. أنا مش لاقي حاجة تانية على بالي دلوقتي، فلو أنا ناسي حاجة اتفضل اسألو ونا أجوبكو علطول