المشاركة الأصلية كتبت بواسطة hamadamdph
أولا الف سلامة على اللي حضرتك بتسأل علشانه
بس احب اوضح لحضرتك موضوع معظم المصريين بيقعوا فيه عشان بس نوفر وقت للعيان هو في امس الحاجة ليه
فيه فرق بين المخ والأعصاب وبين النفسية والعصبية
الفرق بينهم هو الفرق بين الجراحة والباطنة
يعني الاول فرع من فروع الجراحة
الثاني فرع من فروع الباطنة
لو حضرتك عايز الدكتور عشان واحد مثلا لا قدر الله عمل حادثة واتأثرت عنده بعض المراكز في المخ يبقى حضرتك مش محتاج دكتور مخ واعصاب nerurosurgery لا حضرتك محتاج neuropsychiatry
كلمة نفسية وعصبية ليها وقع مش مستحب في مصر ودا بسبب الترجمة الغلط رغم ان الدكتور ده ممكن يقعد وقت طويل جدا يعالج العيان على عكس جراحة المخ والاعصاب اللي تعامله مع العيان قليل زي باقي فروع الجراحة.
يعني مثلا لو حضرتك محتاج دكتور عشان لا قدر الله:
نزيف في المخ, ورم في المخ, زرع دعامة في المخ, انسداد في مجاري المخ المائية, كسر في الجمجمة
بمعنى اصح حاجه تتشال أو تتصلح أو تتسلك يبقى حضرتك محتاج دكتور جراحة مخ واعصاب
لو حضرتك محتاج دكتور عشان لا قدر الله:
صداع, صداع نصفي, , ارتجاج, شلل, الشلل الرعاش, التهاب الاعصاب, جيان باريه, شلل الاطفال, حادثة ادت إلى شلل, صرع, عدوى المخ والاعصاب, اصابة الجهاز العصبي , الم الفقرات الدسك, الانزلاق الغضروفي, ضعف الاعصاب, قلق, اكتئاب, ادمان, شيزوفرينيا, خوف فوبيا, هستيريا
يبقى حضرتك محتاج نفسية وعصبية (أعصاب)
فحضرتك قول انت محتاجج اي فرع منهم انا ان شاء الله ابعت لحضرتك عناوين الاطباء الكبار في هذا المجال أو حتى ممكن من على موقع النقابة أو الدليل المصري.
والف سلامة مرة ثانية على اللي حضرتك بتسال ليه.
د. أحمد طبيب أعصاب