الموضوع: سؤال للقانونيين: بيانات طالباها المباحث

السلام عليكم يا شباب
البواب عندنا استلم ورقتين استيفاء بيانات من واحد قال انه مباحث وطالب من كل شقة في العمارة ومن كل عمارة في الشارع عندي انها تملاها
الورقتين فيهم بيانات عادية زي الاسم وتاريخ الميلاد ورقم بطاقة الرقم القومي لكل فرد من أفراد الأسرة
انا مش مستسيغ الأمر تماماً إني أددي بيانات زي دي لأي حد
جبت نمرة المباحث من الدليل وطلبت أكلم رئيس الوحدة اللي اسمه مكتوب في الورقتين ولقيته مش موجود بعد ما ردوا عليا ومن أول مرة وكانوا غاية في التهذيب على عكس ما توقعت
ولما سألت طلبوا يعرفوا أنا ساكن فين وبعدين ردوا إنهم هما اللي باعتين رجالتهم فعلاً يجمعوا البيانات دي للحصر وطلبوا مني التعاون إني أملا البيانات دي لهم.
طبعاً انا كدة اطمئنيت إنهم مش نصابين
بس كنت محتاج أعرف الموقف القانوني لو رفضت أقدم بيانات زي دي؟
هي مش المفروض المباحث تعمل تحرياتها عن الناس براحتها بدون الاعتداء على خصوصياتها؟
ولا هما زي بتوع السكة الحديد عاوزين الناس تعمل لهم شغلهم وتعمل التحريات بدالهم؟

ممكن الخبراء القانونيين يفيدونا؟

علي باشا

انا شايف إنك تديهم البيانات مفيهاش حاجة طالما تأكدت إنها من المباحث و هما متعاونين و ودودين .. أصلها رايحة للحكومة يعني هي كدة كدة عندهم بس ممكن يكونوا بيعملوا حصر للسكان عشان يبقي عندهم علم و سيطرة بالسكان أكتر و السيطرة علي الحي .. خاصة إن الشرطة في أكتوبر و زايد زي ما إنت عارف منضبطة نوعاَ ما أكتر من أي منطقة .. يعني قاعدة بيانات صغيرة للسكان عليها معلوماتهم ممكن دي تساعد كتير في حالة حدوث مشكلة لا قدر الله .