مشكلة بعد ما العجلة وقعت في حفرتين جامدين
أنا كنت ماشي في أحد الشوارع وفوجئت بوجود ماسورة مياه مكسورة والأرض كلها ميه ، فكملت مشي زي بقيت العربيات اللي ماشية معايا في الطريق
ولسوء الحظ العجلة اليمين وقعت بقوة في حفرة عميقة ، المهم حاولت أطلعها لغاية لما طلعت ، ولقيت حفرة بعدها وقعت فيها العجلة اليمين بس المرة دي مقدرتش أطلعها لغاية لما الناس رفعوا العربية وطلعت والحمد لله بعد عناء
المهم بعدها العربية بدأت تحدف يمين ، كشفت عليها عند أكتر من عفشجي كلهم بيقولولي مفيش حاجة
ظبطت زوايا الحدفة يمين راحت ، لكن مش قادر اتحكم في الإتجاهات على سرعة
مثال عدم التحكم :-
المفروض لما أكون ماشي عدل وعايز اكسر يمين باحود سنة يمين وارجع عدل تاني
الي يحصل إن السنة ايمين لما اجي احودها مرة تحرك العربية يمين جامد ومرة متحركش أصلا فباضطر لزيادة الحودة فبأفاجئ بحودة أكتر من اللي أنا عايزها ممكن تخليني أخبط في الرصيف ، ونفس الحكاية لما أعدل الدريكسيون ممكن لما بأعدل تفضل العربية ماشية يمين ولما أزود الحود العربية تجري شمال ، وده مش مخليني عارف أتحكم فيها كويس
وفي حاجة تانية
إني لما أكون ماشي 20 مثلا وكاسر يمين ، لما باحود شمال الدريكسيون بيكون حاود شمال وسنة كبيرة لكن العربية مازالت بتمشي يمين لغاية لما أزود في الحودة شمال ، وده سبب إني مش عارف أمشي / والزوايا مظبوطة عند أكتر من واحد
وحاجة كمان :
إن العربية في الحركة يمين بتتحرك بسرعة واستجابة أعلى من الشمال
غيرت المساعدين والبطاحات وبارات الدريكسيون وكاويتش الميزان وبلي العجل وقواعد المتور وفي الآخر مفيش فايدة مش باقدر أتحكم في العربية ، وكل القطع اللي فاتوا كان مفيهمش حاجة يعني اتغيروا على الفاضي طبعا أنا غيرت علشان أشوف نتيجة علشان الصنايعية عايزين حد يقولهم غيروا دا وبس هما مش بيقدروا يعرفوا المشكلة منين
أنا سمعت إن المقصات أو بيض المقصات ممكن يكونوا اتأثروا فأعرف إزاي ؟ وايه تاني ممكن يأثر في التحكم
ومعلش يا جماعة أنا طولت عليكم ودوشتكم وطريقة تعبيري بدائية علشان مش لاقي حد يفهمني ، وكل اللي بيجرب مش بيكمل 100 متر وبياخدها طيران فمش بيحس بالمشكلة
