من مع مشروع قرار إحلال الملاكي ومن متضرر؟

**michohat** · 14-09-2009 12:44 AM

السلام عليكم ورحمه الله وبركاته

[frame="7 100"]

اخوانى ارغب فى ان نتعرف على من يؤيد قرار احلال الملاكى و يراه ان به افاده له
ومن لا يؤيد هذا القرار ويراه يمثل ضرر له

هذا الموضوع تمهيدى لكى يُعرفنا بعدد المستفيدين و عدد المتضررين وقد يمثل انعكاس يمكن الاستشهاد به إن تقرر فعلا العمل بمشروع قانون الاحلال هذا
لان الذى حدث مع التاكسيات " سيارات تشغليها يعود على مالكها بالنقود والمكاسب " غير عادل ان يحدث مع السيارات الملاكى " سيارات خاصه لا يجني صاحبها من تشغليها نقود او مكاسب"

#878787

المفروض والمعمول به ان قرار تكهين السيارة او اهلاكها لا يخضع لسنه صنعها وانما يتخذ بناءً على حالتها الفنيه بواسطه الفحص الفنى

وارد ان نجد سيارة موديل السنه الحاليه وصاحبها هالكها معاه و ضاغط عليها فبالتالى حالتها الفنيه ستكون سيئة

وارد ان نجد سيارة موديل الستينات و السبعينات ( مرسيدس مثلا او فى حالتي فيات ) سيارة متصانه و لا يوجد ضغط عليها ومراعى فيها كل اصول الصيانه فبالتالى السيارة حالتها الفنية جيده

وارد ايضا ان نجد سيارة موديل السبعينات والستينات ( مدخنه وبتحرق بنزين وزيت وكل ما تمشى حته تقع منها ) هذه قد يمكن ان ندرجها من ضمن السيارات الخاضعه للاحلال( الاختيارى) ان تعزر على مالكها اصلاحها

ولكن متى ؟

يجب ان يطبق بعد تنفيذ الخطوات الأتية "وليس قبلها ":

احلال المواصلات والمرافق العامه لترقى لاستعمال الانسان ( اتوبيس - مينى باص - ميكرو باص- .... )

الاهتمام بجوده أسفلت الشوارع

ازالة المطبات والمقبات الصناعية العشوائية الغير مطابقة للمواصفات والتى تؤثر بالسلب على السيارات العابرة

التخلص من ظاهرة عدم التزام بعض رجال المرور بالسلوكيات الواجبة وسعيهم الى التربح والتكسب غير الشرعى باستخدام سلطات وظائفهم

دخل المواطن يكون مناسب للمعيشة الكريمه

[/frame]

عن نفسى اول المتضررين لان السيارة اللتى بحوزتي ( فيات 131 موديل 1979 1600 سى سي " وارثها عن والدى" ) هى كافية لى واستخدمها فى قضاء مصالحى ومصالح العائلة بدلا من الاحتياج الى وسائل المواصلات العامه الغير ادميه وبلطجه الميكروباصات وذل التاكسيات و غير مستعد ان ابدلها ولا امكانياتى و وضعى الان ( شاب فى بداية الحياة محتاج الى تكوين نفسة و يراوده حلم الزواج ) يسمح لى انى اضيق مادياً على نفسي في اقساط وصيانات عند التوكيل وقطع غيار غاليه وكل هذه المصاريف
السيارة سليمة فنياً ولايوجد بها مشاكل و استهلاكها فى البنزين مثالي (بنزين 90) و قطع غيارها موجوده ومنتشرة ومازالت تنتج "مطابقة لقطع غيار شاهين"

[info]بطمع فى تدخل الرئيس لرفع الظلم الذى يسوقة إلينا مشروع قرار احلال الملاكي[/info]

ارجو التفاعل

( إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ ) سورة الرعد آيه: 1

**ابوهاشم** · 14-09-2009 02:49 AM

كلامك جميل جدا
بس ياريت يكون فى صحوه فى ضمائر الكل
كبير وصغير
مع الاسف كلنا اصحنا مخطئين فى حق انفسنا
يعنى مش الحكومه بس
اللى بياخد رشوه زى ماذكرت لو ملقاش اللى يديله رشوه
مش هيفترى على حد ومش هيطلب
وسائق الميكروباص والتاكسى والنقل والكارو والتوكتوك
هو واحد مننا مش من الحكومه
مش معنى كلامى انى بدافع عن الحكومه وادين نفسى
لكن الحقيقه اللى دايما بنهرب منها
انا بالفعل كلنا مخطئين
انا عن نفسى موافق على الاحلال والتجديد
بس يكون فى تسهيلات لاصحاب الملاكى عن التاكسيات
نظرا لانهم مش هيتربحو من العربيات دى
وعدم الاجبار على التعامل مع التوكيل
انت مش تدينى عربيه وتخنقنى بيها انا اعملها صيانه
مكان ماانا عاوز واغير الزيوت اللى انا عاوزها
ومايبقاش شرط تجديد الرخص كلا 3 شهور
احنا مش هناخد عربيات علشان نجرى على مشاويرها
ونسيب مشاويرنا احنا

**michohat** · 14-09-2009 03:19 AM

المشاركة الأصلية كتبت بواسطة hashem1999

مع الاسف كلنا اصحنا مخطئين فى حق انفسنا
يعنى مش الحكومه بس
اللى بياخد رشوه زى ماذكرت لو ملقاش اللى يديله رشوه
مش هيفترى على حد ومش هيطلب
وسائق الميكروباص والتاكسى والنقل والكارو والتوكتوك
هو واحد مننا مش من الحكومه
مش معنى كلامى انى بدافع عن الحكومه وادين نفسى
لكن الحقيقه اللى دايما بنهرب منها
انا بالفعل كلنا مخطئين

فعلا فى ناس كتير بتستسهل وبتدفع الرشاوى بمبدأ هين قرشك ولا تهين نفسك والمعظم بيقول وانا مالى هو انا اللى هصلح الكون ودى مبادئ غلط
ايه رأيك انى مره اديت لعسكرى مرور مكافئة علشان خدنى مخالفة ركن فى الممنوع ( حصل من غير حلفان)
فالناس واخده على الاستسهال وبترمى المسئولية على غيرها

انا عن نفسى موافق على الاحلال والتجديد
بس يكون فى تسهيلات لاصحاب الملاكى عن التاكسيات
نظرا لانهم مش هيتربحو من العربيات دى
وعدم الاجبار على التعامل مع التوكيل
انت مش تدينى عربيه وتخنقنى بيها انا اعملها صيانه
مكان ماانا عاوز واغير الزيوت اللى انا عاوزها
ومايبقاش شرط تجديد الرخص كلا 3 شهور
احنا مش هناخد عربيات علشان نجرى على مشاويرها
ونسيب مشاويرنا احنا

مش هنقدر نقول للحكومه مش تلزمينا بالتعامل مع التوكيل ليه؟
1- لان العمليه دى اصلا معمولة لزياده مكاسب التوكيلات ومش معقولة التوكيل هيدى العربية للحكومه وبس وهيكتفى بمكسب البيع من غير ما يصينها
2- لانها بتدينا عربيات بالقسط ولغايه القسط ما يخلص لازم الحكومه تضمن ان العربية متابعه صيانه كويس علشان لو حد تعثر فى سداد الاقساط يسحبوا العربية منه وساعتها العربية مش تكون بره التوكيل او الضمان

يا ترى بفكر زيهم و لا غلط

**د.محمود صلاح** · 14-09-2009 03:22 AM

أنا ضد الإحلال الإجباري ولكن الإختيارى ممكن

**Terrible_DaRsH** · 14-09-2009 04:04 AM

هو مين لسه مبياخدش رشوة !!

و مين لسه مبيديش رشوة !!

اشكرك على تفكيرك فى المصلحة العامة و لكن دى مش نظرة تشائم و لا حاجة و لكن دى الحقيقة .

البلد دى مش هيتعدل حالها و لو ل 100 سنة قدام .

الازمة العاليمة جت غبور و منصور اتفقوا سوا ووزعوا عربياتهم على السواقين غصب عنهم , يعنى طالعين واكلين نازلين واكلين .

انا مش عايز اتكلم و الله علشان ميحصلش مشاكل بس .

**abdelaziz-waleed** · 14-09-2009 04:07 AM

انا مع الاحلال الاختياري لأنه هيفيد الناس اللي عندها امكانيات تشتري عربية جديدة بتسهيلات مريحة
انما ضد الاحلال الاجباري لأنه حرام يكهن عربية موديل 70 حالتها افضل من عربية موديل 2007 علشان بس العمر وغش مهندسين الفحص في المرور

**x_gomgom** · 14-09-2009 04:15 AM

شوف انا مؤيد و معارض ....
معارض انه يكون اجباري و يكون المقصد الاساسي منه التربح و ليست الاسباب المعلنه و منها الحفاظ على البيئه و تقليل نسبه الاعطال....
و مؤيد لانك برضه لو بصيت ليها بعين العقل الجديد جديد برضه و اي ان كانت المبررات عمر ما القديم هيبقي زي الجديد في سهوله التعامل و قله الاعطال و الاعتماديه و كمان و خلينا نقول الحق في عربيات بقت خرده بالفعل و حرام تمشي في الشوارع....
انا نفس الحال بس لو الاحلال هيكون ميسر مثلا يلغي الفائده و يكون قسط بسيط و لو بفائده معقوله هوافق... قطع غيار القديم برضه مش رخيصه قوي برضه (طقم دبرياج بولونيز ب 400 جنيه!!) و في قطع مش موجوده دا غير اشتغالات الصنايعيه....
مش عارف انا عن نفسي عايز اغير و في نفس الوقت خايف و في ناس حالاتها لا تسمح بتحمل جنيه زياده على ميزانيتها....
لو هنراعي الكلام دا يبقي اكيد هوافق لو مفيش تربح و الموضوع خالي من المصالح الماديه و اللي انا حاسه و الله اعلم ان التوكيلات بتشجع الموضوع دا و دا اللي مخوفني....
معلش طولت عليكم و شكراً لسعه صدوركم

**Terrible_DaRsH** · 14-09-2009 04:23 AM

بصوا يا جماعة ممكن تبرروا الموضوع ده باى حاجة .

ما عدا جملة ( الحفاظ على البيئة ) دى .

علشان الجملة دى بتستفزنى جدااااااااااا , محافظة على بيئة مين , ده احنا عايشين فى مصر اللى فيها ناس مش لاقية تاكل تقولوا محافظة على البيئة !!

اذكروا اى نقطة ما عدا النقطة دى رجاء :(

**x_gomgom** · 14-09-2009 04:28 AM

يعني حضرتك لما تبقي قاعد في بيتك و عربيه ماشيه مظلعه غيمه وراها و متعرفش تاخد نفسك دا يبقي كويس؟؟؟
انا معاك ان دي مش اللي هتحل حاجه و هنلاقيها من العربيات ولا الاتوبس ولا قش الرز.....
بس دا لا يمنع ان برضه في عربيات عايزه الحرق و لو عدت جنبك مش هتعرف تاخد نفسك؟؟؟