كيا سيفيا 99 ولا دايو لانوس

**zoro_elsharq** · 14-09-2009 11:45 AM

سؤال عاجل لأهل الخبره فى هذا المنتدى وديه اول مشاركه ليه لانى حسيت فعلا ان القائمين على هذا الموقع ناس فعلا بتفهم وعندهم دراية قويه وفعلا يعتمد عليهم

انا معايا مبلغ فى حدود 40 ألف ومحتار أجيب عربيه دايو لانوس 1 ولا كيا سيفيا من 97 ل 99 لانى بسمع ان الموديلات ديه الكورى مش تجميع مصرى والموديلات ديه الشكل الجديد

ياريت المقارنه تكون فى كل حاجه الانسيابيه والسحب والنعومه والعفشه وقطع الغيار والاتنين انجيكشن ولا لا
وعايز كمان اعرف ايه رأيكم فى قوة الماتور والاعتماديه والثبات فى الاتنين وكمان فى حاجه فيهم فرامل abs

انا اسف يا جماعه بس بجد انا ماليش غيركم يدلونى

ورجاء الاخذ فى الاعتبار انى بسافر بصفه اسبوعه مشوار 200 كم متواصل وغير ممهد ومكسر جدا

ولكم جزيل الشكر وجزاكم الله خيراً

**mohd2** · 14-09-2009 10:25 PM

مفيش حاجة فيها abs
السيفيا أحسن في السحب بس يعيبها قطع غيار غالية وقليلة لبعض القطع
اللانوس تتميز في رخص قطع غيارها وانتشارها
وخلي بالك ان الأتنين كوري فرأي هتلاقيهم قريبين من بعض في الأداء
وربنا يوفقك للخير
ويفيدك الأعضاء بمعلومات أكتر و أحسن

**zoro_elsharq** · 15-09-2009 11:17 AM

شكراً يا باشا على الرد بس اسمحلى اسألك لو عند حضرتك فكره عن مقارنه لكام قطعه غيار فى السعر بين السيفيا واللانوس

**elwad_crazy** · 15-09-2009 11:33 AM

السيفيا حاجاتها بالنسبه للانوس غاليه
وكمان مش متوفره زي الانوس
وشوف فى منتدى الكيا
رائ الناس فيها وعيوبها ومميزاتها

وهنا فى قسم الدايو شوف مميزات العربيه وعيوبها

**amr_elrashidy** · 15-09-2009 04:59 PM

السيفيا الموديل القديم 96-97 ده متقربش جمبه لان قطع غياره مقرفه..من اول 99 لحد اول 2000 كورى برضو بس الشكل الاخير و ده انضف حاجه و انضف من اللانوس عن تجربة..شاسيه و موتور و عفشة تمام التمام..صاج خفيف شوية و بيكرمش و بيبقى شكله معرج..نعومة للانوس انعم..قطع الغيار طبعا اللانوس ارخص واوفر بس السيفيا موجوده و مش غالية اوى ماعدا بعض القطع و حتلاقيها مستعمل..استهلاك البنزبن الاتنين مش بعاد عن بعض لكن اللانوس افضل..التكييف كويس فى الاتنين..فرامل السيفيا برقبة اللانوس..الثبات طبعا السيفيا..الاعتمادية الاتنين قريبين من بعض الفرق فى ان دى كورى و دى تجميع مصرى..انا عن نفسى آداء السيفيا عجبنى جدا عن اللانوس

**zocor742** · 17-09-2009 08:50 AM

بصراحة انا معرفش اى حاجة عن السيفيالأنى مركبتهاش ومتعملتش معاها بس شايفها مع ناس شغالة معاهم عشان كدة مش هقدر اقارنهم بكلام الناس

وبصراحة ياجماعة بفكر فى الكيا الشوما اللى فوق ال2000 وطالع
بحث ان العربية دى شديدة وسعاات احسها فيها شكل شنطة وبودى فقط
حد يعرف معلومات عنها
بالزات لو عجل اوروبى او كورى
وهل العربية دى افضل ولا النوبيرا من حيث الاستخدام والصيانة والميكانيكا وقطع الغيار والمشى والسحب والثبات
دخلتكم فى مقارنة تانية بس
جت بظروفها والله لسا باصص على واحدة بيضاء اوروبى 2000 او 2001 كاملة بفتحة سقف اوتوماتيك 1600 سىسى والعربيى خواجة بجد وحاسس انها ممشيتش كتير هيا عددها عما 45 الف كيلو اة نسيت وفيها اير باج وتقريبا absاو معدل فرامل ورا بدسكات بدل الطبل