الموضوع: امشي عدل .. امشي عوج .... هاتتكلبش يعنى هاتتكلبش

هاي يا شباب

الموضوع ده حصل معايا بعربيتي اللانوس من شهر كده، لكن للاسف ماعرفتش اصورها .. فقولت استنى لغايه لما اصور عربيه تانيه واحكيلكم الحكايه ........

طبعا اللى باين من الصوره ان العربيه متكلبشه تحت علامه الانتظار موازى للرصيف

اللى حصل انى فى يوم كنت رايح المول اللى هناك فى شارع المعسكر الرومانى بمنطقه رشدي بالاسكندريه، ولقيت الركنه دي ولما شوفت العلامه قولت ده أأمن مكان ليا ممكن اركن فيه (تحت العلامه مباشره)

وركنت العربيه تحت العلامه بالظبت (دايو لانوس مش اللى موجوده فى الصوره) وبعد ساعه كده لقيت واحد صحبي بيقولى عندي ليك خبر وحش وخبر حلو ..... قولتله قولى وطمنى

قالى الخبر الوحش ان عربيتك اتكلبشت .......
طيب والحلو: ان الظابت لسه موجود الحق اطلعله

قوم ايه ... طلعت انا للظابت ومش مصدق انها متكلبشه، لغايه لما شوفتها بعيني

انا: ايه يا باشا العربيه متكلبشه كده ليه
الظابت: ممنوع الوقوف هنا
انا: ده انا راكن تحت العلامه، فى ايه اكتر من كده اعمله
الظابت: العلامه دي للموقف اللى قدامها فقط، بص على العلامه البعيده دي (على بعد 20 متر وملفوفه وجنبها شجره)
انا: انا ما شوفتش العلامه البعيده دي + انا راكن تحت العلامه بتقول الانتظار موازي للرصيف
الظابت: تحب اسحب رخصتك ولا تدفع 50 جنيه غرامه
انا: ادفع يا باشا وعيش وسيبني اعيش
الظابت: وانا هاوجب معاك واديك غرامه بايصال واحد ب 50 بدل ما ادفعك 75 جنيه
انا: كلك زوق يا باشا، طيب ما تديني ب 25 وتكسب ثواب، ده انا اول مره اخد مخالفه فى حياتى
الظابت: ها هاتدفع ولا

دفعت طبعا وشكرت ربنا انى لقيته وما دختش وراه
ومن بعد كده هاصور كل العربيات اللى بتقف فى المكان ده واسيحله فى كل حته

دلوقتي اسيبكم مع الصوره اللى اكيد شوفتوها من الاول
ومستنى تعليقاتكم عليها وعلى موقفى

على فكره: علامه ممنوع الوقوف طلعت بتلف 360 درجه، لغايه لما يجي الزبون يركن وتتعدل تاني ... حاجه تكنولوجيا نصب كده