حدث بالفعل ......... على كورنيش أسكندرية

يوم السبت 3/11/2007 كنت في أحد فنادق الاسكندريه المطله على الكورنيش ...... و طبعا الكل عارف ان عبور الطريق ده يعتبر مغامره غير محسوبه العواقب ... لان الطريق بعد التوسعه بقى عريض جدا ... السيارات تسير بسرعات غير مناسبه اطلاقا لوسط المدينه .... والاسوء ان حركه السيارات غير منتظمه يعني مفيش حد ملتزم بحارته والطريق بين ناس نايمه وماشيه في وسط الطريق بالراحه وسواقين تاكسي ممكن يقفوا فجأه في أي حته ....... وشباب روش مقضيها غرز...

المهم ........ وانا واقف في البلكونه ... سمعت صوت فرمله ... ارتطام شديد ... لقيت عربيه شاهين خضراء خبطت راجل كبير كان بيحاول عبور الطريق ...... العربيه ركنت على اليمين ......سائق السياره راجل متوسط السن واضح انه ملتزم وقف رغم انه مش غلطان وحاول يساعد رغم ان اعصابه بايظه ..... الناس اتجمعت وشالو الراجل حطوه على الرصيف ............... لغايه هنا والمشهد طبيعي جدا وبيكرر كل يوم عشرات المرات

المفـــــــــــــــــــــ ـــــــــــــــاجأه
.... بعد الحادث بأقل من 5 دقائق أسمع صوت سيارة أسعاف ..... قلت يمكن عربيه معديه بالصدفه بتنقل حد تاني......... العربيه تقف أمام الحادث وينزل منها 3 أفراد واضح انهم فاهمين بيعملو أيه .......... يتم أسعاف المصاب ونقله .. وتحركت سياره الاسعاف بعدها ب 5 دقائق ..... انا حسيت اننا مش في مصر

تفتكرو اللي انا شفته ده معناه انا لسه في أمل ينصلح حالنا في يوم من الايام


ملاحظة ............ الاسكندرانيه سواقتهم صعبه قوي ...... :shock:

ياريت تكون الدنيا اتصلحت الواحد عنده لسه امل
ويارب الامل مايموتش

نأمل ان يكون انصلح الحال

الأمل لم و لن يغيب، بس المهم كل واحد يبتدى بنفسه، الأسعاف اللى جت بسرعة ماكنتش هتيجى لو اللى كلمها ماكلمهاش بسرعة.

يا رب يكون الحال اتصلح

و الراجل يقوم علي خير ان شاء الله

له تفسير واحد أن موقف عربيات الإسغاف يبعد عن مكان الحادث بحوالى من 5 الى 7.5م بحسب التوقيت اللى قلته

ان شاء الله يكون محصلوش حاجة جامدة و ان شاء الله يكون لسة فى أمل فى انصلاح الحال ... أنا من حوالى أسبوع كنت ماشى على الكورنيش و كان فى حادثة مشابهة بس الشخص المخبوط كان ملقى على الأرض و متغطى خلاص و بركة من الدماء حوله و المنظر صعب جداً.

اقتباس:

---

ملاحظة ............ الاسكندرانيه سواقتهم صعبه قوي ......

---

يا راجل حرام عليك الاسكندرانية غلابة ... أنا لما بأسوق فى القاهرة بأحس انى عايش جوة فيلم رعب!

اقتباس:

---

المشاركة الأصلية كتبت بواسطة جندى مجند

اقتباس:

---

ملاحظة ............ الاسكندرانيه سواقتهم صعبه قوي ......

---

يا راجل حرام عليك الاسكندرانية غلابة ... أنا لما بأسوق فى القاهرة بأحس انى عايش جوة فيلم رعب!

---

انا برضة مستغرب !!!!!

أسكندرية .............. قاهرة ............... أسيوط .............. بورسعيد ................ فيوم ................... كلهم مصريين
و كلهم معندهومش نظام ........... و فوضويين ..................... و أنا مصري علشام محدش يهاجمني
و لكني أعاني يوميا من السواقة و كل يوم برجع البيت و أنا دمي محروق

أعتقد إن دى بارقة أمل على طريق إصلاح أحوالنا كمصريين , لسرعة وصول الإسعاف لمكان الحادث.
أيضا أنا أحيى الشخص قائد السيارة لشجاعته و تحمله المسئولية و توقفه لمساعدة المصاب , برغم إن كتير من الناس ممكن يهربوا فى موقف زى ده .
و ربنا يشفى المصاب و يقوم بالسلامة.

الإسكندرانيه سواقتهم ممتازه وإن كانت لا تخلوا من الملاحظات ولكنها ليست بالذراع مثل القياده فى القاهره

والله اللي حضرتك بتقوله ده كلام كويس

ولكن كيف نفسر ما حدث مع الجراح العالمي أ. د. أحمد شفيق!!

عندما يترك رجل بهذه القيمة دون إسعاف حوالي 4 أيام بعد تعرضه لأزمة قلبية وهو في الساحل الشمالي اللي المفروض إنه بيبقى فيه صفوة المجتمع لعدم وجود سيارة إسعاف مجهزة وبعد نقله في سيارة خاصة للقصر العيني - والمفروض إنه قلعة الطب في مصر - لا يجد أي إهتمام على الإطلاق وحتى عندما حاولت أسرته نقله خارج مصر ما يلاقوش وسيلة لذلك إلا بعد عناء ومن خارج مصر ليصل لفرنسا متأخرا.

طبعا لا إعتراض على قضاء الله بس الإهمال ده داء يجب التداوي منه.

رحمة الله عليه وعلى كل ضحايا الإهمال واللامبالاة في مصر.

هو بصراحه اشهد لرجال المرور في الاسكندريه بهمتهم في توسيع الطريق لسيارات الاسعاف بطريقه ملحوظه ومبهره
وفي نفس الوقت اشهد لسواقين الاسكندريه ان سواقه معظمهم(وليس كلهم) زي الزفت ويبتدي فيلم الرعب يوم معدي شارع الكورنيش فبضطر امشي كتيييييييييير لحد ملاقي النفق

على فكرة انا بشوف عربيات اسعاف تلاقيها راكنة فى المواقف مخصوص علشان حوادث البحر

لسة امبارح و احنا ماشيين كان والدى سايق و مرةواحدة بنفادى علربية لقينا واد شاب مرمى فى نص الطريق و ازاز فى كل حتة والله كنا حندوسة
:? :? :?

و كمان انا واصحابى لما بنقد سوا على قهوة على البحر دائما لازم تسمع صوت فرامل :cry: :cry: :cry:


بصراحة انا عمرى ما عديت البحر و مش حعدية ان شاء الله و هية مش جدعنة ان الواحد يعدى البحر

هو بصراحه طريق البحر ده مجرد انك تقعد تتفرج عليه من فوق بيبقى فلم رعب مش تقولي تعديه ........... ربنا يكون في عون الناس اللي بتضطرها ظروفها انها تعديه
الاخوه اللي بيدافعو عن سواقة الاسكندرانيه بقولهم انا بصراحه شفت بعيني ما حدش قالي .......... الصحراوي من بعد الكارته لغاية ما تدخل على الداون تاون ........ قمه التهريج ... الطريق ضيق وفي اشغالات كتيير ... . واتنين منهم واحد من اليمين كسر عليه في مدخل احد الكباري والتاني جاي من ورايه وخد غرزه من الشمال ......... وتجاهل الاشاره اللي انا مديهالو تماما ......... خلاني فرملت و وقفت نماما وكمان ورايا مقطوره صوت فراملها يجيب صمم ............. يعني شايفني ها البس ومصمم يعدي كأنه كده بقه بطل ..........طبعا الولاد كانو نايمين ورا صحيو مرعوبين ......... وحسبنا الله ونعم الوكيل

حتلاقى اللى عمل كده جاى معاك من القاهره :D :D

اقتباس:

---

المشاركة الأصلية كتبت بواسطة محمد ابراهيم 1

حتلاقى اللى عمل كده جاى معاك من القاهره :D :D

---

ههههههههههههههههههه

ملعوبة .. وكنت عابز اقولها بس خفت يزعل

اقتباس:

---

المشاركة الأصلية كتبت بواسطة Mgio

هو بصراحه طريق البحر ده مجرد انك تقعد تتفرج عليه من فوق بيبقى فلم رعب مش تقولي تعديه ........... ربنا يكون في عون الناس اللي بتضطرها ظروفها انها تعديه

---

طيب تعمل ابه للى ساكن على البحر مباشرة !!!!!!!!

انا حماتى ساكنة على البحر مباشرة فى منطقة "سبورتنج" وعند اوسع حته فى الكورنيش كله
وكل يوم والتانى اشوف حاجات ليف قدام عينى سواء كانت عربيات فى بعض او عربيات بتخبط ناس

" ربنا يكفيك شر طريقك "

دى دعوة امى كل لما تشفنى وانا نازل

اللهم اكفينا جميعا شر الطريق

ياريت
حدث بالفعل على المحور
سياره فيها راجل ومراته الحامل لاحد الاسباب اللي انا مش عرفها لغايه دلوقتي ان العربيه اتحرقت كالعاده وقفت الدنيا والاغرب
ان لا عربيه الاسعاف جت ولا عربيه المطافي جت
والراجل وماراته رحمهم الله من غذاب مصر اللي احنا بنعمله في نفسنا
والموضوع اتذلع على البيت بيتك وبكل سزاجه يطلع وزير الصحه المحترم يقول(احنا في عربيات اسعاف جايه اول يناير)
وعلى شعبان عبد الرحيم (في اول يناير)
تحيا مصر

لا إلة إلا اللة - ربنا يحفظنا حميعا

أنا سافرت كتيير بس زي سواقة اسكندرية ما شفتش خاصة في العجمي قلة أب و بلطجة و عدم احترام و قلة تربية على مستوى عالي (اسكندرية حتة من بلدي و أحسن مكان صيفت فيه بس السواقة هناك زي الزفت)

بس حقيقة كورنيش اسكندرية منظم جدا وواضح إن في اهتمام كبيير بي بس ده طبيعي و لازم لإنه العمود الفقري لإسكندرية كلها

اقتباس:

---

حتلاقى اللى عمل كده جاى معاك من القاهره

---

لا الاتنين ملاكي اسكندريه :shock:

أنا إسكندرانى بصراحة أفضل طريقة للقيادة تكون راكب مشروع وتتفرج على الرايح واللى جاى

اقتباس:

---

المشاركة الأصلية كتبت بواسطة tutankhamoun

أسكندرية .............. قاهرة ............... أسيوط .............. بورسعيد ................ فيوم ................... كلهم مصريين
و كلهم معندهومش نظام ........... و فوضويين ..................... و أنا مصري علشام محدش يهاجمني
و لكني أعاني يوميا من السواقة و كل يوم برجع البيت و أنا دمي محروق

---

بارك الله فيك
جبت من الاخر
هى دى سواقه
البلد بقت عجيبه
فى حاجه غلط
انا فعلا زهقت
اولا مشكله الناس اللى قلبها ميت و بتعدى الكورنيش كده بمنتهى الهدوء و اللامبالاه
و لا بيهمهم ان العربيات جايه بسرعتها و ان الشارع عريض ميحتملش دلعهم
و اول متقرب عليهم العربيه
اللى عامل شجيع السيما و بيعدى و مش هامه يقف زى الفرخه الدايخه ادام العربيه يبقى مش عارف يروح فين يتحرك ادام و وار و الواحد يدى انتظار للى ورا و جى بسرعته و مش فاهم بهدى و بدى انتظار ليه و جنبى العربيات يمين و شمال مكدسين مفيش نفس اجى كده او كده
فى الاخر ربنا بس اللى بيسترها معانا و مع الناس دى
رغم ان كل الحوادث دى عالطريق و الناس بتموت لو بصينا حنلاقى الراجل مات جنب النفق
طب و على ايه مكنت نزلت و عديته احسن
نصيب ؛؛؛؛

ثانيا البلد الفتره الاخيره فعلا لا تطاق
دايما ابو قير هو اللى زحمه و ممل
دلوقتى البحر طول الوقت واااااااااااقف مبيتحركش
كنا زمان نقول دى ساعه الذروه وقت خروج المدارس او الشغل
دلوقتى طول الليل و النهار ساعه ذروه بلا مبالغه
و حكايه ان العربيات تتكربس فى مكان واحد و يقف البحر
و لما تمشى العربيات اتفاجأ انهم بيجروا و فتحوا عالرابع
طب اصلا كان ايه سبب الزحمه و الوقوف دقايق

محدش الايام دى يعرف حاجه اسمها اشارات
يا اما مش بتسخدم اصلا و الظاهر انها نزلت غلطه مصنعيه فى العربيات
يا اما الناس كلها بقت شوله و بيستخدموها بالعكس
واحده امبارح محترمه جدا بتحدف عليا شمال و الهانم مديه اشاره يمين
الواحد بقى بيسوق بالاحساس يشوف اللى ادامه بيحدف على انهى ناحيه ساعتها حيعرف هو ناوى يروح فين

و كذلك المرايات محدش فاتحهم اصلا
و اللى يلاقى خرم فاضى يجرى يدخل فيه
بصراحه بلد تخنق
ربنا يتوب علينا يا رب

و بالنسبه للاسعاف الاكيد انها جايه من مكان قريب و تبع مستشفى خاص محترمه
لان المصريين و لله الحمد مبيعرفوش ازاى يتعاملوا مع عربيه اسعاف معديه و المفروض ان الثانيه بتفرق فى حياه او موت شخص
بيقفوا متسمرين ادام الاسعاف
و يوسعوا لها على استحياء علشان اول متعدى يكونوا جرى وراها
ربنا يهديهم و يرحمونا ؛؛؛؛؛؛

يا جماعة الامل موجود و ربنا يصلح حال البلد دي لان فعلا احنا كلنا بنحبها مهما قلنا غير كده